8 மணிநேரம் NIA என்ன விசாரித்தது? சீமானிடம் விலாவாரியாக ஒப்புவித்த சாட்டை துரைமுருகன் கோஷ்டி!

சென்னை: தேசிய புலனாய்வு ஏஜென்சி (NIA, என்.ஐ.ஏ என்ஐஏ) அதிகாரிகள் தங்களிடம் 8 மணிநேரத்துக்கும் மேலாக என்னவெல்லாம் விசாரணை நடத்தியது என்பதை அக்கட்சியின் கொள்கை பரப்பு செயலாளர் சாட்டை துரைமுருகன், இளைஞர் பாசறை செயலாளர் இடும்பாவனம் கார்த்தி உள்ளிட்டோர் சீமானிடம் நேரில் விவரித்தனர்.

தடை செய்யப்பட்ட தமிழீழ விடுதலைப் புலிகள் இயக்கத்தை உயிர்ப்பிக்க முயற்சிப்பவர்களுடன் நாம் தமிழர் கட்சியினருக்கு தொடர்பு என்பது என்.ஐ.ஏ. சந்தேகம். இதனடிப்படையில் கடந்த 2-ந் தேதி தமிழ்நாடு முழுவதும் நாம் தமிழர் கட்சி நிர்வாகிகள் வீடுகளில் என்.ஐ.ஏ. அதிகாரிகள் சோதனை நடத்தினர்.

தங்களிடம் சிக்கிய சந்தேக நபர்களுக்கும் நாம் தமிழர் கட்சி நிர்வாகிகளுக்குமான தொடர்புகள் குறித்தும் இந்த சோதனையின் போது விசாரணைகளை நடத்தினர் என்.ஐ.ஏ. அதிகாரிகள். இச்சோதனைகளில் செல்போன்கள், லேப்டாகள், புத்தகங்கள் பறிமுதல் செய்யப்பட்டன. பின்னர் நாம் தமிழர் கட்சி நிர்வாகிகளான சாட்டை துரைமுருகன், இடும்பாவனம் கார்த்தி உள்ளிட்ட பலரையும் என்.ஐ.ஏ. அதிகாரிகள் விசாரணைக்காக அழைத்திருந்தனர். கடந்த 2 நாட்களாக இந்த விசாரணைகள் நடைபெற்றன.

என்.ஐ.ஏ. விசாரணை தமது தொடர்பாக தமது எக்ஸ் பக்கத்தில் பதிவிட்ட இடும்பாவனம் கார்த்தி, நேற்று நடைபெற்ற 8 மணி நேர NIA விசாரணையில் ஒரு நிமிடம்கூட நிதி தொடர்பாகக் கேள்வி கேட்கப்படவில்லை. ஒரு கேள்விகூட நிதி தொடர்பானது இல்லை. வழக்கும், விசாரணையும் நிதி தொடர்பானது இல்லை. நேற்று காலை 10.30 மணிக்கு உள்ளே சென்று, மாலை 6.15 க்கு வெளியே வந்துவிட்டோம். இன்னும் சொல்லப்போனால், விசாரணையில் எங்களில் யாரையும் குற்றஞ்சாட்டவில்லை. சாட்சி எனும் அடிப்படையில் தெரிந்தவற்றை கூறவே சொன்னார்கள் என பதிவிட்டிருந்தார்.

இதனைத் தொடர்ந்து இன்று சாட்டை துரைமுருகன் தலைமையில் இடும்பாவனம் கார்த்தி உட்பட என்.ஐ.ஏ. விசாரணைக்கு ஆஜரான நாம் தமிழர் கட்சி நிர்வாகிகள் சென்னையில் அக்கட்சியின் தலைமை ஒருங்கிணைப்பாளர் சீமானை நேரில் சந்தித்தனர். இச்சந்திப்பின் போது என்.ஐ.ஏ. அதிகாரிகள் என்னவெல்லாம் விசாரித்தார்கள்? கேட்ட கேள்விகள் என்ன? அதற்கு தாங்கள் கொடுத்த பதில் என்ன என்பதையெல்லாம் விவரித்தனர். சீமானுடனான சந்திப்பு படங்களை சாட்டை துரைமுருகன் தமது சமூக வலைதளப் பக்கங்களில் வெளியிட்டுள்ளார்.

English summary

After NIA Probe, Naam Tamilar Functionaries met Party Chief Seeman.