மல்யுத்த வீராங்கனைகள், அதானி விவகாரம்.. அழுத்தமான மவுனம் ஏன்? பிரதமர் மோடி மீது காங். சரமாரி தாக்கு

பெங்களூர்: மன்கி பாத் வானொலி நிகழ்ச்சியில் உரையாற்றுகிற பிரதமர் மோடி, மல்யுத்த வீராங்கனைகளின் போராட்டம் குறித்தோ அதானி குழும முறைகேடுகள் குறித்தோ வாய் திறக்காமல் மவுனமாக இருப்பது ஏன்? என காங்கிரஸ் தலைவர்கள் சரமாரியாக கேள்வி எழுப்பி உள்ளனர்.

கர்நாடகா சட்டசபை தேர்தல் களத்தில் பிரதமர் மோடி இன்று பிரசாரம் செய்தார். காங்கிரஸ் தலைவர்களை மிக கடுமையாக தாக்கி பேசினார் பிரதமர் மோடி. பிரதமர் மோடி தமது பிரசாரத்தின் போது, காங்கிரஸின் சகாப்தம் முடிந்து போய்விட்ட ஒன்று. காங்கிரஸ் கட்சி பொய்யான வாக்குறுதிகளை அள்ளி அள்ளி வீசக் கூடும். ஆனால் அளித்த வாக்குறுதிகளை காங்கிரஸ் ஒருபோதும் நிறைவேற்றாது. மக்களுக்கு துரோகம் செய்யக் கூடிய கட்சி காங்கிரஸ். ஆனால் பாஜகவோ மக்களுக்கு அளித்த வாக்குறுதிகளை நிறைவேற்றக் கூடியது என்பதை கர்நாடகா வாக்காளர்கள் உணர்ந்து கொள்ள வேண்டும் என சாடினார்.

இதற்கு காங்கிரஸ் தலைவர்கள் பதிலடி தந்து வருகின்றனர். இது தொடர்பாக மூத்த காங்கிரஸ் தலைவர் ஜெய்ராம் ரமேஷ் கூறுகையில், மன்கிபாத் வானொலி நிகழ்ச்சியின் 100-வது எபிசோடில் பிரதமர் மோடி உரையாற்றுகிறார். ஆனால் அதானி, சீனா, பொருளாதார பிரச்சனைகள் விவகாரங்களில் கனத்த மவுனமாகிவிடுகிறார். டெல்லியில் மல்யுத்த வீராங்கனைகள் போராடுகிறார்களே.. பிரதமர் மோடி மவுனமாக இருப்பது ஏன் என்றார்.

கர்நாடகாவில் தேர்தல் பிரசாரம் செய்து வரும் காங்கிரஸ் பொதுச்செயலாளர் பிரியங்கா காந்தியும் பிரதமர் மோடியை கடுமையாக விமர்சித்தார். பிரியங்கா காந்தி தமது பிரசாரத்தில், கர்நாடகாவில் காங்கிரஸ் ஆட்சி அமைத்தால் அங்கன்வாடி பணியாளர்களுக்கான ஊதியம் இரு மடங்காக உயர்த்தப்படும். சமூக சுகாதார பணியாளர்களுக்கான ஊதியத்தையும் உயர்த்தி வழங்குவோம். ஓய்வு பெறும் அங்கன்வாடி ஊழியர்களுக்கு ரூ3 லட்சம் வழங்குவோம். கர்நாடகாவில் 40% கமிஷன் பெறுகிற ஊழலாட்சியை பாஜக நடத்திக் கொண்டிருக்கிறது. காங்கிரஸ் கட்சி தம்மை 91 முறை அவதூறாக, இழிவுபடுத்திவிட்டது என பிர்தமர் மோடி கூறியிருக்கிறார். பிரதமர் மோடி செய்த அவதூறுகளை பட்டியலிட்டுக் கொண்டே போனால் பல புத்தகங்களாக எழுதப்பட வேண்டியது இருக்கும். இந்த நாட்டின் பிரதமர் ஒருவர் தம்மை இழிவுபடுத்துகிறார்களே என பொதுமக்கள் முன்னிலையில் கதறுவதை இந்த தேசம் இப்போதுதான் பார்க்கிறது என்றார்.

English summary

Congress has slammed PM Modi Over silence on wrestlers' protest, Adani, China row.