Silver Rate: புதிய உச்சம் தொட்ட வெள்ளி விலை! தமிழகத்தில் white metal-க்கு தட்டுப்பாடு ஏன்?

சென்னை: வெள்ளி விலை தொடர்ந்து அதிகரித்துக் கொண்டே செல்லும் நிலையில் அதில் முதலீடு செய்ய பலர் ஆர்வம் காட்டி வருவதால் தமிழகத்தில் வெள்ளிக்கு தட்டுப்பாடு ஏற்பட்டுள்ளது. இன்றைய தினம் வெள்ளியின் விலை கிராம் ரூ 206 ஆகும்.

தங்கத்தில் பல்வேறு நகைகளை வாங்கி போட்டுக் கொண்டாலும் பலர் காலில் அணியும் மெட்டி, கொலுசு, தண்டை உள்ளிட்டவைகளை வெள்ளியில் போடுவது வழக்கம். அது போல் வெள்ளியில் குத்துவிளக்கு, காமாட்சி அம்மன் விளக்கு, சபரிமலை விளக்கு, பூஜை சாமான் செட், தட்டு, டம்ளர், கிண்ணம் உள்ளிட்டவை விற்பனை செய்யப்படுகிறது.

அது போல் வரலட்சுமி நோன்புக்காக சுவாமியின் உருவமும் வெள்ளியினால் ஆனதுதான். இப்படிப்பட்ட வெள்ளியின் விலை கடந்த ஆண்டு பிப்ரவரி மாதத்தில் கிராம் 75 முதல் 77 ஆக இருந்த நிலையில் தற்போது வெள்ளி ஒரு கிராம் ரூ 206 க்கு விற்பனையாகிறது.

இதனால் குழந்தைகளுக்கு காதில் போடும் தோடு, கால் கொலுசு ஆகியவற்றை வாங்க முடியாமல் மக்கள் திணறி வருகிறார்கள். குழந்தை பிறந்தால் தாய் வீட்டில் இருந்து வெள்ளி அரைஞான்கயிறு, வெள்ளி காப்பு, வெள்ளி பாலாடை, சிறிய கிண்ணம் உள்ளிட்டவை சீதனமாக வழங்குவதற்கு பலர் திண்டாடுகிறார்கள்.

தமிழக நகைக் கடைகளில் தினமும் 20 ஆயிரம் கிலோ வெள்ளி விற்பனையாகிறதாம். மின்சார வாகனங்கள், எலக்ட்ரானிக்ஸ் சாதனங்கள், சூரியசக்தி மின் சாதனம், வான்வெளி, விண்வெளி சாதனங்கள் உள்ளிட்டவைகளில் அதிக அளவு வெள்ளி பயன்படுத்தப்படுகிறது.

மொத்த வெள்ளி பயன்பாட்டில் 75 சதவீதமாக இருந்த தொழிற்சாலைகளின் பங்கு தற்போது 85 சதவீதமாக அதிகரித்துள்ளது. முதலீட்டாளர்கள் பாதுகாப்பு கருதி, தங்கத்தின் மட்டுமில்லாமல் வெள்ளியிலும் அதிக அளவில் முதலீடு செய்கிறார்கள்.

இதனால் தங்கத்தை போல் வெள்ளியின் விலையும் அதிகரித்து வருகிறது. கடந்த ஜனவரி மாதம் ஒரு கிராம் 98 ஆக இருந்த வெள்ளி விலை தற்போது இந்த 10 மாதங்களில் ரூ 206 ஆக உயர்ந்துள்ளது. இதனால் வெள்ளியை பலர் வாங்குகிறார்கள். வெள்ளிக்கட்டிகளுக்கு தட்டுப்பாடு நிலவுகிறது.

வெள்ளியில் முதலீடு செய்யக் கூடிய மியூச்சுவல் ஃபண்ட் திட்டங்களும் கொண்டு வரப்படலாம். வெள்ளி உயர்வுக்கான காரணங்களை நிபுணர்கள் ஆராய்ந்து வந்தனர்.

இந்த நிலையில் பேட்டரி, சூரிய சக்தி மின் சாதனங்களுக்கு வெள்ளியை பயன்படுத்துவதால் பசுமை உலோகமாக கருதப்படுகிறது. மற்ற நாடுகளை விட நமது நாட்டில் வெள்ளி விலை 8 சதவீதம் கூடுதலாக இருப்பதாக நிபுணர்கள் கூறுகிறார்கள்.

அடுத்த ஆண்டு ஜனவரி மாதம் வெள்ளியின் விலை ஒரு கிராம் ரூ 250 ஆக இருக்கும் என்கிறார்கள். அது போல் ஒரு கிலோ வெள்ளி ரூ 2.5 லட்சத்தை எட்டும் என்றும் கணித்துள்ளனர்.

English summary

With silver prices continuing to rise, reaching ₹206 per gram today, many investors are showing keen interest in buying silver. This growing demand has led to a shortage of silver supply across Tamil Nadu, according to market sources.