டெல்லியில் பருவ மழை தாமதாகிறது-ஜூலையில் தொடங்கும்

டெல்லி: டெல்லியில் இந்த ஆண்டு தென் மேற்குப் பருவ மழை வழக்கமாகத் தொடங்கும் ஜூன் 29ல் தொடங்காமல் சிறிது தாமதமாக ஜூலை முதல் வாரத்தில்தான் தொடங்கும் என வானிலை ஆய்வு மையம் தெரிவித்துள்ளது.

இதனால் டெல்லிக்காரர்கள் மழைக்காலத்திற்காக இன்னும் சிறிது காலம் காத்திருக்க வேண்டிய நிலை ஏற்பட்டுள்ளது.

இதுகுறித்து வானிலை ஆய்வு மைய அதிகாரி குப்தா கூறுகையில், தலைநகரில் பருவ மழை வழக்கமாகத் தொடங்கும் தேதியான நாளை தொடங்காது. ஜூலை மாதம் முதல் வாரத்தில் தொடங்கும் என எதிர்பார்க்கப்படுகிறது என்றார்.

கடந்த ஆண்டு தலைநகரில் ஜூன் 30-ம் தேதி அன்று பருவ மழை தொடங்கியது. கடந்த சில நாட்களாக நகரெங்கும் பருவ மழைக்கு முன்னதான மழை பெய்துள்ளது.

இன்று காலையில் நகரின் சில பகுதிகளில் லேசான மழை பெய்துள்ளதாக தகவல்கள் தெரிவிக்கின்றன. நேற்றிரவு நகரில் 2 மில்லிமீட்டர் மழை பதிவாகியுள்ளது.

குறைந்தபட்ச வெப்பநிலை 28 ஆக பதிவாகியுள்ளது.