கட்சித் தலைவர்களின் போக்குவரத்து- வேட்பாளர் செலவு கணக்கில் வராது

சென்னை: தேர்தல் பிரசாரத்துக்காக தொகுதிக்கு செல்லும் அரசியல் கட்சி தலைவர்களின் போக்குவரத்து செலவை அந்தந்த கட்சி வேட்பாளர்களின் தேர்தல் செலவு கணக்கில் சேர்க்கத் தேவையில்லை தமிழக தலைமை தேர்தல் அதிகாரி நரேஷ்குப்தா விளக்கியுள்ளார்.

இதுகுறித்து தமிழக தலைமை தேர்தல் அதிகாரி நரேஷ்குப்தா வெளியிட்ட செய்திக்குறிப்பில்,

'தேர்தல் பிரசாரத்துக்காக தொகுதிக்கு செல்லும் அரசியல் கட்சி தலைவர்களின் போக்குவரத்து செலவை (விமானம் உள்பட), அந்தந்த கட்சி வேட்பாளர்களின் தேர்தல் செலவு கணக்கில் சேர்க்கத் தேவையில்லை.

ஆனால் அதற்கென்று நிபந்தனைகள் விதிக்கப்பட்டு உள்ளன. இந்த வகையில், அங்கீகரிக்கப்படாத 20 அரசியல் கட்சி தலைவர்கள் மற்றும் அங்கீகரிக்கப்பட்ட 40 அரசியல் கட்சி தலைவர்களுக்கு, இந்த சலுகையை நிபந்தனையுடன் அளிக்க வகை செய்யப்பட்டு உள்ளது.

தேர்தல் தேதி அறிவிக்கப்பட்டு 7 நாட்களுக்குள், இந்திய தேர்தல் ஆணையம் மற்றும் தலைமை தேர்தல் அதிகாரி ஆகியோருக்கு அரசியல் கட்சிகள் மற்றும் அதன் தலைவர்களின் பெயரை தெரிவித்திருந்தால் மட்டுமே இந்த சலுகையை பெற முடியும்.

பென்னாகரம் இடைத்தேர்தலுக்கான அறிவிப்பாணை மார்ச் 3ம் தேதி வெளியிடப்படுகிறது. எனவே போக்குவரத்து செலவை தேர்தல் செலவு கணக்கில் சேர்க்க விரும்பாதவர்கள், தங்கள் அரசியல் கட்சி மற்றும் தலைவர்களின் பெயரை மார்ச் 10ம் தேதிக்கு முன்பாக இந்திய தேர்தல் கமிஷன் மற்றும் தமிழக தலைமை தேர்தல் அதிகாரியிடம் கொடுக்க வேண்டும்.

பெயர் வந்து சேரப்பெற்ற கட்சி தலைவர்களின் போக்குவரத்து செலவு தவிர, பிரசாரத்துக்கு ஆகும் மற்ற அனைத்து செலவுகளும், அந்த கட்சியின் வேட்பாளர் கணக்கில் சேர்க்கப்படும்' எனக் கூறப்பட்டுள்ளது.