போக்குவரத்து கழக ஊழியர்களுக்கு அகவிலைப்படி உயர்வு - ஜெ. உத்தரவு

சென்னை: தமிழ்நாடு போக்குவரத்துக் கழகங்களில் பணிபுரியும் ஊழியர்களுக்கான அகவிலைப்படியை 58 சதவிகிதமாக உயர்த்தி முதல்வர் ஜெயலலிதா உத்தரவிட்டுள்ளார்.

இது குறித்து தமிழக அரசு வெளியிட்டுள்ள செய்திக்குறிப்பு:

மத்திய அரசு ஊழியர்களுக்கு இணையான அகவிலைப்படியை மாநில அரசு ஊழியர்களுக்கு வழங்கும் வகையில், மாநில அரசு ஊழியர்கள், ஆசிரியர்கள் மற்றும் ஓய்வூதியம் பெறுவோருக்கான அகவிலைப்படியை 51 சதவிகிதத்தில் இருந்து 58 சதவிகிதமாக 1.7.2011 முதல் உயர்த்தி வழங்கவும், அதற்கான நிலுவைத் தொகையை ரொக்கமாக வழங்கவும் கடந்த அக்டோபர் மாதம் நான் ஆணையிட்டேன்.

9 கோடி கூடுதல் செலவு

இதே போன்று, தமிழ் நாட்டில் இயங்கி வரும் எட்டு அரசு போக்குவரத்துக் கழகங்களில் பணிபுரியும் அலுவலர்கள், தொழில்நுட்பப் பணியாளர்கள் மற்றும் தொழிலாளர்கள் ஆகியோருக்கு வழங்கப்பட்டு வரும் அகவிலைப்படியையும்,

51 சதவிகிதத்திலிருந்து 58 சதவிகிதமாக 1.7.2011 முதல் உயர்த்தி வழங்க நான் தற்போது ஆணையிட்டுள்ளேன்.

இந்த உயர்த்தப்பட்ட அகவிலைப்படி நிலுவையின்றி ரொக்கமாக 1.7.2011 முதல் வழங்கப்படும். இந்த அகவிலைப்படி உயர்வு காரணமாக, அரசு போக்குவரத்துக் கழகங்களுக்குக் கூடுதலாக மாதம் ஒன்றுக்கு 9 கோடியே 15 இலட்சம் ரூபாய் செலவாகும்.

இந்த அகவிலைப்படி உயர்வின் மூலம், போக்குவரத்துக் கழகங்களில் பணிபுரியும் 1 லட்சத்து 19 ஆயிரத்து 261 அலுவலர்கள், பணியாளர்கள், தொழிலாளர்கள் பயன் பெறுவர் என்று தெரிவித்துள்ளார்.

English summary

Chief Minister Jayalaitha today announced 7% DA hike for employees of Tamil Nadu State Transport Corporation Ltd.