மாஜி யு.எஸ். துணை அதிபர் டிக் செனி மீது நைஜீரியா லஞ்சப் புகார்

Published: Wednesday, December 8, 2010, 12:33 [IST]

Subscribe to Oneindia Tamil

அபுஜா: முன்னாள் அமெரிக்க துணை அதிபர் டிக் செனி, ஹாலிபர்டன் நிறுவனத் தலைவராக இருந்தபோது லஞ்ச ஊழலில் ஈடுபட்டதாக நைஜீரிய நாட்டு ஊழல் ஒழிப்பு அமைப்பு குற்றம் சாட்டியுள்ளது.

240 மில்லியன் டாலர் லஞ்ச புகாரை விசாரிக்க செனி மீது பொருளாதாரம் மற்றும் நிதிக் குற்றக் கமிஷன் வழக்கு பதிவு செய்துள்ளது. இதையடுத்து அந்த விசாரணைக்காக நைஜீரியாவுக்கு அழைக்கப்படவுள்ளார் செனி.

இது குறித்து பொருளாதாரம் மற்றும் நிதிக் குற்றக் கமிஷன் செய்தித் தொடர்பாளர் பாபாபெமி கூறுகையில்,

போன்னித் தீவில் எல்பிஜி தொழிற்சாலை அமைக்க ஒரு நைஜீரிய அதிகாரிக்கு லஞ்சம் கொடுத்ததாக செனி மீது வழக்கு பதிவு செய்யப்பட்டுள்ளது. இதில் அமெரிக்காவைச் சேர்நத ஹாலிபர்டன் நிறுவனத்தின் நைஜிரிய கிளை நிறுவனத்திற்கு தொடர்புள்ளது.

நைஜீரியாவில் இந்த லஞ்சக் குற்றம் நடந்தபோது செனி அந்நிறுவனத்தின் தலைவராக இருந்துள்ளார். ஆனால் இந்த குற்றம் நடந்ததற்கு முன்பே அவர் தனது பதவியை ராஜினாமா செய்தது கண்டிபிடிக்கப்பட்டதையடுத்து இது தொடர்பாக அமெரிக்காவில் நடந்த வழக்கில் இருந்து அவர் விடுவிக்கப்பட்டார் என்று அவர் கூறினார்.

இந்த வார தொடக்கத்தில் இந்த வழக்கு தொடர்பாக அந்த எண்ணெய் நிறுவனத்தின் அதிகாரிகளிடம் விசாரணை நடத்தப்பட்டது. இதற்கு முன் அமெரிக்கா அவர்களிடம் விசசாரித்திருந்தது குறிப்பிடத்தக்கது.

ஹாலிபர்டன் நிறுவன ஊழியர்கள் 10 பேர் கைது செய்யப்பட்டு பின்னர் விடுவிக்கப்பட்டனர். எந்த நேரத்திலும் மீண்டும் விசாரணைக்கு அழைக்கலாம் என்பதால் அவர்களுக்கு நாட்டை விட்டு வெளியேறத் தடை விதிக்கப்பட்டுள்ளது. அவர்களின் பாஸ்போர்ட் உள்ளிடட் ஆவணங்கள் பறிமுதல் செய்யப்பட்டுள்ளன. இந்த வழக்கில் வெளிநாட்டவர் தவிர்த்து 10 நைஜீரியர்களும் கைது செய்யப்பட்டனர்.

கேபிஆர் மற்றும் ஹாலிபர்டன் ஆகிய இரு நிறுவனங்களும், போன்னி தீவில் உள்ள எல்பிஜி திட்டத்திற்கான ஒப்பந்தத்தை கைப்பற்ற நைஜீரிய அதிகாரிகளுக்கு 180 மில்லியன் டாலர் லஞ்சம் கொடுத்ததாக அமெரிக்க கோர்ட்டில் ஒத்துக் கொண்டன. மேலும் இந்த விவகாரத்தை முடிக்க 579 மில்லியன் டாலர் கொடுக்கவும் சம்மதித்தன. இந்த ஒப்பந்தத்தின் காலம் கடந்த 1994-ம் ஆண்டு முதல் 2004-ம் ஆண்டு வரை ஆகும்.

Published On December 8, 2010