தேமுதிக அலுவலகத்தை இடிக்க நோட்டீஸ்: மதுரை மாநகராட்சிக்கு விஜயகாந்த் பதில்

மதுரை: மதுரை மேல ஆவணி மூல வீதியில் உள்ள 3 அடுக்கு தேமுதிக அலுவலக கட்டிடத்தை இடிக்கச் சொல்வதற்கு அரசியல் காழ்ப்புணர்ச்சி தான் காரணம் என்று தேமுதிக தலைவர் விஜயகாந்த் மதுரை மாநகராட்சிக்கு அளித்துள்ள பதலில் தெரிவித்துள்ளார்.

மதுரை மீனாட்சியம்மன் கோவிலை சுற்றி 1 கிமீ தூரத்திற்கு 9 மீட்டர் உயரத்திற்கு மேல் கட்டிடம் கட்டக்கூடாது என்று 1997ம் ஆண்டு தமிழக அரசு உத்தரவிட்டிருந்தது. ஆனால் அந்த உத்தரவை கண்டுகொள்ளாமல் கோவிலைச் சுற்றி பல உயரமான கட்டிடங்கள் கட்டப்பட்டுள்ளன. அவற்றையெல்லாம் இடிக்க மதுரை கலெக்டர் சகாயம் உத்தரவிட்டார்.

அதன்படி விதிகளை மீறி கட்டப்பட்ட 790 கட்டிடங்களை இடிக்க மதுரை மாநகராட்சி நோட்டீஸ் அனுப்பியது. மேல ஆவணி மூல வீதியில் உள்ள 3 அடுக்கு தேமுதிக கட்சி அலுவலகக் கட்டிடத்தையும் இடிக்குமாறு மதுரை மாநகராட்சி அக்கட்சியின் தலைவர் விஜயகாந்திற்கு கடந்த 15ம் தேதி நோட்டீஸ் அனுப்பியது.

இதற்கு விஜயகாந்த் சார்பில் அவரது வழக்கறிஞர்கள் பாண்டியன், சேவுகராஜா, காசிமாயன் ஆகியோர் மதுரை மாநகராட்சி கமிஷனிரடம் அளித்துள்ள பதிலில் கூறியிருப்பதாவது,

* எமது கட்சிக்காரர் (விஜயகாந்த்) மேல ஆவணி மூல வீதியில் உள்ள கட்டிடத்தை கடந்த 1987ம் ஆண்டு அதன் உரிமையாளர் சோலைராணி என்பவரிடம் இருந்து கிரையம் பெற்று அனுபவித்து வருகிறார். அதில் இருந்து இந்த கட்டிடம் கடந்த 1987ம் ஆண்டுக்கு முன்பே கட்டப்பட்டது என்றும், விஜயகாந்தால் கட்டப்பட்டதல்ல என்பதும் தெளிவாகிறது.

* மதுரை மாநகராட்சி அறிவிப்பில் காட்டப்பட்டுள்ள அரசாணை எண் 164, தேதி 15-06-1994 மற்றும் அரசாணை எண் 22 தேதி 30-01-1997 ஆகிய 2 அரசாணைகளுமே, விஜயகாந்த் கட்டிடத்தை கிரையம் செய்ததற்கு பின்பு பிறப்பிக்கபட்டதாகும். எனவே இந்த கட்டிடம் விதியை மீறி கட்டப்பட்டது என்று கூறுவது உள்நோக்கம் கொண்டதாகும்.

இந்த அரசாணை பிறப்பிக்கப்பட்ட பிறகும்கூட இதுவரை விஜயகாந்துக்கோ அல்லது இதுபோன்ற மற்ற நபர்களுக்கோ அல்லது பொதுவான முறையிலோ மாநகராட்சி நிர்வாகத்தால் எந்த தகவலும் கொடுக்கப்படவில்லை.

எனவே இது அரசியல் காழ்புணர்ச்சி காரணமாக கொடுக்கப்பட்ட அறிவிப்பாகவே தெரிகிறது. எனவே சட்டத்திற்கு முரணாக, விஜயகாந்துக்கு அனுப்பப்பட்டுள்ள இந்த நோட்டீசை உடனடியாக மாநகராட்சி திரும்ப பெற்றுக்கொள்ள வேண்டும்.

மாநகராட்சியின் நோட்டீசில் கூறியுள்ளபடி, விஜயகாந்த் கட்டிடத்தின் மீது நடவடிக்கை எடுக்க எந்த முகாந்திரமும் இல்லை. ஆனால் இதனை மீறி கட்டிடத்தின் மீது நடவடிக்கை ஏதும் மேற்கொண்டால் அதனை சட்டப்படி எதிர்கொள்ள தயார் என்று அதில் தெரிவிக்கப்பட்டுள்ளது.

English summary

Madurai corporation sent a notice to DMDK chief Vijayakanth asking him to demolish his party office in Madurai. Vijayakanth considers this move as a result of political vendetta.