அண்ணாமலைக்கு பதவியா?.. பாஜகவில் உள்குத்து.. எஸ்.ஆர். சேகர் போட்ட ட்வீட்டால் சர்ச்சை

Published: Tuesday, May 3, 2022, 17:27 [IST]

Subscribe to Oneindia Tamil

சென்னை: தமிழக பாஜக நிர்வாகி எஸ் ஆர் சேகரின் ட்வீட்டை பார்த்தால் தமிழக பாஜக தலைவர் அண்ணாமலைக்கு பதவி தர போகிறார்கள் என்பது தெரிகிறது.

தமிழகத்தில் அதிமுகவுக்கு மாற்று பாஜகதான் என பாஜக தலைவர் அண்ணாமலை முதல் பெரும்பாலான தலைவர்கள் கூறி வருகிறார்கள். மேலும் திமுக வெர்சஸ் பாஜக என்ற சூழலை உருவாக்கவும் முயற்சித்து வருகிறார்கள்.

நீட் தேர்வு, ஆளுநர் விவகாரம் தொடங்கி பல்வேறு விவகாரங்களில் திமுக- பாஜக இடையே கருத்து மோதல் ஏற்பட்டுள்ளது. திமுகவின் குற்றச்சாட்டுகளுக்கு பாஜக பதில் அளிப்பதும், பாஜகவின் குற்றச்சாட்டுகளுக்கு திமுக பதிலடி கொடுப்பதும் என இருக்கிறது.

பாஜக தலைவர்

இந்த நிலையில் தமிழக பாஜக தலைவர் அண்ணாமலையை தெலுங்கானாவில் சிங்கமலை என அழைக்கும் அளவுக்கு அவருக்கான டிமான்ட் உள்ளது. எங்கு பார்த்தாலும் தமிழக அண்ணாமலை பற்றி மற்ற மாநில பாஜக தலைவர்கள் புகழாரம் சூட்டுகிறார்கள். இந்த நிலையில்தான் அண்ணாமலை இலங்கை சென்றுள்ளார்.

யாழ்ப்பாணம்

அவர் அங்கு யாழ்ப்பாணம் சிறையில் உள்ள 12 மீனவர்களை சந்தித்து ஆறுதல் கூறினார். 3 நாட்கள் பயணமாக இலங்கை சென்ற அண்ணாமலை கொழும்புவிலிருந்து 182 கி.மீ. தூரத்தில் இருக்கும் பழமையான சீதையம்மன் கோயிலுக்கு சென்று வழிபட்டார். யாழ்ப்பாணத்தில் தமிழர்களின் நிலைமைகளை நேரில் பார்வையிட்டார்.

இலங்கை தமிழர்கள்

இந்த நிலையில் அண்ணாமலை இலங்கை தமிழர்களின் தலைவரான விக்னேஸ்வரனை சந்தித்து பேசியுள்ளார். இது தொடர்பான புகைப்படம் வெளியானது. இந்த புகைப்படத்தை பாஜக பொருளாளர் எஸ் ஆர் சேகர் தனது ட்விட்டர் பக்கத்தில் ஒரு கருத்தை பதிவிட்டுள்ளார். அதில் இன்று "ராஜ முத்திரை " இல்லாத சந்திப்பு, விரைவில் "அசோக முத்திரையுடன் " சந்திப்பு. இலங்கை தமிழர் தலைவர் ஐயா விக்னேஸ்வரனுடன் இளைய தலைவர் அண்ணாமலை என ட்வீட் போட்டுள்ளார்.

அசோக முத்திரை

அசோக முத்திரை என்றால் அரசு பதவிகள் கொடுத்தால் மட்டுமே அதை பயன்படுத்த முடியும். அமைச்சர்கள், எம்எல்ஏக்கள், எம்பிக்கள், ஆளுநர்கள் உள்ளிட்ட மக்கள் பிரதிநிதிகள் இந்த அசோக முத்திரையுடன் கூடிய தேசியக் கொடியை தங்களது வாகனத்தில் பொறுத்திக் கொள்வர். அப்படியென்றால் அண்ணாமலைக்கு மாநிலங்களவை எம்பி பதவி கொடுக்கப்படுகிறதா என்ற கேள்வி எழுந்துள்ளது.

தமிழக பாஜக தலைவராக இருந்த எல் முருகன்

ஏற்கெனவே தமிழக பாஜக தலைவராக இருந்த எல் முருகன் எம்பியாகி அமைச்சராகியுள்ளார். அவரை போல் அண்ணாமலையும் மாநிலங்களவை எம்பியாக்கப்பட்டு மத்திய அமைச்சரவையில் சேர்க்கப்படுகிறாரா என்ற சந்தேகம் எழுந்துள்ளது. இல்லாவிட்டால் இல கணேசன் மணிப்பூர் மாநிலத்தின் ஆளுநராகவும் தமிழிசை தெலுங்கானா ஆளுநராகவும் புதுவை துணை நிலை ஆளுநராக உள்ளது போல் அண்ணாமலைக்கு ஆளுநர் பதவி ஏதேனும் கொடுக்கப்படுகிறதா என தெரியவில்லை. ஆனால் எஸ் ஆர் சேகரின் ட்வீட்டை பார்த்தால் ஏதோ ஒரு பதவி கன்பார்ம் என நெட்டிசன்கள் கருத்து தெரிவித்து வருகிறார்கள்.

Published On May 3, 2022