PAN Card: புதிய பான் கார்டுக்கு விண்ணப்பிக்க இனி ஆதார் மட்டும் போதாது! என்னென்ன ஆவணங்கள் தேவை?

சென்னை: இந்திய குடிமகனின் நிதி அடையாளமாகத் திகழும் பான் கார்டு தொடர்பான விதிகளில் மத்திய அரசு முக்கிய மாற்றங்களைக் கொண்டு வந்துள்ளது. வருமான வரித் தாக்கல் முதல் வங்கிப் பரிவர்த்தனைகள் வரை அனைத்திற்கும் அவசியமான இந்த 10 இலக்க எண் அட்டைக்கு விண்ணப்பிக்க வேண்டுமானால் ஆதார் மட்டும் போதாது என்கிறார்கள்.

ஆம்! இதுவரை பான் கார்டு பெற ஆதார் அட்டை மட்டுமே போதுமானதாக இருந்தது. ஆனால், வரும் ஏப்ரல் 1, 2026 முதல் பான் கார்டுக்கு விண்ணப்பிக்கும்போது, பிறந்த தேதியை உறுதிப்படுத்தும் ஆவணத்தை தனியாகச் சமர்ப்பிப்பது கட்டாயமாக்கப்பட்டுள்ளது.

மத்திய பொது சேவை அமைப்பு இது குறித்து விளக்குகையில்: "விண்ணப்ப நடைமுறையை இன்னும் துல்லியமாக்க இந்த மாற்றம் செய்யப்பட்டுள்ளது. மார்ச் 31-ஆம் தேதிக்குள் விண்ணப்பிப்போருக்கு பழைய நடைமுறைப்படி ஆதார் மட்டுமே போதுமானது. ஆனால், ஏப்ரல் 1 முதல் கூடுதல் ஆவணம் அவசியம்.

பிறந்த தேதிக்கான ஆதாரமாக எவற்றை சமர்ப்பிக்கலாம்?

விண்ணப்பத்துடன் கீழே உள்ளவற்றில் ஏதேனும் ஒன்றை இணைக்கலாம்:

பிறப்புச் சான்றிதழ் (Birth Certificate)

வாக்காளர் அடையாள அட்டை (Voter ID)

பாஸ்போர்ட் (Passport)

ஓட்டுநர் உரிமம் (Driving License)

பத்தாம் வகுப்பு அல்லது அதற்கு மேற்பட்ட கல்விச் சான்றிதழ்கள் (Mark Sheets/TC)

பான் கார்டு ஏன் இவ்வளவு முக்கியம்?

வருமான வரித் தாக்கல்: ஐடி ரிட்டர்ன்ஸ் (IT Returns) தாக்கல் செய்ய பான் எண் கட்டாயம்.

வங்கி கணக்கு: சேமிப்பு அல்லது நடப்புக் கணக்கு தொடங்க இது அவசியம்.

பெரிய பணப் பரிவர்த்தனைகள்: 50,000 ரூபாய்க்கு மேல் டெபாசிட் செய்யவோ அல்லது எடுக்கவோ பான் எண் தேவை.

சொத்து விற்பனை: வீடு அல்லது நிலம் வாங்கும்போது/விற்கும்போது பான் எண் கேட்கப்படும்.

அடையாளச் சான்று: இது இந்திய அரசாங்கத்தால் அங்கீகரிக்கப்பட்ட ஒரு அதிகாரப்பூர்வ அடையாள ஆவணம்.

பான் கார்டுக்கு ஆன்லைனில் விண்ணப்பிப்பது எப்படி?

நீங்கள் வீட்டிலிருந்தே எளிதாக விண்ணப்பிக்க கீழ்க்கண்ட படிகளைப் பின்பற்றவும்:

இணையதளம்: வருமான வரித்துறையின் அதிகாரப்பூர்வ இணையதளமான NSDL (இப்போது Protean) அல்லது UTIITSL பக்கத்திற்குச் செல்லவும்.

விண்ணப்ப வகை: 'New PAN - Indian Citizen (Form 49A)' என்பதைத் தேர்ந்தெடுக்கவும்.

தகவல்களைப் பதிவிடவும்: உங்கள் பெயர், கைபேசி எண், மின்னஞ்சல் முகவரி மற்றும் பிறந்த தேதி ஆகியவற்றைச் சரியாகப் பதிவிடவும்.

ஆவணங்களைப் பதிவேற்றவும்: உங்கள் புகைப்படம், கையெழுத்து மற்றும் ஆதார் அட்டையுடன் சேர்த்து (ஏப்ரல் 1 முதல்) பிறந்த தேதிக்கான ஆதாரத்தைப் பதிவேற்றவும்.

கட்டணம் செலுத்துதல்: இந்திய முகவரிக்கு சுமார் 107 ரூபாய் (ஜிஎஸ்டியுடன்) ஆன்லைன் மூலம் செலுத்த வேண்டும்.

சரிபார்ப்பு: ஆதார் அடிப்படையில் 'e-KYC' முறையில் சரிபார்த்தால், மிக விரைவாகவே இ-பான் (e-PAN) உங்கள் மின்னஞ்சலுக்கு வந்துவிடும். அட்டை தபால் மூலம் உங்கள் வீட்டிற்கு வரும்.

English summary

The Government of India has introduced significant changes to the rules governing PAN cards, a crucial financial identity for citizens used in income tax filing and banking transactions. As per the latest update, Aadhaar alone is no longer sufficient to apply for a PAN card.