ஒரே கூட்டணி, தலைமையை முடிவு செய்துவிட்டு.. ஒரே நாடு ஒரே தேர்தலை எதிர்க்கலாமா?.. எஸ்ஆர் சேகர் கேள்வி

Updated: Saturday, December 14, 2024, 14:33 [IST]

Subscribe to Oneindia Tamil

சென்னை: ஒரே கூட்டணி ஒரே தலைமையை முடிவு செய்துவிட்டு ஒரே நாடு ஒரே தேர்தலை எதிர்க்கலாமா என்று பாஜக மாநிலப் பொருளாளர் எஸ்.ஆர்.சேகர் கேள்வி எழுப்பியுள்ளார்.

இதுகுறித்து பாஜக மாநில பொருளாளர் எஸ்.ஆர்.சேகர் கூறியுள்ளதாவது: அரசமைப்பு சாசனம் ஏற்றுக்கொள்ளப்பட்ட 75 ஆவது ஆண்டில் பாராளுமன்றத்தில் நடந்த சிறப்பு விவாதத்தில் இண்டி கூட்டணியின் முகத்திரை கிழிக்கப்பட்டதில் இருந்து அவர்களின் பதற்றம் வெளிப்பட தொடங்கியுள்ளது. ஒரே நாடு ஒரே தேர்தல் அமல்படுத்தப்பட்டால் மாநிலக் கட்சிகளின் குரல்கள் நசுக்கப்படும் என்று கூறுகிறார் ஸ்டாலின்.

கடந்த 20 வருடங்களாக ஒடிசாவில் பாராளுமன்ற தேர்தலும் சட்டமன்றத் தேர்தலும் ஒன்றாகத்தான் நடக்கிறது. இந்த முறைதான் மத்தியில் வெற்றி பெற்ற கட்சி, மாநிலத்திலும் ஆட்சி அமைக்கிறது. அண்டை மாநிலமான ஆந்திராவில் 2019 ஒரே சமயத்தில் தானே பாராளுமன்றத்துக்கும் சட்டமன்றத்துக்கும் தேர்தல் நடந்தது?. அதில் என்ன, மத்தியில் வெற்றி பெற்ற கட்சியே மாநிலத்தில் ஆட்சியைப் பிடித்துவிட்டதா?.

கும்மிடிப்பூண்டி தாண்டினால் ஒரு உலகம் இருக்கிறது என்று புரியாத ஸ்டாலின் அவர்களுக்கு, 1996 இல் நடந்த தமிழக சட்டமன்ற தேர்தல் முடிவுகளையும், இந்திய பாராளுமன்ற தேர்தல் முடிவுகளையும் ஒப்பிட்டு பார்த்திருந்தாலே போதுமானதாக இருந்திருக்கும். ஒருவேளை, ஒவ்வொரு மாநிலத்திலும் ஒவ்வொரு வகையான கூட்டணியை அமைத்துக் கொண்டிருக்கும் இண்டி கூட்டணி கட்சிகளுக்கு, ஒரே நாடு ஒரே தேர்தல் என்றால் எத்தகைய கூட்டணி அமைக்க வேண்டும் என்ற குழப்பம் ஏற்படும் என்பதால் எதிர்க்கிறாரோ என்னவோ?.

இண்டி கூட்டணிக்கு தலைமை தாங்க காங்கிரசுக்கு திறமை இல்லை என்ற குரல் இப்பொழுதே அந்த கூட்டணிக்குள் எழ ஆரம்பித்துவிட்டது. பார்டர் விட்டு பார்டர் தாண்டினால் கூட்டணியில் டிசைனும் மாறிக்கொண்டிருக்கிறது. ஒரே நாடு ஒரே தேர்தல் என்று வந்து விட்டால் எந்த டிசைனில் கூட்டணி அமைக்க வேண்டும் என்ற குழப்பம் இருக்கும் என்பதால், இண்டி கூட்டணியினர் இந்த மகத்தான திட்டத்தை எதிர்ப்பதை புரிந்து கொள்ள முடிகிறது.

ஒவ்வொரு சாமானிய மனிதனும் தேசத்திற்கு செலுத்தும் வரிப் பணத்தை வீணாக்கக்கூடாது என்று நோக்கத்தில் கொண்டுவரப்படும் இந்த உன்னத திட்டத்தை முழு மனதோடு வரவேற்கிறேன் என்று தெரிவித்துள்ளார்.