அதிமுகவை இழுத்து மூடிவிட்டு தவெகவுடன் இணையுங்கள்! தூது அனுப்பிய விஜய்.. கலக்கத்தில் எடப்பாடி டீம்
சென்னை: 2026 சட்டமன்றத் தேர்தல் முடிவுகளுக்குப் பிறகு, தமிழக அரசியல் களம் முன்னெப்போதும் இல்லாத வகையில் ஒரு பெரும் புயலைச் சந்தித்து வருகிறது. புதிதாக ஆட்சியைக் கைப்பற்றியுள்ள தமிழக வெற்றிக் கழகம் (தவெக), பிரதான எதிர்க்கட்சி அந்தஸ்தை இழந்த அஇஅதிமுக-வை முற்றிலுமாக விழுங்குவதற்கான அரசியல் வியூகங்களை ரகசியமாக வகுத்து வருவதாகத் தகவல்கள் வெளியாகியுள்ளன. இதன் உச்சகட்டமாக, "அதிமுக-விற்கு இனி எதிர்காலம் இல்லை; எனவே கட்சியை தவெக-வுடன் இணைத்துவிடுங்கள்" என்று தவெக-வின் டாப் தலைவர்கள் அதிமுக தலைமைக்கு ரகசிய 'மெசேஜ்களை' அனுப்பியிருப்பது கோட்டை வட்டாரத்தில் பெரும் அதிர்வலைகளை ஏற்படுத்தியுள்ளது.
ரகசியமாகப் பறந்த தூது: தவெக-வின் வியூகம் என்ன?
தேர்தல் தோல்விக்குப் பிறகு அதிமுக-வில் இருந்து முன்னாள் அமைச்சர்கள், தற்போதைய எம்.எல்.ஏ-க்கள் எனப் பல விக்கெட்டுகள் தவெக-வை நோக்கி அடுத்தடுத்து சரிந்து வருகின்றன. இந்தச் சூழலைப் பயன்படுத்திக் கொள்ள நினைக்கும் தவெக தலைமை, மிக ரகசியமான முறையில் அதிமுக-வின் முக்கிய நிர்வாகிகளைத் தொடர்பு கொண்டு பேசியதாகக் கூறப்படுகிறது.
எம்.ஜி.ஆர், ஜெயலலிதா காலத்து அதிமுக வேறு; இப்போது இருக்கும் அதிமுக வேறு. அடுத்தடுத்து தேர்தல் தோல்விகளைச் சந்தித்து வரும் அதிமுக-விற்கு இனி தமிழக அரசியலில் எதிர்காலம் கிடையாது. எனவே, இரட்டை இலை தொண்டர்களையும், எஞ்சியிருக்கும் நிர்வாகிகளையும் தவெக-வுடன் இணைப்பதே புத்திசாலித்தனம். கட்சியை முற்றிலுமாகத் தவெக-வுடன் அதிகாரப்பூர்வமாக இணைத்து விடுங்கள்" என்ற ஒரு அதிரடி செய்தியை தவெக-வின் டாப் தலைவர்கள் அதிமுக-வின் இரண்டாம் கட்டத் தலைவர்கள் மூலமாக எடப்பாடி பழனிசாமிக்குத் தூதாக அனுப்பியுள்ளனர்.
தவெக-வில் இணையத் துடிக்கும் அதிமுக தலைவர்கள்!
தேர்தல் முடிந்து ஒரு மாதமே ஆன நிலையில், அதிமுக-வின் வாக்கு வங்கி பெருமளவில் தவெக-வை நோக்கி நகர்ந்திருப்பதை நிர்வாகிகள் உணர்ந்துள்ளனர். இதனால், மாவட்டச் செயலாளர்கள், முன்னாள் எம்.பி-க்கள் மற்றும் எஞ்சியிருக்கும் எம்.எல்.ஏ-க்களில் கணிசமான ஒரு தரப்பினர், தவெக-வின் இந்த இணைப்புக் கொள்கைக்குச் சாதகமாகவே இருப்பதாக அரசியல் உள்வட்டாரங்கள் தெரிவிக்கின்றன.
"கட்சியைத் தனியாக நடத்திக் கரைந்து போவதை விட, தவெக-வுடன் இணைந்துவிட்டால் உள்ளாட்சித் தேர்தலிலும், வரும் காலங்களிலும் தங்களுக்குப் பாதுகாப்பான அரசியல் எதிர்காலம் கிடைக்கும்" என்று பல மூத்த தலைவர்களே தங்களுக்குள் விவாதிக்கத் தொடங்கியுள்ளனர். அதிமுக-வின் அடிமட்டத் தொண்டர்களில் ஒரு பெரும் பகுதியினர் ஏற்கனவே தவெக-வின் பக்கமே சாய்ந்துவிட்டதாக தவெக அமைச்சர்களும் பொதுவெளியில் பேசி வருவது அதிமுக தலைமைக்கு கூடுதல் அழுத்தத்தை ஏற்படுத்தியுள்ளது.
எடப்பாடி பழனிசாமி ஏற்பாரா? முட்டுக்கட்டை போடும் இபிஎஸ் கேம்ப்!
தவெக என்னதான் ரகசிய தூது அனுப்பினாலும், பல தலைவர்கள் அதற்குச் சாதகமாக இருந்தாலும், அதிமுக-வை தவெக-வுடன் இணைக்கும் திட்டம் தற்போதைக்கு நடக்க வாய்ப்பே இல்லை என்று அரசியல் விமர்சகர்கள் திட்டவட்டமாகக் கூறுகின்றனர். இதற்குப் பிரதான முட்டுக்கட்டையாக இருப்பது அதிமுக பொதுச்செயலாளர் எடப்பாடி பழனிசாமி தான்.
கட்சியின் உச்சகட்டப் பொறுப்பில் இருக்கும் எடப்பாடி பழனிசாமி, ஐம்பது ஆண்டுகால பாரம்பரியமிக்க, கோடிக்கணக்கான தொண்டர்களைக் கொண்ட ஒரு திராவிட இயக்கத்தை மற்றொரு புதிய கட்சியுடன் இணைப்பதை எக்காரணத்தைக் கொண்டும் ஏற்றுக்கொள்ள மாட்டார் என்று அவருக்கு நெருக்கமான வட்டாரங்கள் தெரிவிக்கின்றன. "அதிமுக பல சோதனைகளைக் கடந்து வந்த இயக்கம். தற்காலிகத் தொய்வைக் காட்டி, கட்சியை இழுத்து மூடச் சொல்வதை எடப்பாடி பழனிசாமி ஒருபோதும் அனுமதிக்க மாட்டார். எத்தனை பேர் தவெக-விற்கு ஓடினாலும், கட்சிக் கட்டமைப்பை மீட்க அவர் தீவிரமாகப் போராடுவார்" என்று இபிஎஸ் ஆதரவாளர்கள் கொதிக்கின்றனர்.
திராவிட அரசியலின் அடுத்த கட்டம்!
அதிமுக-வை முற்றிலுமாகத் தன்வசப்படுத்தி, தமிழகத்தில் திமுக-விற்கு எதிரான ஒரே மாற்று சக்தியாகத் தன்னை நிலைநிறுத்திக் கொள்ள தவெக துடிக்கிறது. ஆனால், எடப்பாடி பழனிசாமியின் பிடிவாதமும், கட்சியின் அசைக்க முடியாத சில அடிப்படைக் கட்டமைப்புகளும் தவெக-வின் இந்த 'மெகா இணைப்பு' திட்டத்திற்குப் பெரும் முட்டுகட்டையாக விளங்குகின்றன. தவெக-வின் இந்த ரகசிய ஃபீலர்களால் அதிமுக-வில் மேலும் பல தலைவர்கள் அதிருப்தியடைந்து தவெக-வில் இணையக் கூடுமே தவிர, ஒட்டுமொத்தக் கட்சி இணைப்பிற்கு எடப்பாடி பழனிசாமி சம்மதிக்க மாட்டார் என்பதே தற்போதைய அரசியல் நிலவரம். இந்த மோதலின் அடுத்தகட்ட நகர்வு, வரவிருக்கும் உள்ளாட்சித் தேர்தலில் இன்னும் தெளிவாகத் தெரியும் என எதிர்பார்க்கப்படுகிறது.
Click it and Unblock the Notifications
Sign in with Google