பஞ்சாப் சட்டசபை தேர்தல்: காங். முதல்வர் வேட்பாளரை இன்று அறிவிக்கிறார் ராகுல்- சவுண்டு விடும் சித்து!

சண்டிகர்: பஞ்சாப் மாநில சட்டசபை தேர்தலுக்கான காங்கிரஸ் கட்சியின் முதல்வர் வேட்பாளரை அக்கட்சியின் மூத்த தலைவர் ராகுல் காந்தி அறிவிக்க உள்ளார். ஆனாலும் பஞ்சாப் மாநில காங்கிரஸ் கமிட்டித் தலைவர் நவ்ஜோத்சிங் சித்து தம்மையே முதல்வர் வேட்பாளராக அறிவிக்கலாம் என்கிற நம்பிக்கையில் கருத்துகளை தெரிவித்து வருகிறார்.

பஞ்சாப் மாநில சட்டசபைக்கு வரும் 20-ந் தேதி தேர்தல் நடைபெற உள்ளது. பஞ்சாப்பில் ஆட்சியைத் தக்க வைக்க ஆளும் காங்கிரஸ் தீவிர பிரசாரம் செய்து வருகிறது.

அதேநேரத்தில் டெல்லியைத் தொடர்ந்து பஞ்சாப்பில் ஆட்சி அமைப்போம் என்கிற நம்பிக்கையில் இருக்கிறது ஆம் ஆத்மி கட்சி. கருத்து கணிப்புகள் பெரும்பாலும் பஞ்சாப் மாநிலத்தில் தொங்கு சட்டசபைதான் அமையும் என்றே கூறுகின்றன. ஆம் ஆத்மி கட்சிக்கே அதிக இடங்கள் கிடைக்கும் என்பதும் கருத்து கணிப்புகளின் முடிவுகளாகும்.

ஆம் ஆத்மி முதல்வர் வேட்பாளர்

பஞ்சாப் தேர்தலில் ஆம் ஆத்மி கட்சியின் முதல்வர் வேட்பாளராக பக்வந்த் மான் அறிவிக்கப்பட்டுள்ளார். பொதுமக்களிடம் கருத்து கேட்டு பக்வந்த் மானை முதல்வர் வேட்பாளராக அறிவித்தது ஆம் ஆத்மி. ஆனால் காங்கிரஸ் கட்சியால் முதல்வர் வேட்பாளரை அறிவிக்க முடியாத அளவுக்கு உட்கட்சி மோதல் உச்சத்தில் உள்ளது.

காங். முதல்வர் வேட்பாளர்?

பஞ்சாப் முதல்வர் சரண்ஜித்சிங் சன்னி தாமே முதல்வர் வேட்பாளர் என்கிறார். ஆனால் 60 எம்.எல்.ஏக்கள் ஆதரவுடன் இருக்கும் நானே முதல்வர் வேட்பாளர் என அடம்பிடிக்கிறார் அம்மாநில காங்கிரஸ் கமிட்டித் தலைவர் நவ்ஜோத்சிங் சித்து. இதனால் முதல்வர் வேட்பாளரை காங்கிரஸ் மேலிடம் அறிவிக்காமல் இருந்து வருகிறது.

ராகுல் இன்று அறிவிப்பு

இதனிடையே பஞ்சாப் தேர்தலுக்காக லூதியானாவில் காங்கிரஸ் மூத்த தலைவர் ராகுல் காந்தி இன்று பிரசாரம் மேற்கொள்கிறார். லூதியானா பிரசாரக் கூட்டத்தில் முதல்வர் வேட்பாளரை ராகுல் காந்தி அறிவிக்க உள்ளார். இது அம்மாநில அரசியலில் பெரும் எதிர்பார்ப்பை ஏற்படுத்தி உள்ளது.

சவுண்டு விடும் சித்து

மேலும் பஞ்சாப் முதல்வர் வேட்பாளர் குறித்து கருத்து தெரிவித்த நவ்ஜோத்சிங் சித்து, எனக்கு சுரங்கங்களோ மதுபான தொழிற்சாலைகளோ எதுவும் இல்லை. என்னுடைய பஞ்சாப் மாடல் என்பது வளர்ச்சியை அடிப்படையாகக் கொண்டது. பஞ்சாப் மண்ணின் இளைஞர்களின் எதிர்காலத்தை மேம்படுத்தக் கூடியதாக இருக்கும். இம்மாநிலத்தின் 2 முதல்வர்கள் மாபியாக்களை வளர்த்துவிட்டிருந்தனர். இவற்றையெல்லாம் நான் முடிவுக்கு கொண்டு வருவேன் என முதல்வர் வேட்பாளர் கனவுடன் நம்பிக்கையில் பேட்டி கொடுத்து வருகிறார்.

English summary

Ahead of Punjab Assembly Election, Senior Congress leader Rahul Gandhi will declare the CM face today.