18 வயசு கூட ஆகல அதுக்குள்ள? அட்சய திருதியையில் நடக்க போகும் ஆபத்து! சாட்டைய சுழட்டிய புதுச்சேரி அரசு
சென்னை: மகிழ்ச்சிக்கும் சுப நிகழ்வுகளுக்கும் பெயர்பெற்ற அட்சய திருதியை தினத்தை எதிர்நோக்கி மக்கள் காத்திருக்கும் வேளையில், அதன் மறுபக்கத்தில் மறைந்திருக்கும் ஒரு சமூக அவலம் குறித்து புதுச்சேரி மாவட்ட நிர்வாகம் தற்போது மிகுந்த எச்சரிக்கையுடன் செயல்பட்டு வருகிறது. அதாவது வருகிற 19-ம் தேதி அட்சய திருதியை முன்னிட்டு, நாட்டின் சில பகுதிகளில் குழந்தை திருமணங்கள் நடத்தப்படலாம் என புகார்கள் முளைத்திருக்கிறதாம்.. எனவேதான் அதிகாரிகள் தீவிரக் கண்காணிப்பில் ஈடுபட்டுள்ளார்களாம்.. இதுகுறித்த விவரத்தை இங்கே சுருக்கமாக பார்ப்போம்.
இந்தியச் சட்டங்களின்படி 18 வயதுக்குட்பட்ட பெண் அல்லது 21 வயதுக்குட்பட்ட ஆணுக்குத் திருமணம் செய்து வைப்பது சட்டவிரோதமானது என்பது நாம் அனைவரும் அறிந்ததே.
குழந்தை திருமணங்கள்
ஆனால், இதையும் மீறி மதச் சடங்குகள் அல்லது விழா நாட்களைக் காரணம் காட்டித் திருமணங்கள் நடத்தப்படுவது கவலைக்குரிய விஷயமாகப் பார்க்கப்படுகிறது. இத்தகைய திருமணங்கள் இளம் வயதிலேயே அந்தப் பிள்ளைகளைக் குடும்ப வன்முறைக்கும், முறையற்ற ஆரோக்கிய குறைபாடுகளுக்கும் தள்ளிவிடுகின்றன.
அதிலும் இளம் வயது கர்ப்பம் என்பது அந்த சிறுமிகளின் உயிருக்கே ஆபத்தாக முடியலாம் என்ற யதார்த்தத்தை நாம் உணர வேண்டும். தேசிய குழந்தைகள் உரிமைகள் பாதுகாப்பு ஆணையம் இத்தகைய விழா காலங்களில் கூடுதல் விழிப்புடன் இருக்க அறிவுறுத்தியுள்ளதைத் தொடர்ந்து, புதுச்சேரி மாவட்ட ஆட்சியர் ஏ. குலோத்துங்கன் இப்போது கடுமையான எச்சரிக்கை ஒன்றை விடுத்துள்ளார்.
புதுச்சேரி கலெக்டர் அதிரடி
இந்த எச்சரிக்கையில் மிக முக்கியமாகக் கவனிக்கப்பட வேண்டியது இதற்கான தண்டனை விவரங்கள் தான். "குழந்தை திருமண தடுப்புச் சட்டம் 2006" ன் கீழ், இக்குற்றத்தில் ஈடுபடுபவர்களுக்கு இரண்டு ஆண்டுகள் வரை கடுமையான சிறை தண்டனை மற்றும் ஒரு லட்சம் ரூபாய் வரை அபராதம் விதிக்கப்பட வாய்ப்புள்ளது.
18 வயதுக்கு மேற்பட்ட ஒரு ஆண் குழந்தை திருமணத்தை ஒப்பந்தம் செய்தாலோ, அல்லது யாராவது ஒரு நபர் இத்தகைய திருமணத்தை முன்னின்று நடத்தினாலோ, தூண்டிவிட்டாலோ அவர்கள் சட்டத்தின் பிடியிலிருந்து தப்ப முடியாது. பெற்றோர்கள் அல்லது பாதுகாவலர்கள் கூட இந்தச் சட்டப்பிரிவுகளின் கீழ் தண்டனைக்கு உள்ளாக நேரிடும் என்பது இங்கே உறுதி செய்யப்பட்டுள்ள ஒரு தகவல்.
அட்சய திருதியை நாளில் திருமணம்?
இருந்தாலும் ஒரு நிம்மதியான விஷயம் என்னவென்றால், கடந்த காலங்களில் புதுச்சேரி யூனியன் பிரதேசத்தில் இது போன்ற விசேஷ நாட்களில் குழந்தை திருமணங்கள் நடந்ததாக எந்த ஒரு அதிகாரப்பூர்வ வழக்கும் இதுவரை பதிவாகவில்லை என்று ஒரு அதிகாரி பகிர்ந்துள்ளார்.
இது புதுச்சேரி மக்களின் விழிப்புணர்வைக் காட்டினாலும், ஒரு சிறிய தவறு கூட நடந்துவிடக் கூடாது என்பதில் நிர்வாகம் உறுதியாக உள்ளது. அதற்காகவே 1098 என்ற குழந்தைகள் உதவி எண்ணும், 181 என்ற மகளிர் உதவி எண்ணும் பொதுமக்கள் பயன்பாட்டிற்காக எப்போதும் தயார் நிலையில் வைக்கப்பட்டுள்ளன.
மாவட்ட நிர்வாகம் அறிவிப்பு
குழந்தை திருமண தடைச் சட்டம் மற்றும் சைல்ட் லைன் இந்தியா விதிகளின்படி, குற்றவாளிகள் மீது கடும் நடவடிக்கை எடுக்கப்படும் என்பதில் எந்தச் சந்தேகமும் இல்லை. அட்சய திருதியை போன்ற ஒரு புனிதமான நாளில், ஒரு குழந்தையின் வாழ்வைத் திருமண பந்தத்தால் முடக்குவதற்குப் பதிலாக, அவர்களுக்குக் கல்வியையும் நல்ல எதிர்காலத்தையும் வழங்குவதே நாம் அந்தத் தலைமுறைக்குச் செய்யும் உண்மையான தொண்டு. இந்த விழிப்புணர்வு ஒவ்வொரு இல்லத்திலும் நிலவ வேண்டும் என்பதே மாவட்ட நிர்வாகத்தின் தற்போதைய பிரதான நோக்கமாகும்.
மேற்கண்ட தகவலையும், அறிவிப்பையும் பார்த்தால், ஒரு குழந்தையின் எதிர்காலத்தையும், அவர்களது கல்வி மற்றும் ஆரோக்கியத்தையும் கேள்விக்குறியாக்கும் இந்தச் செயல்பாடுகள், ஒரு சமூகமாக நாம் இன்னும் கடந்து வர வேண்டிய சவால்களை நமக்கு நினைவூட்டுகின்றன....!!
Click it and Unblock the Notifications
Sign in with Google