இதுதான் தவெகவின் பூத் கமிட்டி வலிமை.. அதிமுக நிர்வாகி சொன்ன வார்த்தை.. பத்திரிகையாளரின் பதிவு!

Updated: Friday, April 24, 2026, 13:03 [IST]

Subscribe to Oneindia Tamil

சென்னை: தமிழக சட்டசபைத் தேர்தலுக்கான வாக்குப்பதிவு அமைதியாக நிறைவடைந்துள்ளது. திமுக, அதிமுக, நாதக மற்றும் தவெக என்று 4 முனைப் போட்டி நிலவி வரும் சூழலில், வாக்காளர்கள் தங்களின் விருப்பத்தின் அடிப்படையில் ஜனநாயக கடமையை நிறைவேற்றிவிட்டனர். மொத்தமாக 5.73 கோடி வாக்காளர்கள் வாக்கு அளிக்க தகுதி பெற்றிருந்தனர். அதில் 4.88 கோடி வாக்காளர்கள் வாக்களித்துள்ளனர்.

இதன்படி தமிழ்நாடு சட்டசபைத் தேர்தலுக்கான வாக்குப்பதிவு சதவிகிதம் 85.15ஆக இருக்கிறது. இந்த தேர்தலில் தவெகவின் செயல்பாடுகள் திமுக மற்றும் அதிமுக ஆகிய கட்சியினர் மத்தியில் ஆச்சரியத்தை ஏற்படுத்தியுள்ளது. ஏனென்றால் திமுக மற்றும் அதிமுக கட்சிகளில் பூத் கமிட்டி முறையாக அமைக்கப்பட்டிருந்தாலும், தவெகவின் கட்டமைப்பு இந்த தேர்தலில் தெரிய வரும் என்று பார்க்கப்பட்டது.

TVK Vijay tamilnadu assembly election 2026

இந்த நிலையில் நேற்று தவெக போட்டியிட்ட 233 தொகுதிகளில் பூத் கமிட்டி சரியாக அமைக்கப்பட்டிருந்தது. அதுமட்டுமல்லாமல் பூத் கமிட்டியில் இளைஞர்கள் மற்றும் பெண்களும் இடம்பெற்றிருந்தனர். இதுதொடர்பாக பத்திரிகையாளர் ஒருவர் எழுதியுள்ள பதிவு சோசியல் மீடியாவில் டிரெண்டாகி வருகிறது. அத்துடன் ஒரு புகைப்படத்தையும் இணைத்துள்ளார்.

அதில், மொத்தமாக 175 பூத்களை பார்வையிட்டுள்ளேன். அந்த அனைத்து பூத்களிலும் தவெக பூத் ஏஜெண்ட்டுகள் இடம்பெற்றிருந்தனர். காலை 5.45 மணிக்கு Mock போலிங் நடைபெற்றது. அதில் உற்சாகத்துடன் பங்கேற்ற தவெகவினர், ஃபார்ம் 17ஐ பெற்றுக் கொண்டனர். அவர்களில் பெரும்பாலானோருக்கு 25 வயதிற்கு மேல் இல்லை. இன்னொரு ஆச்சரியம் என்னவென்றால் பெண்கள் அதிகளவில் இருந்தனர்.

தவெக பூத் ஏஜெண்ட்டாக இருந்த இளைஞர்கள் விஜய்யின் ட்ரஸ் கோடில் இருந்தனர். ஒரு மாதிரி நாங்கள் தவெககாரர்கள் தான் என்பதை அறிவிக்கும் வகையில் இருந்தனர். எளிதாக கண்டறிய கூடிய வகையில் இருந்தனர். பூத்திற்கு உள்ளேயும், வெளியேயும் சிறப்பாக செயல்பட்டனர். மாலை 6 மணி வரை எங்கும் நகரவில்லை. 70, 80, 90களில் எப்படி திராவிடக் கட்சிகள் இருந்தார்களோ, அப்படிதான் செயல்பட்டனர்.

தவெகவின் தாக்கத்தை குறைத்து மதிப்பிட்டுவிட்டோம். நிச்சயமாக தேர்தல் முடிவுகளில் மிகப்பெரிய தாக்கத்தை ஏற்படுத்துவார்கள். ஆனால் அந்த தாக்கம் திமுக அல்லது அதிமுக ஆகிய கட்சிகளில், யாருக்கு எதிராக திரும்பும் என்பதை கணிக்க முடியவில்லை என்று பதிவிட்டுள்ளார். இது தவெகவினர் மத்தியில் அதிகமாக பகிரப்பட்டு வருகிறது.