சென்னையின் 15 இடங்களில் நடக்கும்.. தரமான சம்பவம்.. மொத்தமாக மாறும் முக்கிய ஏரியாக்கள்.. அசத்தல்

சென்னை: சென்னை பெருநகர வளர்ச்சி முகமை (CMDA) தனது நீல-பச்சைத் (Blue-Green initiative) திட்டத்தின் கீழ் 2026-ஆம் ஆண்டுக்குள் 15 பூங்காக்களை மேம்படுத்தவும், புனரமைக்கவும் திட்டமிட்டுள்ளது.

கே.கே. நகர், அண்ணா நகர், ராமாபுரம் போன்ற பகுதிகளில் இந்த மேம்பாட்டுப் பணிகள் நடைபெறவுள்ளன. மேலும், வடசென்னையில் நான்கு "ஸ்பாஞ்ச் பூங்காக்களையும்" இந்தத் திட்டம் உள்ளடக்கியது.

சென்னை புதிய பூங்கா

இந்த புதிய பூங்காக்களில் வெளிப்புற உடற்பயிற்சி நிலையங்கள், பிளாசாக்கள், ஜாகிங் தடங்கள், ஆம்பிதியேட்டர்கள் மற்றும் நீர் உறிஞ்சும் குளங்கள் போன்ற நவீன வசதிகள் இடம்பெறும். ஆனாலும், சிந்தாதிரிப்பேட்டையில் உள்ள மே தினப் பூங்கா போன்ற ஏற்கனவே உள்ள பூங்காக்களின் பராமரிப்பு நிலைமை கவலைக்குரியதாக உள்ளது.

தற்போதுள்ள பூங்காக்களின் மோசமான பராமரிப்பு நிலைமை ஒரு சவாலாகக் கருதப்படுகிறது. கலைஞர் நூற்றாண்டு பூங்காவில் உள்ளதைப் போல, குறிப்பிட்ட சில வசதிகளுக்கு கட்டணம் வசூலிப்பதன் மூலம் சிறந்த பராமரிப்பு மற்றும் மேம்பாட்டிற்கான நிதியைத் திரட்டலாம் என நிபுணர்கள் பரிந்துரைத்துள்ளனர். இது பூங்காக்களின் நிலைமையை மேம்படுத்த உதவும் என எதிர்பார்க்கப்படுகிறது.

சென்னை புதிய கடற்கரை

சென்னை மாநகராட்சி திருவான்மியூர், பாலவாக்கம், உத்தண்டி மற்றும் மெரினா கடற்கரையை நீலக்கொடி கடற்கரைகளாக மேம்படுத்தும் நடவடிக்கைகளை தொடங்கியுள்ளது.

நீச்சல் குளம் அருகே உள்ள மெரினா கடற்கரையை நீலக்கொடி கடற்கரையாக மாற்றும் பணி ஏறக்குறைய முடிவடைந்துள்ளது. புதிய வசதிகள் இந்த மாத இறுதிக்குள் திறந்து வைக்கப்படும். இந்த முயற்சிக்கு மக்களிடையே நல்ல வரவேற்பு கிடைத்துள்ளது. மேலும் மற்ற கடற்கரைகளிலும் இந்த திட்டத்தை செயல்படுத்த இது ஊக்கமளித்துள்ளது என மாநகராட்சி அதிகாரி ஒருவர் தெரிவித்தார்.

இந்த திட்டம் ஒவ்வொரு கடற்கரையிலும் 10-20 ஏக்கர் பரப்பளவில் மேற்கொள்ளப்படும். கடலோர ஒழுங்குமுறை மண்டலத்தின் (CRZ) விதிமுறைகளை பின்பற்றி தமிழ்நாடு நிலையான கடல் வளங்கள் மற்றும் நீலப் பொருளாதாரத்தை பயன்படுத்துதல் (TN-SHORE) மற்றும் சுற்றுச்சூழல் மற்றும் காலநிலை மாற்றத் துறை ஆகியவை இந்த திட்டத்திற்கான பகுதியை தேர்ந்தெடுக்கும்.

மெரினா கடற்கரை

மெரினா கடற்கரை நீச்சல் குளத்தை சுற்றி 30 ஏக்கர் பரப்பளவில் 40 மூங்கில் இருக்கைகள், 20 குடைகள், நான்கு கண்காணிப்பு கோபுரங்கள், விளையாட்டு உபகரணங்களுடன் கூடிய நான்கு குழந்தைகள் விளையாட்டு பகுதிகள், இரண்டு செல்ஃபி புள்ளிகள், கண்காணிப்புக்காக 20 கேமராக்கள், திறந்தவெளி உடற்பயிற்சி உபகரணங்கள் மற்றும் 24 ஜோடி மூங்கில் குப்பைத் தொட்டிகள் உள்ளிட்ட பல வசதிகளை மாநகராட்சி ஏற்கனவே உருவாக்கியுள்ளது. மேலும் 40 அடி அகலம் மற்றும் 30 அடி உயரம் கொண்ட மூங்கில் வளைவு, தியான இடம் (30 அடிx30 அடி) மற்றும் வாசிப்பு இடம் (16 அடிx16 அடி), 30 சக்கர நாற்காலிகள் மற்றும் கழிப்பறைகள் உள்ளிட்ட வசதிகளும் ஏற்படுத்தப்பட்டுள்ளன. மெரினா கடற்கரையின் தூய்மை மற்றும் பராமரிப்பு பணிகளை மேற்கொள்வதற்கான பொறுப்பை உப்ராசர் நிறுவனத்திடம் சென்னை மாநகராட்சி ஒப்படைத்துள்ளது. இப்பணி அதிகாரப்பூர்வமாக இன்று முதல் தொடங்கப்பட்டுள்ளது.

மெரினா கடற்கரை தூய்மைப் பணிகள் & திட்டங்கள்

தொழிலாளர் சிலை முதல் கலங்கரை விளக்கம் வரையிலான 2.4 கிலோமீட்டர் தொலைவில் உள்ள கடற்கரையில், தூய்மைப் பணிகளை மேற்கொள்ள 100 பணியாளர்கள் ஈடுபடுத்தப்படுவார்கள். இப்பணியாளர்கள் கடற்கரையை சுத்தமாக வைத்திருக்க முழு ஒத்துழைப்பு வழங்குவார்கள்.

இப்பணியில் ஈடுபடும் 70 ஊழியர்கள் காலை 6 மணி முதல் மதியம் 2 மணி வரை பணியாற்றுவார்கள். அதே போல், மீதமுள்ள 30 பேர் மதியம் 2 மணி முதல் இரவு 10 மணி வரை பணியில் ஈடுபடுவார்கள். மணற்பரப்பை சுத்தம் செய்ய டிராக்டர்கள் தொடர்ந்து பயன்படுத்தப்படும் என தெரிவிக்கப்பட்டுள்ளது.

மாநகராட்சி வெளியிட்டுள்ள அறிவிப்பில், மெரினா கடற்கரையை சுத்தமாகவும், குப்பைகள் இல்லாமலும் பராமரிக்க பொது மக்கள் ஒத்துழைப்பு அளிக்க வேண்டும் எனக் கேட்டுக்கொள்ளப்பட்டுள்ளது. கடற்கரையை தூய்மையாக வைத்திருக்க பொதுமக்களின் ஆதரவு மிகவும் அவசியம்.

மெரினா கடற்கரையின் தூய்மைப் பணிகளை மேற்கொள்வதன் மூலம் இப்பகுதிக்கு வரும் பொதுமக்கள் சுத்தமான மற்றும் சுகாதாரமான சுற்றுச்சூழலைப் பெறுவார்கள். இது சென்னையின் அடையாளமாகத் திகழும் கடற்கரையின் அழகை மேம்படுத்தும். உப்ராசர் நிறுவனம் இப்பணியை மேற்கொள்வதால், கடற்கரையை தூய்மையாகப் பேணுவதற்கான நடவடிக்கைகள் மேம்படுத்தப்படும். இதன் மூலம், சென்னையின் முக்கிய சுற்றுலாத்தலமான மெரினா கடற்கரையை சிறப்பாக பராமரிக்க முடியும்.

English summary

The Chennai Metropolitan Development Authority will build and redevelop 15 parks