WFH வாழ்க்கையால் எதையெல்லாம் இழக்கிறோம் தெரியுமா.. டெல்லி பெண் சொன்ன கசப்பான உண்மை
சென்னை: இன்றைக்கு வீட்டில் இருந்தே வேலை செய்வது என்பது சாதாரண ஒன்றாக மாறிவிட்டது. பல ஐடி நிறுவனங்கள், கார்ப்பரேட் நிறுவனங்கள் ஓர்க் புறம் ஹோம் ஆப்சனை தந்துள்ளன. டெல்லியைச் சேர்ந்த பெண் ஒருவர், கடந்த ஒன்றரை ஆண்டுகளாக வீட்டிலிருந்தே வேலை செய்து வருவதால் தனது சமூக வாழ்க்கை எவ்வாறு பாதிக்கப்பட்டுள்ளது என்பதைப் பற்றிப் பகிர்ந்துள்ளது இணையத்தில் பெரிய விவாதத்தைக் கிளப்பியுள்ளது.
நெகிழ்வுத்தன்மை, பயண நேரம் இல்லாமை மற்றும் சுதந்திரம் போன்ற நன்மைகளுக்காக வொர்க் புரம் ஹோம் வேலையை பலரும் விரும்புகின்றனர்.. ஆனால் மனிதர்களுக்கிடையேயான அன்றாடத் தொடர்புகளையும், புதிய நட்புகள் உருவாகும் வாய்ப்புகளையும் மெதுவாகப் பறித்துவிடுகிறது என்பது கசப்பான உண்மை.
தான் சந்தித்த இந்த அனுபவத்தைப் பற்றி தான்யா சிங்கால் என்ற பெண் இன்ஸ்டாகிராமில் வீடியோவாகப் பகிர்ந்துள்ளார்.
"நான் கடந்த ஒன்றரை வருடங்களாக வீட்டிலிருந்தே வேலை செய்து வருகிறேன். இது எனது சமூக வாழ்க்கையையே அழித்துவிட்டது என்று நான் உண்மையாகவே நினைக்கிறேன்.
WFH பரவலானபோது, அனைவரும் இதன் நன்மைகளைப் பற்றியே பேசினார்கள். பயண நேரமில்லை, எங்கிருந்து வேண்டுமானாலும் வேலை செய்யலாம், நேர நெகிழ்வுத்தன்மை என எல்லாமே உண்மைதான். ஆனால், இதன் மூலம் நாம் அமைதியாக எதையெல்லாம் இழக்கிறோம் என்று யாருமே பேசுவதில்லை.
நான் இப்போது என் சொந்த ஊரில் வசிக்கவில்லை. என் கல்லூரிக் தோழர்கள் அனைவரும் ஆளுக்கொரு நகரத்தில் பிரிந்து வாழ்கிறார்கள். இந்த புதிய சூழலில், எனக்கு என்று ஒரு புதிய சமூக வட்டத்தையும் நட்பையும் உருவாக்க அலுவலகமே ஒரே வாய்ப்பாக இருந்தது. ஆனால், அந்த வேலையே வீட்டிற்குள் வந்துவிட்டது.
பொதுவாக அலுவலகங்கள் எந்தவித முன் திட்டமிடலும் இன்றி, இயல்பான மனிதத் தொடர்புகளை உருவாக்கும். யாராவது உங்கள் மேஜையைக் கடந்து செல்வார்கள், ஒன்றாகக் காபி குடிக்கச் செல்வீர்கள், அருகில் இருப்பவர்களுடன் சேர்ந்து மதிய உணவு சாப்பிடுவீர்கள். இதற்கெல்லாம் எந்தத் தனி முயற்சியும் தேவையில்லை. ஆனால், வேலை வீட்டிற்குள் வரும்போது, ஒரு திட்டமிடப்படாத தொடர்பு கூட இல்லாமல் முழு நாளையும் நீங்கள் தனியாகக் கழிக்க நேரிடுகிறது.
பள்ளி மற்றும் கல்லூரி வாழ்க்கைக்குப் பிறகு, வளர்ந்த மனிதர்கள் புதிய நபர்களைச் சந்திப்பதற்கான மிகச் சில இடங்களில் அலுவலகமும் ஒன்று. இப்போது நான் புதிய மனிதர்களைச் சந்திக்கவோ, புதிய நண்பர்களை உருவாக்கவோ விரும்பினால், நான் திட்டமிட்டுத் தனி முயற்சி எடுக்க வேண்டியுள்ளது. நெட்வொர்க்கிங் நிகழ்வுகளுக்குச் செல்வது, பல்வேறு குழுக்களில் சேர்வது அல்லது தனியாகச் சுற்றுலா செல்வது என ஏதேனும் செய்ய வேண்டியிருக்கிறது. ஒரு வேலை செய்யும் இடம் தரும் அந்த இயல்பான நட்புக் சூழல் இப்போது முற்றிலுமாக இல்லாமல் போய்விட்டது.
நீங்கள் வீட்டிலிருந்தே வேலை செய்து, உங்கள் சமூக வாழ்க்கையை இழந்துவிட்டதாக உணர்ந்தால், என்னை நம்புங்கள்... நீங்கள் தனி ஆள் இல்லை; இது வெறும் உங்கள் கற்பனையும் அல்ல!"" இவ்வாறு கூறியுள்ளார்
இந்தப் பதிவு பலரின் கவனத்தை ஈர்த்துள்ளது .அவர்களது சொந்த அனுபவத்தோடு ஒத்துப்போவதாக அமைந்தது.
ஒரு நெட்டிசன், "100% உண்மை. இன்றைய உலகில், செயற்கை நுண்ணறிவுதான் சில நேரங்களில் மிகவும் நெருக்கமான மற்றும் அணுகக்கூடிய நண்பனாக உணர்கிறது" என்று பதிவிட்டுள்ளார்.
மற்றொருவர், "மிகவும் உண்மை" என்றும், மூன்றாமவர் "இது முற்றிலும் சரி" என்றும் கூறியுள்ளனர்.
மேலும் ஒரு நெட்டிசன், "நான் உங்களுடன் முழுமையாக உடன்படுகிறேன்" என்று கருத்து தெரிவித்துள்ளார்.
Click it and Unblock the Notifications
Sign in with Google
