சென்னை சிக்னலில் விதிமீறல்: காட்டி கொடுத்த அதிநவீன கேமரா.. வசமாக சிக்கிய 10,905 பேருக்கு நோட்டீஸ்!

Published: Saturday, July 3, 2021, 22:43 [IST]

Subscribe to Oneindia Tamil

சென்னை: சென்னை சிக்னலில் விதிகளை மீறிய 10,905 பேர் அதிநவீன கேமரா மூலம் சிக்கினார்கள். அவர்கள் அனைவருக்கும் நோட்டீஸ் அனுப்பப்பட்டுள்ளது. சென்னையில் பெருகி வரும் மக்கள் தொகைக்கு ஏற்ப வாகனங்களும் பெருகிக் கொண்டே வருகின்றன.

பரபரப்பான காலை மற்றும் மாலை நேரங்களில் சாலைகளில் வாகனங்கள் ஒரு சேர குவிகின்றன. இதனால் வேலைக்கு நேரமாகி விட்டது என்ற அவசரத்தில் ஒரு சில வாகன ஓட்டிகளுக்கு சிக்னலில் நிற்காமல் செல்வது உள்ளிட்ட சாலை விதிகளை மீறுவது வழக்கமாகி விட்டது.

அதிநவீன கேமரா

இதனால் போக்குவரத்து விதிகளை மீறுபவர்களை அந்த நொடியிலேயே கண்டறிந்து அபராதம் விதிக்கும் தொழில் நுட்ப முறை சென்னையில் அமலுக்கு வந்துள்ளது. சென்னை அண்ணாநகர் ரவுண்டானா, சாந்தி காலனி, முகப்பேர், திருமங்கலம், உள்ளிட்ட 5 சிக்னல்களில் அதிநவீன கேமரா பொருத்தப்பட்டுள்ளது. இந்த அதிநவீன கேமரா மூலம் சிக்னல் விதிகளை மீறுபவர்கள் உடனடியாக கண்டறியப்படுவார்கள்.

காவல் கட்டுப்பாடு அறை

அதாவது போக்குவரத்து விதிமீறும் வாகனங்களின் பதிவு எண்கள் மிக தெளிவாக அதிநவீன கேமராக்களில் பதிவாகும். அவை பதிவு செய்யப்பட்டவுடன் சம்பந்தப்பட்ட வாகன உரிமையாளர்களின் செல்போன் எண்களுக்கு கட்டுப்பாட்டறையில் உள்ள கணினி மூலம் அபராத செலான்கள் அனுப்பப்படும். இந்த வசதிகளுடன் கூடிய அண்ணாநகர் போக்குவரத்து காவல் கட்டுப்பாட்டறை நேற்று முன்தினம் திறக்கப்பட்டது.

ஓடவும் முடியாது; ஒளியவும் முடியாது

அதிநவீன கேமரா விதிகளை மீறும் வாகன உரிமையாளர்களின் வாகன பதிவு எண்ணை(அந்த வாகனத்தின் நம்பர் பிளேட்) மிக தெளிவாக படம் பிடித்து கட்டுப்பாடு அறை சர்வருக்கு அனுப்பும். அங்கு இருந்து விதிகளை மீறிய வாகன உரிமையாளர்களின் செல்போன் எண்ணுக்கு அபராத செலான்கள் அனுப்பி விடும். முதலில், விதிகளை மீறும் வாகன உரிமையாளர்களின் செல்போனுக்கு விதிகளை மீறிய நோட்டீஸ் 10 நொடிகளில் அனுப்பபடும்.

10,905 பேருக்கு நோட்டீஸ்

இந்த நிலையில் இந்த அதிநவீன கேரமா மூலம் விதிகளை மீறிய 10,905 பேர் சிக்கியுள்ளனர். இந்த 10,905 பேரும் விதிகளை மீறியதற்கான விளக்கத்தை 7 நாட்களுக்குள் கொடுக்க வேண்டும். அப்படி இல்லையென்றால் அவர்களின் செல்போன் எண்ணுக்கு செல்போனுக்கு தானியங்கி முறையில் அபராத செலான்கள் அனுப்பபடும் என்று போலீஸ் அதிகாரிகள் தெரிவித்தனர்.

Published On July 3, 2021