யுஎஸ்: 2016 அதிபர் பதவிக்கு போட்டியிடுகிறார் ஹிலரி?
2008 ஆண்டு உட்கட்சி தேர்தலில் ஒபாமாவுக்கும், ஹிலரிக்கும் கடுமையான போட்டி நிலவியது. ஒபாமா அதிபர் ஆகிவிட்டார். ஹிலரியை தனது முக்கியமான அமைச்சர் ஆக்கி நட்புறவையும் வளர்த்துக் கொண்டார்.
ஹிலரியின் பணிகளுக்கு பிரத்தியேகமாக நன்றி செலுத்துவதற்காக, அவருடன் தொலைக்காட்சியில் ஒன்றாக தோன்றி ஒரு மணி நேரம் பேட்டி கொடுத்தார். அதில் அமெரிக்க மக்களின் முன்பாக நன்றி செலுத்த விரும்பியே இப்படி ஒரு ஏற்பாட்டை செய்தேன் என்றார்.
தவிர, அமெரிக்க மக்களுக்கு ஹிலரியை அடுத்த அதிபராக அடையாளம் காட்டும் முயற்சியாகவும் இந்த ஒரு மணி நேர சந்திப்பு அமைந்தது என்று அரசியல் நோக்கர்கள் கருத்து தெரிவித்துள்ளனர்.
ஹிலரி 2016 தேர்தலில் போட்டியிடுவதை அவரது கணவர் பில் க்ளிண்டனும் மிகவும் ஆர்வத்துடன் எதிர் நோக்குகிறார். அதிபர் ஒபாமாவின் ஆதரவும் ஹிலரிக்கே இருக்கும் என்று நம்பபடுகிறது.
அடுத்த இரு ஆண்டுகள் குடும்பத்துடன் செலவழித்து விட்டு, அதிபர் தேர்தலுக்கு ஹிலரி தயாராவார் என்றே பெரும்பான்மையான அரசியல் விமர்சகர்கள் கருதுகின்றனர். அரசுப் பதவியில் அமைச்சராக இருந்து கொண்டு தேர்தலில் போட்டியிட முடியாது என்பதால், பதவியிலிருந்து விலகியுள்ளார் என்றே ஜனநாயகக் கட்சியினரும் நம்பிக்கை தெரிவித்துள்ளனர்.
இந்த தேர்தலில் ஜனநாயகக் கட்சியின் வேட்பாளராக வாய்ப்புள்ளவர் என்று கருதப்படும் இன்னொருவர் மேரிலாண்ட் ஆளுநராக இருக்கும் மார்ட்டின் ஒமாலி.
மீண்டும் அதிபராக ஒபாமா பதவியேற்று சில நாட்களே ஆன நிலையில், 2016ல் யார் அதிபராவார் என்பதற்கான கேள்விகள் இப்போதே எழுந்துள்ளது.
Click it and Unblock the Notifications
Sign in with Google