ஃபிரிட்ஜ் உங்கள் கரண்ட் பில்லை உயர்த்துதா? மின் கட்டணம் குறைய பிரிட்ஜில் இந்த சூப்பர் விஷயம் பாருங்க

சென்னை: மாதம் மாதம் கரண்ட் பில் அதிகமாக வருகிறதா? வீட்டில் இருக்கும் ஃபிரிட்ஜ்தான் அதற்குப் பெரிய காரணம் என்பதை பலருக்கு தெரியாது.. இந்த சில எளிய பழக்கங்களை மாற்றினால் மின்சாரக் கட்டணத்தில் நல்ல சேமிப்பு கிடைக்கும்.. அதை பற்றி இங்கே சுருக்கமாக பார்க்கலாம்.

நவீன காலத்தில் பெரும்பாலான வீடுகளில் தவிர்க்க முடியாத மின்சார சாதனமாக குளிர்சாதனப் பெட்டி மாறிவிட்டது.. உணவுப் பொருட்களை பாதுகாப்பாக வைத்திருக்க இது பெரிய உதவியாக இருந்தாலும், சரியாகப் பயன்படுத்தவில்லை என்றால் மின்சாரக் கட்டணத்தை அதிகப்படுத்தும் காரணமாகவும் மாறிவிடுகிறது..

மின்சார கட்டணம்

ஆனால் சில எளிய முறைகளைப் பின்பற்றினால் ஃபிரிட்ஜ் பயன்படுத்தியும் மாதந்தோறும் மின்சாரச் செலவை கணிசமாகக் குறைக்க முடியும்..

முதலில் ஃபிரிட்ஜ் வைக்கும் இடம் மிகவும் முக்கியம்.. சூரிய ஒளி நேரடியாகப் படும் இடத்திலோ அல்லது சமையல் எரிவாயு அடுப்பிற்கு அருகிலோ இதனை வைக்கக் கூடாது..

வெப்பம் அதிகமாக இருக்கும் இடத்தில் ஃபிரிட்ஜ் இருந்தால் அதன் உட்புறத்தை குளிர்ச்சியாக வைத்திருக்க மோட்டார் நீண்ட நேரம் இயங்க வேண்டியிருக்கும்.. இதனால் தேவையற்ற மின்சாரம் செலவாகும்.. அதேபோல் சுவருக்கும் ஃபிரிட்ஜுக்கும் இடையில் குறைந்தது 6 அங்குல இடைவெளி இருக்க வேண்டும்.. அப்போதுதான் அதன் பின்புறத்தில் உருவாகும் வெப்பம் வெளியேறி காற்று சுழற்சி சீராக நடைபெறும்..

ஃபிரிட்ஜ் - கரண்ட் பில் சேமிப்பு

அதேபோல உணவு பொருட்களை உள்ளே வைக்கும் முறையிலும் கவனம் தேவை.. சூடாக இருக்கும் உணவுகளை அப்படியே ஃபிரிட்ஜில் வைப்பது பெரிய தவறு..

அந்த வெப்பத்தை குளிர்விக்க இயந்திரம் அதிகமாக உழைக்க வேண்டியிருக்கும்.. எனவே உணவுகளை அறை வெப்பநிலைக்கு குளிர்ந்த பிறகே உள்ளே வைக்க வேண்டும்..

அதேபோல் பொருட்களை மிகவும் நெருக்கமாக அடுக்கிவைப்பதும் சரியல்ல.. ஃபிரிட்ஜ் உள்ளே காற்று சுழல இடம் இருக்க வேண்டும்.. அதே நேரத்தில் ஃபிரிட்ஜ் முழுவதும் காலியாக இருந்தாலும் சரியல்ல.. மிதமான அளவில் பொருட்கள் இருந்தால் குளிர்ச்சி நீண்ட நேரம் இருக்கும்.. ஏற்கனவே குளிர்ந்திருக்கும் பொருட்கள் உள்ளே வெப்பநிலையை நிலையாக வைத்திருக்க உதவும்.. ஆனால் காற்று செல்லும் வழியை அடைக்காமல் பொருட்களை ஒழுங்காக அடுக்கி வைக்க வேண்டும்..

தமிழ்நாடு மின்சார வாரியம்

கதவை அடிக்கடி திறப்பதும் நீண்ட நேரம் திறந்து வைத்திருப்பதும் மின்சாரத்தை அதிகமாக செலவழிக்க வைக்கும்.. ஒவ்வொரு முறை கதவைத் திறக்கும்போதும் உள்ளே இருக்கும் குளிர்ந்த காற்று வெளியேறி வெளிக்காற்று உள்ளே நுழைகிறது.. இதனால் மீண்டும் குளிர்ச்சி ஏற்படுத்த மோட்டார் கடுமையாக வேலை செய்ய வேண்டியிருக்கும்.. எனவே தேவையான பொருட்களை ஒரே முறையில் எடுத்துக்கொள்ளும் பழக்கத்தை உருவாக்க வேண்டும்..

அதேபோல் கதவின் விளிம்பில் இருக்கும் ரப்பர் கேஸ்கெட் சரியாக உள்ளதா என்பதையும் அடிக்கடி பார்க்க வேண்டும்.. அதில் தளர்வு அல்லது விரிசல் இருந்தால் குளிர்ச்சி வெளியேறி மின்சாரச் செலவு அதிகரிக்கும்..

பழைய மாடல் ஃபிரிட்ஜ்களில் ஐஸ் கட்டிகள் அதிகமாக படிவது வழக்கமான விஷயம்.. இப்படி ஐஸ் கட்டிகள் அதிகமாக சேர்ந்தால் குளிர்ச்சி சரியாக பரவாது.. இதனால் மிஷினில் கூடுதல் அழுத்தம் ஏற்படும்.. எனவே அடிக்கடி அவைகளை அகற்றுவது நல்லது..

பழைய மாடல் பிரிட்ஜ்

வெப்பநிலையையும் தேவையில்லாமல் மிகவும் குறைந்த அளவில் வைத்திருக்கக் கூடாது.. பொதுவாக மிதமான அளவிலான டெம்பரேச்சர் போதுமானது.. மேலும் புதிய ஃபிரிட்ஜ் வாங்கும் போது அதிக ஸ்டார் ரேட்டிங் கொண்ட மாடல்களைத் தேர்வு செய்தால் மின்சாரச் சேமிப்பு அதிகமாக கிடைக்கும்..

இன்றைய காலத்தில் மின்சாரக் கட்டணம் குடும்பச் செலவில் முக்கிய இடத்தை பிடித்துள்ளது.. ஆனால் ஃபிரிட்ஜ் பயன்படுத்தும் போது இந்த எளிய வழிமுறைகளைப் பின்பற்றினால் மின்சாரத்தை மிச்சப்படுத்துவதுடன் குடும்பச் செலவையும் குறைக்க முடியும்..!!

English summary

Is your Fridge eating your hard earned money? Move It immediately Or It Will empty Your Purse with huge current bill