சிக்கன நடவடிக்கை: ரூ 563 கோடி சேமித்த ஏர் இந்தியா

மும்பை: பழைய விமானங்களைக் கைவிடுதல், வாடகையைக் குறைத்தல், நல்ல செயல்திறன் கொண்ட விமானங்களை வாங்கியதன் மூலம் ரூ 563 கோடியை ஏர் இந்தியா நிறுவனம் சேமித்துள்ளது.

பெரும் இழப்பைச் சந்தித்து வந்த ஏர் இந்தியாவுக்கு இது மிகப் பெரிய ஆறுதலாக அமைந்துள்ளது.

இதுகுறித்து ஏர் இந்தியா நிர்வாக இயக்குநர் அர்விந்த் ஜாதவ் கூறுகையில், "29 புதிய விமானங்களை சர்வீஸில் சேர்த்துள்ளோம். இவை நல்ல செயல்திறன் மிக்கவை. குறைந்த எரிபொருளில் அதிக தூரம் செல்லும் திறன் மிக்கவை.

இதனால் கணிசமான எரிபொருள் செலவு மிச்சமாகியுள்ளது. அதேநேரம், நிறைய செலவு வைத்த பழைய விமானங்கள் 11 -ஐ திருப்பிக் கொடுத்து விட்டோம். இன்னும் கூட சில விமானங்களை அப்படித் தர திட்டமிட்டுள்ளோம். இதுவும் நிறுவனத்தின் சிக்கன நடவடிக்கையில் ஒன்றுதான்.

இந்திய-வளைகுடா நாடுகளுக்கு இயக்கி வந்த விமானங்கள் 5-ஐ குறைத்துவிட்டோம். இப்போது அந்த ரூட்டில் ஏர் இந்தியாவின் குறைந்த கட்டண விமானங்களை இயக்க உள்ளோம். இது அதிக லாபம் தரும்.

இதுபோன்ற நடவடிக்கைகள் நல்ல பலனைக் கொடுத்துள்ளன" என்றார் அரவிந்த் ஜாதவ்.