எங்கள் அந்தஸ்து குறையவில்லை... இன்னும் AAA-தான்! - 'மண் ஒட்டாத' ஒபாமா

வாஷிங்டன்: கடன் தர வரிசையில் அமெரிக்கா ஒன்றும் சறுக்கவில்லை. நாங்கள் இன்னும் AAA நிலையில்தான் இருக்கிறோம். இப்போதைய நெருக்கடியை தீர்க்கும் அரசியல் உறுதி எங்களுக்கு உள்ளது, என்று சற்று கோபமாகவே அறிவித்துள்ளார் அமெரிக்க அதிபர் பாரக் ஒபாமா.

அமெரிக்காவின் பொருளாதார நெருக்கடி உலகையே ஆட வைத்துள்ளது. ஸ்டாண்டர்டு அண்ட் புவர் நிறுவனம் அமெரிக்காவின் கடன் தரவரிசையை AAAல்லிருந்து AA+க்கு கொண்டுவந்துவிட்டது.

இதனால் அமெரிக்காவின் பொருளாதாரம் எத்தனை பலவீனமாகியுள்ளது என்பது உலகுக்கு தெரிந்துவிட்டது. எனவே அமெரிக்காவுக்கு வரும் முதலீடுகள் பாதிக்கப்பட்டுள்ளன. சர்வதேச அளவிலான 'கடன் பெறுமதி' அமெரிக்காவுக்கு குறைந்துவிட்டது.

இன்னொரு பக்கம் ஐரோப்பிய பொருளாதாரம் ஒன்றுமில்லாமல் போய்விட்டது. அந்நிய செலாவணி வருமானத்துக்கு இந்த இரண்டு சர்வதேச பொருளாதார மண்டலங்களை மட்டுமே நம்பி இருந்த இந்தியா உள்ளிட்ட ஆசிய நாடுகள் இப்போது பெரும் தவிப்புக்கு உள்ளாகியுள்ளன.

அமெரிக்காவின் டவ் ஜோன்ஸ் 4.5 சதவீதமும், எஸ் & பி 5.7 சதவீதமும், நாஸ்டாக் 5.6 சதவீதமும் வீழ்ச்சியடைந்துள்ளது.

இந்த நிலை குறித்து இன்று முதல்முறையாக கருத்து தெரிவித்துள்ளார் பாரக் ஒபாமா. அவர் கூறுகையில், வரும் வாரங்களில் இந்த நெருக்கடி தீரும் என்று கூறியுள்ளார்.

மேலும் கூறுகையில், "அமெரிக்காவின் கடன் தரவரிசை பற்றி எந்த நிறுவனம் சொல்லியிருந்தாலும் உலகில் என்றைக்கும் AAA நாடாகவே அமெரிக்கா இருக்கும். சர்வதேச முதலீட்டாளர்கள் உலகிலேயே பாதுகாப்பான நாடாகக் கருதுவது அமெரிக்காவைத்தான்.

அமெரிக்காவின் இப்போதைய பிரச்சினைகள் பெரிய விஷயமே அல்ல. இவற்றை உடனடியாகவே தீர்த்து விடுவோம். கொஞ்சம் காமன்சென்ஸும் காம்ப்ரமைஸும் இருந்தால், அமெரிக்க பிரச்சினை ஒன்றுமே இல்லை என்பது புரிந்துவிடும்.

இந்த பிரச்சினைகளை சமாளிக்க மருத்துவ காப்பீடு, வரிச்சலுகைகள் போன்றவற்றில் சில சீர்த்திருத்தங்கள் செய்தாலே போதும். விரைவில் அதை செய்து முடிப்போம். எந்த திட்டமும், கொள்கையும் இல்லாத நாடா என்ன அமெரிக்கா?" என்று கேட்டுள்ளார்.

English summary

US President Barack Obama vowed on Monday that America would always be a "triple A country," fiercely defending US credit after a historic debt downgrade and saying the economy could be fixed with political will.