தொகுதி பங்கீட்டில் இழுபறி.. டெல்லி செல்லும் கதர் தலைகள்! ராகுல் காந்தியுடன் முக்கிய மீட்டிங்
சென்னை: தமிழகத்தில் விரைவில் சட்டப்பேரவை தேர்தல் நடைபெற உள்ளது. ஆனால், இன்னும் திமுக தனது கூட்டணி கட்சிகளுடன் தொகுதி பங்கீட்டை முடிக்கவில்லை. இப்படி இருக்கையில் பிப்.10ம் தேதி தமிழ்நாடு காங்கிரஸ் கமிட்டியின் மூத்த தலைவர்கள் மற்றும் புதியதாக நியமிக்கப்பட்ட மாவட்ட தலைவர்கள் டெல்லி செல்கின்றனர். அங்கு ராகுல் காந்தியை சந்தித்து இந்த விஷயம் தொடர்பாக பேசுகின்றனர்.
இந்தப் பயணத்தின் முக்கிய அம்சமாக, காங்கிரஸ் முன்னாள் தலைவர் ராகுல் காந்தி, புதிதாக நியமிக்கப்பட்ட 74 தமிழகப் பிரதேச காங்கிரஸ் கமிட்டி மாவட்டத் தலைவர்களுடன் ஆலோசனை நடத்துகிறார். கட்சியின் அமைப்பு பலத்தை வலுப்படுத்தி, தேர்தல் உத்திகளை வகுப்பதே இதன் நோக்கம்.
ராகுல் காந்தி ஏற்கனவே மாநில அளவிலான தலைவர்களுடன் பேசியுள்ளார். மாவட்டத் தலைவர்களுடனான இந்த சந்திப்பு, கூட்டணி ஒருங்கிணைப்பு, கள அளவில் மக்களைத் திரட்டுதல், மாநில தேர்தல் செயல்திறனை மேம்படுத்துதல் மீது கவனம் செலுத்தும். பூத் நிலை வரை கட்சியைப் பலப்படுத்துவது குறித்தும் அவர் வழிகாட்டுவார்.
இக்கூட்டத்தில் அகில இந்திய காங்கிரஸ் தலைவர் மல்லிகார்ஜுன் கார்கே, பொதுச் செயலாளர் கே.சி. வேணுகோபால், தமிழகப் பொறுப்பாளர் கிரீஷ் சோடங்கர், தமிழ்நாடு காங்கிரஸ் தலைவர் கே. செல்வப்பெருந்தகை உள்ளிட்ட முக்கிய தலைவர்கள் பங்கேற்பார்கள்.
திமுக தங்கள் கூட்டணிக் கட்சிகளுடன் தொகுதிப் பங்கீட்டுப் பேச்சுவார்த்தையை தாமதப்படுத்துவதாக காங்கிரஸ் தலைவர்கள் குற்றம்சாட்டுகின்றனர். இதனால் இவர்களின் டெல்லி பயணம் அரசியல் முக்கியத்துவம் பெறுகிறது. காங்கிரஸ் அமைத்த தமிழகப் பொறுப்பாளர் கிரீஷ் சோடங்கர் தலைமையிலான குழு, டிசம்பர் 3 அன்று முதல்வர் மு.க. ஸ்டாலினை சந்தித்துப் பேசியது.
ஆனால், ஆளும் திமுக இதுவரை பேச்சுவார்த்தைக்கான குழுவை அமைக்கவில்லை. பிப்ரவரி 3 அன்று ஒரு குழு அமைக்கப்படும் என ஸ்டாலின் அறிவித்தபோதும், அக்குழு உருவாகவில்லை. இச்சூழலில், தமிழக காங்கிரஸ் தலைமைத்துவத்தின் டெல்லி பயணம், தேர்தலுக்கான கூட்டணிக் கட்டமைப்பு வியூகத்தில் முக்கியமான நகர்வாக பார்க்கப்படுகிறது.
Click it and Unblock the Notifications
Sign in with Google