பழைய வண்டி ஓட்றீங்களா.. உங்களுக்கு கட்டணம் எவ்வளவு தெரியுமா? மத்திய அரசு அதிரடி உத்தரவு

டெல்லி: 20 ஆண்டுகளுக்கு மேல் பழமையான வாகனங்களின் புதுப்பித்தல் கட்டணத்தை மத்திய அரசு அதிகரித்துள்ளது. இருசக்கர வாகனங்களுக்கு ரூ.1,000-ல் இருந்து ரூ.2 ஆயிரமாகவும், மூன்று சக்கர வாகனங்களுக்கு ரூ.3,500-ல் இருந்து ரூ.5 ஆயிரமாகவும் அதிகரித்துள்ளது. இறக்குமதி செய்யப்பட்ட இருசக்கர மற்றும் 3 சக்கர வாகனங்களுக்கு பதிவு சான்றிதழ் புதுப்பிக்கும் கட்டணம் ரூ.20 ஆயிரமாகவும், இறக்குமதியான 4 சக்கரம் அல்லது அதற்கு மேல் சக்கரங்களை கொண்ட வாகனங்களுக்கான கட்டணம் ரூ.80 ஆயிரமாகவும் உயர்த்தியுள்ளது.

பிஎஸ்-2 மாசு உமிழ்வு விதிமுறைகள் நடைமுறைக்கு வருவதற்கு முன்பு தயாரிக்கப்பட்ட வாகனங்கள் சுற்றுச்சூழலுக்கு அதிக கேடு விளைவிப்பவை என மத்திய அரசு வரையறுத்துள்ளது. எனவே, இத்தகைய வாகனங்களை பயன்பாட்டில் இருந்து படிப்படியாக நீக்க மத்திய சாலை போக்குவரத்து அமைச்சகம் திட்டமிட்டிருந்தது. இதற்காக ஒரு வரைவு அறிவிக்கையை வெளியிட்டது. இதன்படி, 20 ஆண்டுகளுக்கு மேல் பழமையான 2 சக்கர மற்றும் கார்களின் பதிவை புதுப்பிப்பதற்கான கட்டணம் முறையே ரூ.2 ஆயிரம் மற்றும் ரூ.10 ஆயிரமாக உயர்த்த திட்டடமிட்டது. இதற்கான வரைவு ஒன்றை மத்திய அரசு கடந்த பிப்ரவரி மாதம் வெளியிட்டது.

அந்த வரைவு அறிக்கையில். 15 ஆண்டுகளுக்கு மேல் பழமையான நடுத்தர வர்த்தக வாகனம் மற்றும் கனரக வாகன பதிவை புதுப்பிப்பதற்கான கட்டணம் முறையே ரூ.12 ஆயிரம் மற்றும் ரூ.18 ஆயிரமாக உயர்த்தப்பட உள்ளதாக அறிவிக்கப்பட்டது. இதே வாகனங்கள் 20 ஆண்டுகள் பழமையானதாக இருந்தால் புதுப்பிப்பு கட்டணம் முறையே ரூ.24 ஆயிரம் மற்றும் ரூ.36 ஆயிரமாக உயர்த்தப்படும் என கூறப்பட்டிருந்தது.

மத்திய அரசு கொண்டு வந்த இந்த கட்டண உயர்வு தற்போது அமலுக்கு வந்துள்ளது. இது தொடர்பான அறிவிப்பை மத்திய சாலை போக்குவரத்து மற்றும் நெடுஞ்சாலைகள் துறை அமைச்சகம் வெளியிட்டிருந்தது. அதன்படி 20 ஆண்டுகளுக்கு மேல் பழமையான இலகு ரக வாகனங்களுக்கான பதிவு புதுப்பித்தல் கட்டணம் ரூ.5 ஆயிரத்தில் இருந்து ரூ.10 ஆயிரமாக உயர்த்தப்பட்டிருக்கிறது.

இருசக்கர வாகனங்களுக்கு ரூ.1,000-ல் இருந்து ரூ.2 ஆயிரமாகவும், மூன்று சக்கர வாகனங்களுக்கு ரூ.3,500-ல் இருந்து ரூ.5 ஆயிரமாகவும் அதிகரிக்கப்பட்டு உள்ளது. இறக்குமதி செய்யப்பட்ட இருசக்கர மற்றும் 3 சக்கர வாகனங்களுக்கு பதிவு சான்றிதழ் புதுப்பிக்கும் கட்டணம் ரூ.20 ஆயிரமாகவும், இறக்குமதியான 4 சக்கரம் அல்லது அதற்கு மேல் சக்கரங்களை கொண்ட வாகனங்களுக்கான கட்டணம் ரூ.80 ஆயிரமாகவும் உயர்த்தப்பட்டு உள்ளது. 20 ஆண்டுகளுக்கு மேல் பழமையான வாகனங்கள் பயன்படுத்துவதை குறைக்கவே இந்த நடவடிக்கை எடுக்கப்படுவதாக மத்திய அரசு அறிவுறுத்தியுள்ளது.

English summary

The central government has increased the renewal fee for vehicles that are more than 20 years old. For two-wheelers, it has been increased from Rs. 1,000 to Rs. 2,000, and for three-wheelers, it has been increased from Rs. 3,500 to Rs. 5,000.