போய் வரவா.. இன்றோடு விடைபெறுகிறது மழை! நாளை முதல் வறண்ட வானிலைதான் - ரெடியாகும் சம்மர் வெயில்
சென்னை: தமிழ்நாட்டில் இன்று மழைக்கு வாய்ப்பு இருப்பதாக தெரிவித்து இருக்கும் சென்னை வானிலை ஆய்வு மையம், அடுத்தடுத்த நாட்களில் தமிழ்நாட்டின் வானிலை எவ்வாறு இருக்கும் என்ற 6 நாள் விபரத்தை வெளியிட்டு இருக்கிறது. எப்போதெல்லாம் மழை பெய்யும், வெயில் எப்படி இருக்கும் என்ற விரிவான விபரத்தை பார்ப்போம்.
சென்னை வானிலை ஆய்வு மையம் பிப்ரவரி 27 ஆம் தேதி முதல் மார்ச் 4 ஆம் தேதி வரையிலான வானிலை அறிக்கையை வெளியிட்டு இருக்கிறது. அதில் குறிப்பிடப்பட்டு இருப்பதாவது, "கிழக்கு திசை காற்றின் வேக மாறுபாடு காரணமாக, பிப்ரவரி 27 ஆம் தேதியான இன்று தமிழக கடலோரப் பகுதிகளில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்ய வாய்ப்பு உள்ளது. தமிழக உள் மாவட்டங்களில் வறண்ட வானிலை நிலவக் கூடும். பிப்ரவரி 28 ஆம் தேதி முதல் மார்ச் 4 ஆம் தேதி வரை: தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.
சென்னை மற்றும் புறநகர் பகுதிகளுக்கான வானிலை முன்னறிவிப்பு: அடுத்த 48 மணி நேரத்திற்கு வானம் ஓரளவு மேக மூட்டத்துடன் காணப்படும். அதிகபட்ச வெப்ப நிலை 32 - 33 டிகிரி செல்சியஸை ஒட்டியும், குறைந்தபட்ச வெப்ப நிலை 25 டிகிரி செல்சியஸை ஒட்டியும் இருக்கக் கூடும். கடந்த 24 மணி நேரத்தில் பதிவான மழை அளவு (சென்டி மீட்டரில்): நாலுமுக்கு (திருநெல்வேலி) 1.
மீனவர்களுக்கான எச்சரிக்கை: தமிழக கடலோரப்பகுதிகளில் பிப்ரவரி 27 ஆம் தேதி மற்றும் பிப்ரவரி 28 ஆம் தேதி மன்னார் வளைகுடா மற்றும் அதனை ஒட்டிய குமரிக் கடல் பகுதிகள், தென் தமிழக கடலோரப் பகுதிகளில் சூறாவளிக் காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 65 கிலோ மீட்டர் வேகத்திலும் வீசக் கூடும்.
மேற்குறிப்பிட்ட நாட்களில் மீனவர்கள் இந்த பகுதிகளுக்கு செல்ல வேண்டாம் என்று அறிவுறுத்த படுகிறார்கள். மேலும் விவரங்களுக்கு: mausam.imd.gov.in/chennai இணையதளத்தை காணவும்." என்று குறிப்பிடப்பட்டு உள்ளது.
Click it and Unblock the Notifications
Sign in with Google