சிகரெட் விலை உயர்வு இன்று முதல் அமல்.. நாடு முழுவதும் ஒரு சிகரெட் விலை ரூ.8.50 வரை அதிகரிப்பு!

சென்னை: நாடு முழுவதும் சிகரெட் விலை உயர்வு இன்று (பிப்ரவரி 1) முதல் அமலுக்கு வருகிறது. மத்திய அரசு அறிவித்த கூடுதல் கலால் வரி விதி இன்று முதல் அமலுக்கு வருவதால் இன்று முதல் சிகரெட்டின் விலை கடுமையாக உயர்கிறது. 40 சதவீத ஜிஎஸ்டி வரியுடன் கலால் வரி சேர்த்து, ஒரு சிகரெட் விலை ரூபாய் 8.50 வரை உயர்கிறது.

இன்று முதல் புகையிலை பொருட்கள் மீதான ஜி.எஸ்.டி வரி 28 சதவீதத்தில் இருந்து 40 சதவீதமாக உயர்த்தபடுகிறது. சிகரெட் மற்றும் புகையிலை பொருட்கள் மீதான கூடுதல் கலால் வரி, மற்றும் பான் மசாலா மீதான வரி என அதிகபட்சமாக 40 % ஜிஎஸ்டி விகிதத்திற்கு மேல் உயர்த்தப்பட்டுள்ளது. மேலும் செஸ் வரிக்கு பதிலாக புதிய கலால் வரி விதிக்கப்படுகிறது. இதனால், இன்று முதல் சிகரெட் விலை கணிசமாக உயருகிறது.

சிகரெட்டின் நீளத்தைப் பொறுத்து ஒரு சிகரெட்டுக்கு ரூபாய் 2.05 முதல் ரூபாய் 8.50 வரை கலால் வரி விதிக்கப்படுகிறது. 65 மி.மீ வரை நீளமுள்ள குறுகிய ஃபில்டர் இல்லாத சிகரெட்டுகளுக்கு ஒரு சிகரெட்டுக்கு சுமார் ரூபாய் 2.05 கூடுதல் வரி விதிக்கப்படும், அதே நேரத்தில் அதே நீளம் கொண்ட ஃபில்டர் சிகரெட்டுகளுக்கு சுமார் ரூபாய் 2.10 கூடுதல் வரி விதிக்கப்படும். 65 - 70 மிமீ நடுத்தர நீளமுள்ள சிகரெட்டுகளுக்கு ஒரு சிகரெட்டுக்கு சுமார் ரூபாய் 3.60 முதல் ரூபாஉ 4 வரி விதிக்கப்படும், மேலும் 70-75 மிமீ நீளமுள்ள பிரீமியம் சிகரெட்டுகளுக்கு சுமார் 5.40 ரூபாய் வரி விதிக்கப்படும்.

மெல்லும் புகையிலை மற்றும் ஜர்தா வாசனை கொண்ட புகையிலை மற்றும் குட்காவிற்கு முறையே 82% மற்றும் 91% கலால் வரி விதிக்கப்படுகிறது. கூடுதல் கலால் வரிகளால், அடுத்த நிதி ஆண்டில் உள்நாட்டு சிகரெட் தொழில் 6 - 8% அளவு குறையக்கூடும் என்று கூறப்படுகிறது.

இந்த வரி மாற்ற நடவடிக்கை, வரி ஏய்ப்பைக் குறைத்து வருவாய் வசூலை மேம்படுத்தும் என்று எதிர்பார்க்கப்படுகிறது. பான் மசாலா உற்பத்தியாளர்கள் இப்போது பிப்ரவரி 1 முதல் புதிய சுகாதார மற்றும் தேசிய பாதுகாப்பு செஸ் சட்டத்தின் கீழ் புதிய பதிவு செய்ய வேண்டும்.

அனைத்து பேக்கிங் இயந்திரங்களையும் உள்ளடக்கிய சிசிடிவி கேமராக்களை நிறுவ வேண்டும் மற்றும் குறைந்தது இரண்டு ஆண்டுகளுக்கு வீடியோ பதிவுகளை சேமிக்க வேண்டும். கூடுதலாக, நிறுவனங்கள் தங்கள் தொழிற்சாலைகளில் உள்ள இயந்திரங்களின் எண்ணிக்கை மற்றும் அவற்றின் உற்பத்தி திறன் குறித்து கலால் அதிகாரிகளுக்குத் தெரிவிக்க வேண்டும் என உத்தரவிடப்பட்டுள்ளது.

பிப்ரவரி மாதம் தொடங்கியுள்ள இன்று முதல் நாடு முழுவதும் சிகரெட், பான் மசாலா பொருட்கள் விலை உயர்ந்துள்ளது. இந்த விலை உயர்வால் முன்கூட்டியே சில வியாபாரிகள் சிகரெட்டுகளை குறைந்த விலைக்கு வாங்கி பதுக்கி வைத்து அதிக விலைக்கு விற்க உள்ளனர். மேலும், விலையேற்றம் அதிகாரப்பூர்வமாக அமலுக்கு வருவதற்கு முன்பே சிகரெட் விலை உயர்ந்ததால், புகைப்பிடிப்பவர்கள் கடும் அதிர்ச்சி அடைந்தது குறிப்பிடத்தக்கது.

English summary

From February 1, the government is bringing a new tax structure for cigarettes, tobacco products and pan masala, aiming to tighten regulation and keep tax levels high on these so-called ‘sin goods'.