முட்டுக்காடு டூ மாமல்லபுரம்.. முதல்வர் ஸ்டாலின் உற்சாக சைக்கிள் பயணம்.. மக்களோடு டீ குடித்து அசத்தல்
சென்னை: முட்டுக்காடு முதல் மாமல்லபுரம் வரை, சைக்கிள் ஓட்டி அசத்தியுள்ளார் தமிழக முதல்வர் மு.க.ஸ்டாலின்.
Recommended Video
முதலமைச்சர் மு.க. ஸ்டாலின் தனது உடல் நலனில் எப்போதுமே, மிகுந்த அக்கறை கொண்டவர். உடற்பயிற்சி, சைக்கிள் ஓட்டுவதில் ஆர்வம் கொண்டவர்.
தேர்தலில் வெற்றிபெற்று முதலமைச்சரான பின்னரும் கடுமையான அரசியல் மற்றும் அரசு பணிகளுக்கு இடையேயும் தினமும் ஜிம்மில் உடற்பயிற்சி செய்வதை வாடிக்கையாக வைத்துள்ளார் ஸ்டாலின். மேலும், அவ்வப்போது சைக்கிள் ஓட்டி உடற்பயிற்சி செய்வதும் வழக்கம்.
வெறும் 4 மாதங்களில் 202 வாக்குறுதிகள் நிறைவேற்றிய இந்தியாவின் ஒரே அரசு இதுதான்: முதல்வர் ஸ்டாலின்
சைக்கிள் பயணம் வழக்கம்
அது மட்டுமல்ல, வாரத்திற்கு 2 முறை சென்னையை அடுத்த முட்டுக்காட்டில் இருந்து மாமல்லபுரம் வரை அதிகாலை நேரத்தில் சைக்கிளில் செல்வார். ஆனால், தேர்தல் பிரசாரத்திற்காக தமிழகம் முழுவதும் சுற்றுப்பயணம் மேற்கொண்டதால், கடந்த சில வாரங்களாக அவரால் சைக்கிள் பயணம் மேற்கொள்ள முடியவில்லை.
மீண்டும் நீண்ட தூரம்
இந்த நிலையில், மீண்டும் சைக்கிள் பயிற்சியை அவர் தொடங்கியுள்ளார். ஏற்கனவே சமீபத்தில் சைக்கிள் பயணம் சென்றாலும் குறைந்த தூரம் தான் சென்றார். அப்போது அந்த புகைப்படங்களை வெளியிட்டார். ஆனால் தற்போது முட்டுக்காட்டில் இருந்து மாமல்லபுரம் வரை, நீண்ட தூரம் மீண்டும் அவர் சைக்கிள் ஓட்டியுள்ளார்.
கையுறை, ஹெல்மெட்
இன்று அதிகாலை 5 மணிக்கு முட்டுக்காட்டிற்கு மு.க.ஸ்டாலின் வந்தார். அங்கிருந்து மாமல்லபுரம் நோக்கி அவர் சைக்கிள் ஓட்டியபடி புறப்பட்டார். சைக்கிள் ஓட்டும்போது, அதற்கான உடை, கையுறை, ஹெல்மெட் அணிந்து மு.க.ஸ்டாலின் சைக்கிள் ஓட்டிச் சென்றார்.
பொதுமக்கள் செல்ஃபி
அவர் சென்ற வழிநெடுகிலும் சாலையோரம் சென்ற பொதுமக்கள் அவரை அடையாளம் கண்டுகொண்டு வணக்கம் தெரிவித்தனர். அவரும் சைக்கிள் ஓட்டியபடியே பதிலுக்கு வணக்கம் தெரிவித்து பயணத்தை தொடர்ந்தார். சில இடங்களில் மக்கள் கோரிக்கையை ஏற்று அவர்களோடு செல்பி எடுத்துக் கொண்டார்.
தேனீர் சாப்பிட்ட ஸ்டாலின்
பயணத்தின்போது, மாமல்லபுரம் சாலையில் உள்ள தேநீர் கடையில் திடீரென அமர்ந்து தேநீர் அருந்தினார். தமிழகத்தின் முதல்வர் சாலையில் உள்ள கடையில் அமர்ந்து தேநீர் அருந்துவதை அப்பகுதி மக்கள் வந்து ஆச்சரியமாக பார்த்தனர். கூட சேர்ந்து டீ குடித்தனர். இந்த புகைப்படங்கள் இப்போது சமூக வலைதளங்களில் வைரலாகி வருகிறது.