பயங்கர சத்தம்.. வெடித்து சிதறிய மின் கேபிள்.. குரோம்பேட்டை அரசு மருத்துவமனையில் திடீர் தீ.. பதற்றம்

Updated: Monday, April 3, 2023, 21:33 [IST]

Subscribe to Oneindia Tamil

சென்னை: சென்னை குரோம்பேட்டை அரசு மருத்துவமனையில் அவசர சிகிச்சை பிரிவில் இன்று திடீரென மின்சார கேபிள் பயங்கர சத்தத்துடன் வெடித்து சிதறியது. அதோடு தீவிபத்து ஏற்பட்டதால் நோயாளிகள் பதற்றமடைந்தனர்.

சென்னை புறநகர் குரோம்பேட்டையில் அரசு மருத்துவமனை அமைந்துள்ளது. இந்த மருத்துவமனையில் தினமும் ஆயிரக்கணக்கானவர்கள் வந்து செல்கின்றனர். வெளிநோயாளிகளாக ஏராளமானவர்கள் தினமும் சிகிச்சை பெற்று செல்லும் நிலையில் உள்நோயாளிகளாகவும் பொதுமக்கள் தங்கி சிகிச்சை பெற்று வருகின்றனர்.

இந்த மருத்துவமனையில் ஒவ்வொரு நோய் பிரிவுக்கும் தனித்தனியாக வார்டுகள் உள்ளன. அவசர சிகிச்சைக்கு என்று தனிவார்டு அமைந்துள்ளது. இந்நிலையில் அவரச சிகிச்சை பிரிவுக்கு மின்சார கேபிள் வசதி வழங்கப்பட்டுள்ளது.

வெடித்து சிதறிய மின்கேபிள்

இந்த மின்கேபிள் வசதி அவசர சிகிச்சை பிரிவின் நுழைவுவாயில் வழியாக செல்கிறது. இந்நிலையில் தான் இன்று மாலையில் அவசர சிகிச்சை பிரிவின் நுழைவுவாயில் அருகே சென்ற மின்சார கேபிள் திடீரென்று பயங்கர சத்தத்துடன் வெடித்து சிதறியது. இதைபார்த்து பொதுமக்கள் மற்றும் நோயாளிகள் அதிர்ச்சியடைந்த நிலையில் உடனடியாக தீப்பற்றி எரிய தொடங்கியது.

போராடி அணைத்த ஊழியர்கள்

இதுபற்றி உடனடியாக மருத்துவமனை ஊழியர்களுக்கு தகவல் தெரிவிக்கப்பட்டது. அவர்கள் உடனடியாக மின்சாரத்தை தடை செய்தனர். அதன்பிறகு மின்சார கேபிளில் பிடித்த தீயை அணைக்கும் பணியில் தீவிரமாக ஈடுபட்டு போராடி அணைத்தனர். அதன்பிறகு மின்சார கேபிளில் ஏற்பட்ட பழுதை சரிசெய்யும் பணியை ஊழியர்கள் தொடங்கினர்.

காரணம் என்ன?

இருப்பினும் மின்சார கேபிள் வெடித்து சிதறியதற்கான காரணம் தெரியவில்லை. மருத்துவமனை வளாகத்தில் காலணிகளை கழற்றி வைப்பதற்காக ஸ்டேன்ட் வைக்கப்பட்டுள்ளது. இந்த ஸ்டேன்ட் வழியாக மின்சார கேபிள் சென்ற நிலையில் அப்போது ஏற்பட்ட உராய்வின் காரணமாக தீவிபத்து ஏற்பட்டு இருக்கலாம் என சந்தேகிக்கப்படுகிறது.

பெரிய விபத்து தவிர்ப்பு

இந்த சம்பவத்தால் குரோம்பேட்டை மருத்துவமனையின் அவசர சிகிச்சை பிரிவில் சிறிது நேரம் பதற்றம் ஏற்பட்டது. இருப்பினும் தீவிபத்து நடந்தவுடன் உடனடியாக மருத்துவமனை ஊழியர்கள் விரைந்து செயல்பட்டதால் பெரியளவிலான விபத்து தவிர்க்கப்பட்டது என்பது குறிப்பிடத்தக்கது.