பதறடித்த பங்காளிஸ்.. உலகம் முழுக்க தங்க மார்க்கெட் கதறும் நேரத்தில்.. சீனா - இந்தியா கூட்டாக சம்பவம்

சென்னை: உலக அளவில் பொருளாதார நிலையற்றத்தன்மை மற்றும் பணவீக்க அச்சங்களுக்கு மத்தியில், தங்கத்தின் மீதான உலகளாவிய தேவை அதிகரித்து வருகிறது. இந்தச் சூழலில், பல்வேறு நாடுகளின் மத்திய வங்கிகள் தங்கள் தங்க இருப்பை கணிசமாக உயர்த்தி வருகின்றன. குறிப்பாக, சீனா மற்றும் இந்தியா ஆகிய நாடுகள் தங்க இருப்பு அதிகரிப்பில் முன்னணியில் இருக்கின்றன. இரண்டு நாடுகளும் தங்கத்தை வாங்கி குவித்து வருகின்றன.

சீனாவின் தங்க இருப்பு, அக்டோபர் 8, 2025 நிலவரப்படி 2,298.5 டன்களாக உயர்ந்துள்ளது. இந்திய ரிசர்வ் வங்கியும் தனது தங்க இருப்பை தொடர்ந்து அதிகரித்து வருகிறது. அக்டோபர் 8, 2025 நிலவரப்படி, இந்தியாவின் தங்க இருப்பு 880 டன்களாக பதிவாகியுள்ளது.

தங்கம் ஒரு பாதுகாப்பான முதலீடாக கருதப்படுகிறது. முன்பு ஒரு பவுன் (சுமார் 11.66 கிராம்) தங்கம் ₹70,000-க்கும் குறைவாக வர்த்தகமான நிலையில், 2025-ல் ₹1.25 லட்சத்தைத் தாண்டிவிட்டது. இது உலகளாவிய பொருளாதார பதட்டங்கள், பணவீக்க அழுத்தங்கள் மற்றும் மத்திய வங்கிகளின் மூலோபாயக் கொள்கைகள் ஆகியவற்றின் பிரதிபலிப்பாகும்.

தங்கம் ஒரு பாதுகாப்பான முதலீடு

சீன மக்கள் வங்கி, 2025 ஜனவரி முதல் செப்டம்பர் வரை சுமார் 39.2 டன் தங்கத்தை வாங்கியுள்ளது. சீனா மாதத்திற்கு 2 முதல் 5 டன் வரை தங்கத்தை சேர்த்து வருகிறது. செப்டம்பரில் மட்டும் 0.4 டன் தங்கத்தை வாங்கியுள்ளது.

அமெரிக்க டாலரின் மீதான சார்பைக் குறைப்பதே சீனாவின் முக்கிய நோக்கம் என்று நிபுணர்கள் தெரிவிக்கின்றனர். டாலர் கையிருப்பை வைத்திருந்தாலும், அமெரிக்கப் பொருளாதாரத்துடன் இணைக்கப்பட்ட ஒரு நாணயத்திலிருந்து வேறுபட்ட சொத்துக்களைப் பன்முகப்படுத்துவதில் சீனா ஆர்வமாக உள்ளது. டாலரை தீவிரமாக நம்பி இருப்பதை சீனா விரும்பவில்லை. தங்கம் உலகளவில் நடுநிலை மற்றும் நிலையான மதிப்பை பாதுகாக்கும் ஒரு பொருளாகும்.

பணவீக்கக் கவலைகள் தங்கத்தின் கவர்ச்சியை மேலும் வலுப்படுத்துகின்றன. 2025-ல் அவுன்ஸ் தங்கம் சுமார் $3,900-ஐ எட்டியுள்ள நிலையில், தங்கம் வாங்கும் சக்தியைப் பாதுகாக்கிறது. இது சீனாவின் நாணயத்தின் உலகளாவிய நிலையை வலுப்படுத்தும் ஒரு வழியாகவும் பார்க்கப்படுகிறது.

சீனா இந்தியா தங்கம்

சீன மக்கள் தங்கத்தை ஒரு முதலீட்டு விருப்பமாக மீண்டும் பார்க்கத் தொடங்கியுள்ளனர். ஷாங்காய் மற்றும் பெய்ஜிங் போன்ற நகரங்களில் உள்ள நகைக் கடைகள், விலை அதிகமாக இருந்தாலும் தேவை அதிகரித்துள்ளதாகத் தெரிவிக்கின்றன. பல வாங்குபவர்களுக்கு புதியதாக வாங்க முடியாத சூழலில், சிலர் பழைய தங்க ஆபரணங்களை புதியவற்றிற்காக மாற்றிக்கொள்கின்றனர். உலகிலேயே தங்கத்தை அதிகம் பயன்படுத்தும் நாடான சீனா, அமெரிக்க டாலரை சார்ந்திருக்கும் தனது கையிருப்பை குறைக்கும் நோக்கில், தங்க இறக்குமதி மற்றும் ஏற்றுமதி உரிமங்களுக்கான விதிமுறைகளை தளர்த்த திட்டமிட்டுள்ளது. இது தொடர்பான வரைவு அறிக்கை, சீன மக்கள் வங்கி (PBOC) மூலம் வெளியிடப்பட்டுள்ளது.

இதன் மூலம் சீனா மிக எளிதாக தங்கம் வாங்க முடியும். அதை நகைகளாக மாற்றி எளிதாக விற்பனையும் செய்ய முடியும். இந்த வரைவு திட்டத்தின்படி, விரைவான ஒப்புதல் அமைப்பான "பலதரப்பு பயன்பாட்டு அனுமதிச் சீட்டுகள்" (multi-use permits) வழங்கும் துறைமுகங்களின் எண்ணிக்கையை அதிகரிக்க சீனா உத்தேசித்துள்ளது. மேலும், இந்த அனுமதிச் சீட்டுகளின் கால அளவை ஒன்பது மாதங்களாக நீட்டிக்கவும், ஒரு சீட்டை எத்தனை முறை பயன்படுத்தலாம் என்பதற்கான வரம்புகளை நீக்கவும் சீன மத்திய வங்கி முடிவு செய்துள்ளது.

இந்தியா தங்கம் பாதிப்பு

இந்தியாவும் இதே பாதையில் பயணித்து வருகிறது. இந்திய ரிசர்வ் வங்கி தனது தங்க இருப்பை படிப்படியாக உயர்த்தி, தற்போது 880 டன்களாக வைத்துள்ளது. இதில் சுமார் 512 டன்கள் உள்நாட்டில் நாக்பூர் மற்றும் மும்பையில் சேமிக்கப்பட்டுள்ளன. மீதமுள்ளவை பாங்க் ஆஃப் இங்கிலாந்து மற்றும் பாங்க் ஃபார் இன்டர்நேஷனல் செட்டில்மென்ட்ஸ் போன்ற வெளிநாட்டு நிறுவனங்களில் வைக்கப்பட்டுள்ளன.

இந்தியாவின் மொத்த வெளிநாட்டு நாணய இருப்புகளில் தங்கம் 11.7 சதவீதமாக உள்ளது. கடந்த பத்தாண்டுகளில், இந்தியாவின் தங்க கையிருப்பு சுமார் 58 சதவீதம் அதிகரித்துள்ளது. 2015-ல் 557.7 டன்களாக இருந்த தங்க இருப்பு, 2025-ல் 880 டன்களாக உயர்ந்துள்ளது. 2022 முதல், தங்க சேமிப்பின் வேகம் இந்தியாவில் இப்படி அதிகரித்துள்ளது குறிப்பிடத்தக்கது.

English summary

China and India are stepping up the purchase of Gold: What is happening in the gold market?