காங்கிரஸ் கட்சிக்கே போனதே கரூர் லோக்சபா தொகுதி.. திமுக தொண்டர்களின் உக்கிர போராட்டம் வீண்!

சென்னை: லோக்சபா தேர்தலில் திமுக கூட்டணியில் கரூர் தொகுதி காங்கிரஸ் கட்சிக்கே ஒதுக்கப்பட்டுள்ளதாக அதிகாரப்பூர்வமாக அறிவிக்கப்பட்டிருப்பது பெரும் எதிர்பார்ப்புடன் இருந்த திமுக தொண்டர்களை கடும் ஏமாற்றம் அடைய செய்துள்ளது.

லோக்சபா தேர்தல் தமிழ்நாட்டில் ஏப்ரல் 19-ந் தேதி நடைபெற உள்ளது. திமுக தலைமையிலான கூட்டணியில் தொகுதி பங்கீட்டு பேச்சுவார்த்தைகள் சுமூகமாக நடைபெற்றன.

இதனைத் தொடர்ந்து தற்போது தமிழ்நாடு, புதுவையில் காங்கிரஸ் கட்சிக்கு ஒதுக்கப்பட்ட 10 தொகுதி விவரங்கள் அறிவிக்கப்பட்டுள்ளன. திருவள்ளூர், கடலூர், கிருஷ்ணகிரி, நெல்லை, சிவகங்கை, கரூர், கன்னியாகுமரி, விருதுநகர், மயிலாடுதுறை மற்றும் புதுவை ஆகிய 10 தொகுதிகளில் காங்கிரஸ் கட்சி போட்டியிட உள்ளது.

இதில் கரூர் தொகுதியை காங்கிரஸ் கட்சிக்கு மீண்டும் ஒதுக்கி இருப்பது திமுக தொண்டர்களுக்கு பெரும் ஏமாற்றத்தைக் கொடுத்துள்ளது. கரூர், திண்டுக்கல், புதுக்கோட்டை, திருச்சி ஆகிய 4 மாவட்டங்களின் சட்டசபை தொகுதிகளான வேடசந்தூர், அரவக்குறிச்சி. கரூர். கிருஷ்ணராயபுரம், விராலிமலை, மணப்பாறை ஆகியவற்றைக் கொண்டது கரூர் லோக்சபா தொகுதி.

1957-ம் ஆண்டு முதல் 16 தேர்தல்களை எதிர்கொண்ட கரூர் தொகுதியில், அதிகபட்சமாக காங்கிரஸ் கட்சி 7 முறை வென்றுள்ளது. அண்ணாதிமுக 6 முறை வென்றுள்ளது. திமுக, தமிழ் மாநில காங்கிரஸ் தலா 1 தேர்தலில் வென்றுள்ளன. 1957 முதல் 1984-ம் ஆண்டு வரை கரூர் லோக்சபா தொகுதி எம்பிக்கள் அறியப்படாத முகங்களாக இருந்தனர். அண்ணா திமுகவின் தம்பிதுரை 4 முறை இத்தொகுதியில் வென்று விஐபி தொகுதியாக்கினார். திமுகவின் சீனியர்களில் ஒருவரான கேசி பழனிசாமி 2004-ல் இத்தொகுதியில் வென்றார். டெல்லி காங்கிரஸ் மேலிடத்துடன் மிக நெருக்கமான ஜோதிமணி தற்போது கரூர் தொகுதி எம்பியாக இருந்து வருகிறார்.

ஆனால் கரூர் லோக்சபா தொகுதியில் இந்த முறை திமுக போட்டியிட்டாக வேண்டும் என்பது அத்தொகுதி திமுக தொண்டர்களின் பெரும் எதிர்பார்ப்பாக இருந்தது. சென்னை அண்ணா அறிவாலயத்தில் நடைபெற்ற ஆலோசனைக் கூட்டத்திலும் இந்த கருத்தை திமுக தொண்டர்கள் முன்வைத்தனர். திமுக நிர்வாகிகள், தொண்டர்கள் அனைவருமே இந்த முறை எப்படியும் திமுக வேட்பாளர்தான் கரூர் லோக்சபா தொகுதியில் களமிறங்குவார் என்ற எதிர்பார்ப்புடன் இருந்தனர். ஆனால் தற்போது கரூர் லோக்சபா தொகுதி, மீண்டும் காங்கிரஸ் கட்சிக்கே ஒதுக்கப்பட்டிருப்பது மிகவும் ஏமாற்றமடைய வைத்திருக்கிறது என குமுறுகின்றனர் திமுகவினர்.

English summary

Sources said that DMK Cadres upset over Congress got Karu constituency for the Lok Sabha Election 2024