கைது நடவடிக்கை, ஆண்மை பரிசோதனையில் இருந்து தப்பிய சீமான்!விஜயலட்சுமி கேஸில் போலீசில் ஆஜராகவில்லை!

சென்னை: நடிகை விஜயலட்சுமி தந்த திருமண மோசடி, பலாத்காரம் மற்றும் கருக்கலைப்பு புகார்கள் தொடர்பான விசாரணைக்கு நாம் தமிழர் கட்சியின் தலைமை ஒருங்கிணைப்பாளர் இன்று சென்னை வளசரவாக்கம் காவல்நிலையத்தில் ஆஜராகவில்லை. சீமான் தரப்பு வழக்கறிஞர்கள், அவர் ஆஜராகாத காரணத்தை விளக்கி கோயம்பேடு காவல் துணை ஆணையர் அதிவீரபாண்டியனிடம் கடிதம் கொடுத்தனர்.

தம்மை திருமணம் செய்து கொள்வதாக ஏமாற்றி பலாத்காரம் செய்தார்; பல முறை கருக்கலைப்புக்குள்ளாக்கினார் சீமான் என்பதுதான் நடிகை விஜயலட்சுமியின் புகார். இந்த புகார் அடிப்படையில் சென்னை வளசரவாக்கம் போலீசார் சீமான் மீது வழக்கு பதிவு செய்தனர். இந்த வழக்கை ரத்து செய்ய கோரி சீமான் தாக்கல் செய்த மனுவை சென்னை உயர்நீதிமன்றம் தள்ளுபடி செய்தது.

சீமான் மனுவை டிஸ்மிஸ் செய்த சென்னை உயர்நீதிமன்ற நீதிபதி இளந்திரையன், பலாத்கார புகார் என்பதால் இது தீவிரமானது; விஜயலட்சுமியே புகாரை வாபஸ் பெற்றிருந்தாலும் போலீசாருக்கு விசாரணை செய்ய அதிகாரம் உண்டு. 12 வாரங்களில் விசாரித்து அறிக்கை தாக்கல் செய்ய வேண்டும் என உத்தரவிட்டார்.

இதனடிப்படையில் சீமான் மீதான வழக்கை போலீசார் தீவிரமாக விசாரித்து வருகின்றனர். விஜயலட்சுமி வழக்கில் இதுவரை 15 சாட்சிகள் விசாரிக்கப்பட்டுள்ளனர். அத்துடன் பெங்களூரில் உள்ள விஜயலட்சுமியிடம் 3 மணிநேரத்துக்கும் மேலாக போலீசார் விசாரித்து வாக்குமூலம் பெற்றனர். இந்த விசாரணையின் போது, போலீசாரிடம் சீமானுக்கு எதிரான பல புதிய ஆதாரங்களை விஜயலட்சுமி கொடுத்ததாகவும் ஊடக தகவல்கள் தெரிவிக்கின்றன.

இதனிடையே சென்னை வளசரவாக்கம் காவல் நிலையத்தில் இன்று சீமான் ஆஜராக உத்தரவிடப்பட்டிருந்தது. இன்று விசாரணைக்கு சீமான் ஆஜராகும் நிலையில் அவரிடம் ஆண்மை பரிசோதனை நடத்தவும் போலீசார் திட்டமிட்டிருந்தனர்; சீமானை கைது செய்து ஆண்மை பரிசோதனை நடத்துவது தொடர்பாகவும் போலீசார் சட்ட ஆலோசனை நடத்தியதாகவும் கூறப்பட்டது.

இந்த நிலையில் இன்று கோயம்பேடு காவல் துணை ஆணையர் அதிவீர பாண்டியனிடம் சீமானின் வழக்கறிஞர்கள் ஒரு கடிதம் கொடுத்தனர். அதில், சீமான் ஏற்கனவே திட்டமிட்ட சுற்றுப் பயணத்தை மேற்கொண்டிருப்பதால் இன்றைய விசாரணைக்கு ஆஜராக இயலவில்லை; வேறு ஒருநாளில் விசாரணைக்கு ஆஜராவார் என தெரிவிக்கப்பட்டிருந்தது.

இனால் சீமான், கைது நடவடிக்கை மற்றும் ஆண்மை பரிசோதனை ஆகியவற்றில் இருந்து இன்று தப்பி இருக்கிறார் எனவும் கூறப்படுகிறது

English summary

Naam Tamilar Katchi's Chief Coordinator, Seeman, did not appear today at the Chennai Valasaravakkam police station for the investigation related to actress Vijayalakshmi’s allegations of marriage fraud, rape, and forced abortion.