இந்தியாவின் உளவுத்துறைக்கு பல கோடிகளை பட்ஜெட்டில் கொட்டிய மத்திய அரசு.. பின்னணி என்ன

டெல்லி: இந்தியா தனது பாதுகாப்பில் அதிக கவனம் செலுத்த தொடங்கி உள்ளது. சீனா, பாகிஸ்தான், வங்கதேசம் என சுற்றிலும் இந்தியாவிற்கு எதிரான சூழல் நிலவுவதால், இந்தியாவின் உள்நாட்டுப் பாதுகாப்பு மற்றும் உளவு அமைப்பான 'இண்டெலிஜென்ஸ் பீரோ' (IB) அமைப்பிற்கு முன்னெப்போதும் இல்லாத வகையில் ரூ. 6,782.43 கோடியை மத்திய அரசு ஒதுக்கியுள்ளது. நவீன கால அச்சுறுத்தல்களை எதிர்கொள்ளும் வகையில், தொழில்நுட்ப ரீதியாக உளவுத்துறையை வலுப்படுத்துவதே இந்த அதிரடி நிதி உயர்வுக்கு முக்கிய காரணமாகக் கருதப்படுகிறது.

இந்த பட்ஜெட்டில் தொழில்நுட்ப உளவுத்துறைக்கு முன்னுரிமை அளிக்கப்பட்டுள்ளது.இதுவே இந்த பட்ஜெட்டின் மிக முக்கியமான அம்சம் ஆகும். உளவுத்துறையின் மூலதனச் செலவினம் கடந்த காலங்களில் வெறும் ரூ. 306.07 கோடியாக இருந்தது. இந்த நிதி, தற்போது ரூ. 2,549.54 கோடியாக பல மடங்கு மத்திய அரசால் உயர்த்தப்பட்டிருக்கிறது.

இந்தத் தொகை எதற்காகப் பயன்படுத்தப்படும்?

சைபர் உளவு, இணையவழி ஊடுருவல்களைக் கண்காணித்தல். தரவு பகுப்பாய்வு : தீவிரவாதத் திட்டங்களை முன்கூட்டியே கண்டறியும் கணினி மென்பொருள்கள். அதிநவீன கண்காணிப்பு: நிகழ்நேர அச்சுறுத்தல்களை மதிப்பிடும் கருவிகள் மற்றும் உள்கட்டமைப்பு வசதிகள்.

எல்லையில் பலப்படும் பாதுகாப்பு

எல்லைப் பகுதிகளில் சீனாவுடனான பதற்றம் நீடித்து வரும் சூழலில், எல்லையோர உள்கட்டமைப்பு திட்டங்களுக்காக ரூ. 5,266.51 கோடி தனி ஒதுக்கீடு செய்யப்பட்டுள்ளது. குறிப்பாக, சீனா எல்லையைப் பாதுகாக்கும் ITBP படைக்கு 21.3% கூடுதலாக நிதி வழங்கப்பட்டுள்ளது (ரூ. 11,324.08 கோடி).

துணை ராணுவப் படைகளுக்கான நிதிப் பங்கீடு

மத்திய ஆயுதக் காவல் படைகளுக்கு (CAPFs) ஒட்டுமொத்தமாக ரூ. 1,16,789.30 கோடி ஒதுக்கப்பட்டுள்ளது. இது கடந்த ஆண்டை விட 11.4% அதிகமாகும்.

பாதுகாப்புப் படைநிதி ஒதுக்கீடு

CRPF (மத்திய ரிசர்வ் போலீஸ்)₹38,517.93 கோடி, BSF (எல்லைப் பாதுகாப்பு படை)₹29,567.64 கோடி. CISF (தொழில்துறை பாதுகாப்பு) ₹15,973.85 கோடி

பன்முகத்தன்மை கொண்ட பாதுகாப்பு வியூகம்

மத்திய அரசு இந்த முறை வெறும் படைகளை அதிகரிப்பது மட்டுமல்லாமல், சமுதாய பாதுகாப்பிலும் இந்த பட்ஜெட் கவனம் செலுத்தியுள்ளது. பல்வேறு யுக்திகளை இந்த பட்ஜெட்டில் கையாண்டு உள்ளது.

பெண்கள் பாதுகாப்பு: பெண்களுக்கு எதிரான குற்றங்களைத் தடுக்க சிறப்புத் திட்டங்கள் வகுக்கப்பட்டிருக்கிறது.

தடயவியல் நவீனமயமாக்கல்: குற்றவாளிகளை அறிவியல்பூர்வமாகப் பிடிக்க தடயவியல் ஆய்வகங்கள் மேம்படுத்தப்படும்.

துடிப்பான கிராமங்கள் திட்டம்

இந்தியாவில் உள்ள பல்வேறு மாநிலங்களில் உள்ள எல்லைக் கிராமங்களில் மக்கள் குடியேற்றத்தை ஊக்குவித்து, அங்கேயே வசதிகளை ஏற்படுத்தித் தருவதன் மூலம் நாட்டின் எல்லையை வலுப்படுத்த முடியும் என்று மத்திய அரசு நம்புகிறது. மொத்தத்தில், இந்த பட்ஜெட் இந்தியாவின் உள்நாட்டுப் பாதுகாப்பை வெறும் ஆட்களைக் கொண்டு மட்டும் பாதுகாக்காமல், நவீன தொழில்நுட்பம் மற்றும் வலிமையான உள்கட்டமைப்புடன் ஒருங்கிணைக்க வழிவகை செய்திருக்கிறது என்று நிபுணர்கள் கருத்து தெரிவித்துள்ளனர்.

English summary

The central government has allocated an unprecedented ₹6,782.43 crore to India's domestic security and intelligence agency, the Intelligence Bureau (IB). This significant increase in funding is primarily attributed to the need to technologically strengthen the intelligence agency to counter modern-day threats.