நிறைவேறிய நீண்டகால எதிர்பார்ப்பு- சென்னை வேளச்சேரி, கோயம்பேடு மேம்பாலங்கள் திறப்பு!
சென்னை: சென்னை மக்களின் நீண்டகால எதிர்பார்ப்புகளான கோயம்பேடு மற்றும் வேளச்சேரி மேம்பாலங்களை முதல்வர் மு.க.ஸ்டாலின் இன்று திறந்து வைத்தார். இதன்மூலம் இந்த பகுதிகளில் பல்லாண்டுகளாக நீடித்து வரும் போக்குவரத்து நெரிசல் பிரச்சனை முடிவுக்கு வந்துள்ளது.
சென்னை கோயம்பேடு பேருந்து நிலையம் எதிரே 100 அடி சாலையில் 1 கி.மீ தொலைவுக்கு 2015-ம் ஆண்டு மேம்பாலம் கட்டும் பணிகள் தொடங்கின. ரூ93 கோடி மதிப்பிலான இந்த பணிகளை 3 ஆண்டுகளில் முடிக்க திட்டமிடப்பட்டது.
கோயம்பேடு மேம்பாலம்
ஆனால் பல்வேறு காரணங்களால் இந்த பணிகள் முடிவடையாமல் இருந்து வந்தது. கடந்த ஆண்டு கொரோனா கால லாக்டவுனும் மேம்பால பணிகளில் தொய்வை ஏற்படுத்தியது. தற்போது இந்த மேம்பால பணிகள் முழுமையடைந்துவிட்டன. கோயம்பேடு ஜெய்நகர் பூங்கா முதல் தேமுதிக தலைமை அலுவலகம் வரை இந்த மேம்பாலம் கட்டப்பட்டுள்ளது.
வேளச்சேரி 2 அடுக்கு மேம்பாலம்
இதேபோல் வேளச்சேரி விஜயநகர் சந்திப்பிலும் 2 அடுக்கு மேம்பாலம் பல ஆண்டுகளாக கட்டப்பட்டு வந்தது. தரமணி லிங்க் ரோடு மற்றும் வேளச்சேரி புறவழிச் சாலை ஆகியவற்றை இணைக்கும் வகையில் இந்த 2 அடுக்கு மேம்பாலம் கட்டப்பட்டு வந்தது. இதன் பணிகளும் தற்போது முடிவடைந்துள்ளன.
மேம்பாலங்கள் இன்று திறப்பு
இந்த 2 மேம்பாலங்களையும் இன்று காலையில் முதல்வர் மு.க.ஸ்டாலின் திறந்து வைத்தார். இதன் மூலம் கோயம்பேடு 100 அடி சாலை மற்றும் வேளச்சேரி விஜய நகர் பகுதிகளில் பல்லாண்டுகளாக நீடித்து வரும் போக்குவரத்து நெரிசல் பிரச்சனை முடிவுக்கு வந்துள்ளது. இந்த 2 மேம்பாலங்களும் பொதுமக்களின் நீண்டகால எதிர்பார்ப்பு.
முதல் முறையாக வேலூர் பயணம்
கோயம்பேடு மேம்பால திறப்பு நிகழ்ச்சி முடிவடைந்த பின்னர் கோயம்பேடு பேருந்து நிலையத்தில் விடுதலைப் போராட்ட வீரர் வ.உ.சிதம்பரனாரின் 150வது பிறந்த நாளை முன்னிட்டு அமைக்கப்பட்டுள்ள புகைப்பட கண்காட்சியையும் முதல்வர் மு.க.ஸ்டாலின் திறந்து வைத்தார். இதன்பின்னர் மாலை 4 மணிக்கு வேலூர் மாவட்டத்தில் நாளை பல்வேறு நிகழ்ச்சிகளில் பங்கேற்பதற்காக முதல்வர் மு.க.ஸ்டாலின் புறப்பட்டுச் செல்கிறார். தமிழக முதல்வராக பதவியேற்ற பின்னர் வேலூர் மாவட்டத்துக்கு முதல் முறையாக முதல்வர் ஸ்டாலின் செல்வதால் சிறப்பான வரவேற்பு அளிக்க ஏற்பாடுகள் செய்யப்பட்டுள்ளன.
Click it and Unblock the Notifications
Sign in with Google