Annamalai: அதிமுக அலுவலகத்தில் அண்ணாமலையை காணோமே! ஆதரவாளர்கள் அப்செட்! எடப்பாடி கண்டிஷனா?

சென்னை: தமிழக சட்டமன்றத் தேர்தலுக்கான அதிமுக - பாஜக கூட்டணி உறுதி செய்யப்பட்டு, தொகுதிப் பங்கீடு குறித்த அதிகாரப்பூர்வ அறிவிப்பு இன்று வெளியானது. சென்னை ராயப்பேட்டையில் உள்ள அதிமுக தலைமை அலுவலகத்தில் நடைபெற்ற இந்த முக்கிய நிகழ்வில், தமிழக பாஜக முன்னாள் தலைவர் அண்ணாமலை கலந்து கொள்ளாதது பெரும் பேசுபொருளாகியுள்ளது.

தமிழக சட்டசபை தேர்தல் வரும் ஏப்ரல் 23 ஆம் தேதி நடைபெறுகிறது. இந்த தேர்தலில் அதிமுக கூட்டணியில் பாஜக, அன்புமணி பாமக, அமமுக, புதிய நீதிக் கட்சி, ஐஜேகே, தமமுக உள்ளிட்ட கட்சிகள் உள்ளன.

இந்த நிலையில் அதிமுகவில் தொகுதி பங்கீடு ஒப்பந்தம் இன்று கையெழுத்தானது. அதில் பாஜக, பாமக, அமமுக ஆகிய கட்சிகளுக்கு தொகுதிகளின் எண்ணிக்கை ஒதுக்கப்பட்டுள்ளன.

பியூஷ் கோயல் முன்னிலையில் ஒப்பந்தம்

மத்திய அமைச்சர் பியூஷ் கோயல் மற்றும் அதிமுக பொதுச்செயலாளர் எடப்பாடி பழனிசாமி ஆகியோர் முன்னிலையில் இந்தத் தொகுதிப் பங்கீடு ஒப்பந்தம் கையெழுத்தானது. இதன்படி பாஜகவிற்கு 27 இடங்கள் ஒதுக்கப்பட்டுள்ளன. இந்த நிகழ்வில் மத்திய இணை அமைச்சர் எல். முருகன், முன்னாள் ஆளுநர் தமிழிசை சவுந்திரராஜன் மற்றும் மாநில மேலிடப் பொறுப்பாளர்கள் கலந்து கொண்டனர். ஆனால், கட்சியின் முன்னாள் மாநிலத் தலைவரான அண்ணாமலை இதில் இடம்பெறவில்லை.

அண்ணாமலை தற்போது பாஜகவில் எந்த பதவியில் இல்லாவிட்டாலும் அவருக்கு பல்வேறு தருணங்களில் பாஜக தலைமை முக்கியத்துவம் கொடுத்து வந்ததாக சொல்லப்படுகிறது. அதிமுகவுடன் கூட்டணி என்ற அறிவிப்பின் போது கூட அண்ணாமலை இருந்தார்.

பாஜக தலைமை அண்ணாமலையை திட்டமிட்டே இந்த தொகுதி பங்கீடு ஒப்பந்த கையெழுத்தின் போது ஒதுக்கியதா என்ற கேள்வி எழுந்தது.

ஏன் இந்த தவிர்ப்பு? - அரசியல் நிபுணர்களின் பார்வை

அண்ணாமலை இந்த நிகழ்வில் பங்கேற்காததற்குப் பின்னால் மூன்று முக்கிய காரணங்கள் இருக்கலாம் என அரசியல் விமர்சகர்கள் கருதுகின்றனர்.

டெல்லி மேலிடத்தின் நேரடித் தலையீடு: அதிமுகவுடன் கூட்டணி அமைப்பதில் அண்ணாமலைக்கு ஆரம்பத்திலிருந்தே உடன்பாடு இல்லை எனக் கூறப்படுகிறது. எனவே, இந்த ஒப்பந்தத்தை டெல்லி மேலிடத்தை சேர்ந்த பியூஷ் கோயல் மற்றும் எல். முருகன் ஆகியோரே முன்னின்று நடத்தியுள்ளனர்.

பிரிந்து கிடக்கும் நிர்வாகிகள்: அதிமுக தலைமையுடன் அண்ணாமலைக்கு நிலவி வந்த நேரடி மோதல் போக்கு காரணமாக, அவர் முன்னிலையில் ஒப்பந்தம் கையெழுத்தானால் அது தொண்டர்களிடையே தவறான செய்தியைத் தரும் என இரு தரப்பும் கருதியிருக்கலாம்.

தனிப்பட்ட சுற்றுப்பயணம்: அண்ணாமலை தற்போது தனது தேர்தல் பரப்புரை மற்றும் கட்சியின் மற்ற பணிகளுக்காக வெளியூரில் இருப்பதாக பாஜக தரப்பில் விளக்கமளிக்கப்பட்டுள்ளது. இருப்பினும், இவ்வளவு முக்கியமான கூட்டணி அறிவிப்பில் அவர் இல்லாதது அவரது அதிருப்தியையே காட்டுவதாகப் பலரும் கருதுகின்றனர்.

அதிமுகவின் நிலைப்பாடு: எடப்பாடி பழனிசாமி தரப்பு அண்ணாமலையைத் தவிர்த்துவிட்டு நேரடியாக டெல்லி மேலிடத்துடன் பேசி இடங்களை முடித்திருப்பது, கூட்டணியில் அதிமுகவின் கை ஓங்கியிருப்பதை உறுதிப்படுத்துகிறது. 27 இடங்களை ஒதுக்கியுள்ள நிலையில், அண்ணாமலையின் ஆதரவாளர்களுக்குப் பதில் மூத்த நிர்வாகிகளுக்கே அதிக இடங்கள் கிடைக்க வாய்ப்புள்ளதாகத் தெரிகிறது.

இந்த அதிரடி மாற்றங்கள் வரும் நாட்களில் தமிழக பாஜகவிற்குள் எந்த மாதிரியான தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.

English summary

The AIADMK–BJP alliance for the Tamil Nadu Assembly elections has been officially confirmed, with the seat-sharing announcement released today at the party headquarters in Royapettah, Chennai. However, the absence of K. Annamalai, former state BJP president, at the key event has triggered widespread speculation and political discussion.