எஸ்பி வருண்குமார் vs சீமான்- நாதக வழக்கறிஞர் பாசறை மாநிலச் செயலாளர் சேவியர் பெலிக்ஸ் திடீர் நீக்கம்!

Published: Wednesday, August 21, 2024, 10:50 [IST]

Subscribe to Oneindia Tamil

சென்னை: திருச்சி எஸ்பி வருண்குமார் மற்றும் நாம் தமிழர் கட்சி தலைமை ஒருங்கிணைப்பாளர் சீமான் விவகாரத்தில் தற்போது நாம் தமிழர் கட்சியின் வழக்கறிஞர் பாசறை மாநிலச் செயலாளர் சேவியர் பெலிக்ஸ் அக்கட்சியில் இருந்து திடீரென நீக்கப்பட்டுள்ளது பரபரப்பை ஏற்படுத்தியுள்ளது. தம் மீது அவதூறு, தமக்கும் குடும்பத்தாருக்கும் கொலை மிரட்டல் உள்ளிட்டவைகளுக்காக சீமானுக்கு எஸ்பி வருண்குமார் வழக்கறிஞர் நோட்டீஸ் அனுப்பிய விவகாரத்தில்தான் சேவியர் பெலிக்ஸ், நாம் தமிழர் கட்சியில் இருந்து டிஸ்மிஸ் செய்யப்பட்டதாகவும் கூறப்படுகிறது.

கள்ளக்குறிச்சி சட்டசபை இடைத்தேர்தல் பிரசாரத்தின் போது மறைந்த முன்னாள் முதல்வர் கருணாநிதியை இழிவுபடுத்தி பாடியதால் நாம் தமிழர் கட்சியின் மாநில கொள்கை பரப்புச் செயலாளர் சாட்டை துரைமுருகன் கைது செய்யப்பட்டார். அதன் பின்னர் சாட்டை துரைமுருகனின் செல்போனில் இருந்த சீமான் தொடர்பான பல்வேறு ஆடியோக்கள் வெளியாகின. இதற்கு திருச்சி எஸ்பி வருண்குமார்தான் காரணம் என நாம் தமிழர் கட்சியின் குற்றம் சாட்டினர்.

திருச்சி எஸ்பி வருண்குமாரை நாம் தமிழர் கட்சியின் தலைமை ஒருங்கிணைப்பாளர் சீமான் பொது மேடைகளில் பெயரைக் குறிப்பிட்டு ஜாதிய கண்ணோட்டத்துடன் செயல்படுவதாக பகிரங்கமாக குற்றம் சாட்டியிருந்தார். சீமான் உள்ளிட்டோரின் இந்த பேச்சுக்கு எதிராக திருச்சி எஸ்பி வருண்குமார் வழக்கறிஞர் மூலம் நோட்டீஸ் அனுப்பி இருந்தார். மேலும் திருச்சி தில்லை நகர் காவல் நிலையத்தில் சீமான், சாட்டை துரைமுருகன் உள்ளிட்ட 21 பேர் மீதும் எஸ்பி வருண்குமார் புகார் கொடுத்தார். இந்த புகாரின் அடிப்படையில் சிலர் கைது செய்யப்பட்டனர்.

இந்த நிலையில் சீமான் சார்பாக நாம் தமிழர் கட்சியின் வழக்கறிஞர் பாசறை மாநிலச் செயலாளர் சேவியர் பெலிக்ஸ், திருச்சி எஸ்பி வருண்குமாரின் விளக்கம் கேட்ட நோட்டீஸுக்கு பதில் அனுப்பி வைக்கப்பட்டதாக கூறப்படுகிறது. அதில், எஸ்பி வருண்குமாரின் ஜாதி என்ன என்பதே தெரியாது; சாட்டை துரைமுருகன் பேச்சை நம்பி தாம் பேசியதாகவும் சீமான் தரப்பில் தெரிவிக்கப்பட்டுள்ளதாகவும் சமூக வலைதளங்களில் அந்த விளக்க கடிதம் பரவியது. இதனால் சீமானுக்கு நெருக்கடி ஏற்பட்டது.

இந்த நிலையில்தான் நாம் தமிழர் கட்சியின் கொள்கைகளுக்கு எதிராக செயல்பட்டதாக அக்கட்சியின் வழக்கறிஞர் பாசறை மாநிலச் செயலாளர் சேவியர் பெலிக்ஸ் திடீரென நாம் தமிழர் கட்சியில் இருந்து நீக்கப்படுவதாக சீமான் அறிவித்துள்ளார் என சாட்டை துரைமுருகனின் @SaattaiOnline எக்ஸ் பக்கத்தில் தெரிவிக்கப்பட்டுள்ளது.

Published On August 21, 2024