யுஎஸ் ரியல் எஸ்டேட் வீழ்ச்சி... மீண்டும் பொருளாதார நெருக்கடி?

நியூயார்க்: அமெரிக்காவில் மீண்டும் பொருளாதார மந்தம் தோன்றும் என நிபுணர்கள் கணித்தது சரியாகிவிடும் போலிருக்கிறது.

மீண்டும் ரியல் எஸ்டேட் துறையில் விற்பனை மந்தமாகிவிட்டது. குறிப்பாக இந்த டிசம்பர் மாதம் விற்பனையில் அதிர்ச்சி தரும் சரிவு ஏற்பட்டுள்ளது. இதனால், மீட்சி வரும் என்று நம்பிக்கொண்டிருந்தவர்கள் நினைப்பில் மண் விழுந்துள்ளது.

நவம்பர் மாதத்தில் அமெரிக்காவில் விற்பனையான வீடுகள் எண்ணிக்கையைவிட டிசம்பர் மாதம் 16.7 சதவிகிதம் அளவு குறைந்துவிட்டதாம்.

இது மிகப்பெரிய சரிவாக அமெரிக்க நிபுணர்களால் பார்க்கப்படுகிறது. வரிச் சலுகை தரப்பட்டுள்ள இந்த சூழலில் இந்த சரிவு ஏற்பட்டுள்ளது கவலை தருவதாக உள்ளது என அவர்கள் கருத்து தெரிவித்துள்ளனர். அதே நேரம், இந்த சலுகைகள் நீக்கப்பட்டுவிட்டால் நிலைமை இன்னும் மோசமாகும் என்றும் அவர்கள் கூறியுள்ளனர்.

சிறிய குடும்பத்துக்கான வீடுகள் விற்பனை 16.8 சதவிகிதம் வீழ்ச்சியடைந்துள்ளது. அதே போல மத்திய மேற்கு பகுதியில் வீடுகள் விற்பனை 25.8 சதவிகிதம் வீழ்ச்சியடைந்துள்ளது. ஆனால் கடந்த ஆண்டு அளவுக்கு நிலைமை மோசமில்லை என்கிறார்கள்.

அமெரிக்காவின் மேற்குப் பகுதியில் விற்பனை சற்று மேம்பட்டதாக இருந்தாலும், இந்த ஆண்டும் வீழ்ச்சி முற்றிலும் நீங்கவில்லை. வடமேற்குப் பகுதியில் 19.5 சதவிகித வீடு விற்பனையில் சரிவு ஏற்பட்டுள்ளது.

அதே நேரம், 2009-ம் ஆண்டு 5,156,000 வீடுகள் விற்பனையாகியுள்ளன. இது 2008-ம் ஆண்டை விட 4.9 சதவிகிதம் அதிகம் என்பது குறிப்பிடத்தக்கது.

இன்னொரு பக்கம் அமெரிக்காவின் ஆட்டோமொபைல் துறை ஓரளவு நல்ல முன்னேற்றம் தெரிவதாக புள்ளி விவரங்கள் கூறுகின்றன. வீடுகள் விற்பனை சரிந்தாலும், ஆட்டோமொபைல் வளர்ச்சி சற்று ஆறுதல் தருவதாக உள்ளதாக நிபுணர்கள் தெரிவித்துள்ளனர்.