திசைமாறிய திருமாவளவன்.. திடீரென தேர்தல் ‘ரிவர்ஸ்’ கியர்.. அப்செட்டான திமுக! இதான் ரியல் காரணம்?

Updated: Sunday, April 5, 2026, 7:19 [IST]

Subscribe to Oneindia Tamil

சென்னை: தமிழக சட்டசபை தேர்தலில் முதலில் போட்டி என்று கூறி குழப்பத்தை ஏற்படுத்திய விசிக தலைவர் திருமாவளவன் இப்போது போட்டியில்லை என்று கூறி பின்வாங்கி உள்ளார்.

பொதுவாக அரசியல் கொள்கை என்னவாக இருந்தாலும்.. திருமா இது போன்ற முடிவுகளை எடுக்க கூடியவர் இல்லை. எப்போதும் அணு அணுவாகத் திட்டமிடும் திருமாவளவன், இந்த முறை ஏனோ 'தடுமாறி' நிற்கிறார். களத்தில் குதிப்பதாக அறிவித்துவிட்டு, பிறகு பின்வாங்கியது ஒரு தேர்ந்த அரசியல் தலைவருக்கு அழகல்ல. விசிக-வின் இந்த 'ஸ்ட்ரேட்டஜிக் பிளண்டர்' கூட்டணிக் கோட்டையிலும் விரிசலை ஏற்படுத்துமா?

விசிக திருமா முடிவு

தமிழக அரசியலில் ஒவ்வொரு நகர்வையும் செதுக்கிச் செதுக்கிச் செய்பவர் விசிக தலைவர் திருமாவளவன். ஆனால், 2026 சட்டமன்றத் தேர்தல் களத்தில் அவர் எடுத்திருக்கும் முடிவு, விசிக தொண்டர்களையே 'தலைசுற்ற' வைத்திருக்கிறது. "போட்டியிடுகிறேன்" என்று முதலில் அறிவிப்பதும், பிறகு "வேண்டாம்" என்று பின்வாங்குவதும்... ஒரு முதிர்ச்சியான தலைமைக்குரிய அடையாளமா என்கிற கேள்வி எழுவதைத் தவிர்க்க முடியவில்லை. அறிவிக்கும் முன்பே சாதக பாதகங்களைச் சீர்தூக்கிப் பார்த்திருக்க வேண்டாமா?

திருமாவளவன் அடிக்கடி சொல்லும் வார்த்தை 'வியூகம்'. ஆனால், இந்த முறை அவரே தனது வியூகத்தில் சிக்கிக்கொண்டாரோ என்று தோன்றுகிறது. அவர் எடுத்திருக்கும் இந்த 'ரிவர்ஸ் கியர்' முடிவால் கட்சிக்கும் சரி, திமுக தலைமையிலான கூட்டணிக்கும் சரி... பலவீனமே மிஞ்சியிருக்கிறது.

காட்டுமன்னார்கோவில்

திருமாவளவன் இந்த முறை காட்டுமன்னார்கோவில் தொகுதியைத் தேர்ந்தெடுத்தது முதல், அதிலிருந்து பின்வாங்கியது வரை நடந்த நிகழ்வுகள் அனைத்தும் ஒரு தெளிவற்ற அரசியல் நகர்வாகவே பார்க்கப்படுகிறது. வழக்கமாக ஒரு போர்க்களத்திற்குச் செல்லும் முன் அங்குள்ள சாதக பாதகங்களை நுணுக்கமாக ஆராயும் அவர், இந்த முறை ஏனோ அந்த நிதானத்தைக் கடைபிடிக்கத் தவறிவிட்டார். ஒரு கட்சியின் தேசியத் தலைவராக, தான் போட்டியிடுவதாக ஒரு பெரும் அறிவிப்பை வெளியிட்டுவிட்டு, திடீரென கிளப்பிய ஒரு சில விமர்சனங்களுக்காக சட்டென பின்வாங்கியது. அவர் மீதான பிம்பத்தை நிலைகுலையச் செய்துள்ளது. "துணை முதல்வர் பதவிக்கு ஆசைப்படுகிறார்" அல்லது "ஆட்சி மாற்றத்தை எதிர்பார்க்கிறார்" என எதிரிகள் வீசிய புகார்கள் ஒன்றும் புதியவை அல்ல; அவற்றை அரசியல் ரீதியாக எதிர்கொள்வதை விடுத்து, போட்டியிலிருந்தே விலகுவது என்பது ஒரு தற்காப்பு ஆட்டமாகவே (Defensive play) பார்க்கப்படுகிறது.

தான் இல்லாத சட்டசபை, விசிக-வின் குரலை வலிமை இழக்கச் செய்யும் என்பதை அவர் உணர்ந்தும் இந்த முடிவை எடுத்தது, கட்சித் தொண்டர்களிடையே ஒருவித சோர்வை ஏற்படுத்தியுள்ளது. தன் முடிவால் கூட்டணிக்கும் கட்சிக்கும் ஒருவித தர்மசங்கடமான சூழலை உருவாக்கிவிட்டு, அதை 'வியூகம்' என்று நியாயப்படுத்துவது அவரது அரசியல் முதிர்ச்சிக்கு சவாலாகவே அமைந்துள்ளது.

அதிருப்தியில் திமுக

திமுக தரப்பிலும் இந்த திடீர் மாற்றம் ஒருவித அதிருப்தியை ஏற்படுத்தியிருக்கக்கூடும் என்பதையும் மறுப்பதற்கில்லை. ஒரு கூட்டணியில் பெரிய கட்சிக்கு (Big Brother) எப்போதும் தேவையானது ஒரு தெளிவான திட்டமிடலும், அதன் அடிப்படையில் நகரும் கூட்டணிக் கட்சிகளும்தான். தேர்தல் நெருங்கும் வேளையில், கூட்டணியின் ஒரு முக்கியத் தூணாக இருக்கும் திருமா, தனது நிலைப்பாட்டை மாற்றிக்கொண்டே இருப்பது களப்பணியில் தொய்வை ஏற்படுத்தும்.

குறிப்பாக, அவர் போட்டியிடுவதால் அந்த மண்டலம் முழுமைக்கும் கிடைக்கக்கூடிய 'வேவ்' (Wave) இப்போது கேள்விக்குறியாகியுள்ளது. மேலும், விசிக-வின் உள்கட்சிப் பூசல்களும், சிட்டிங் எம்.எல்.ஏ-க்களுக்கு சீட் மறுக்கப்பட்டதும் பொதுவெளியில் பேசுபொருளாகும்போது, அது ஒட்டுமொத்த கூட்டணியின் பிம்பத்தையும் சிதைக்கும் என திமுக தலைமை அஞ்சக்கூடும். புதுச்சேரியில் ஏற்கனவே விசிக தனித்துப் போட்டியிடப்போவதாக அறிவித்து அதிர்ச்சி கொடுத்த நிலையில், தமிழகத்திலும் இப்படி ஒரு 'ரிவர்ஸ்' முடிவை எடுத்திருப்பது, அறிவாலயத்தின் கணக்குகளைச் சற்றே குழப்பமடையச் செய்திருக்கிறது. கூட்டணிக் கட்சிகளை ஒருங்கிணைத்துச் செல்ல வேண்டிய சூழலில், இதுபோன்ற சலசலப்புகள் தேவையில்லாத தலைவலியைத் தருவதாகவே திமுக நிர்வாகிகள் கருதுகிறார்கள்.

இந்த 'ஸ்ட்ரேட்டஜிக் பிளண்டர்' ஒரு தற்காலிக சறுக்கலாக இருக்கலாம். ஆனால், இதிலிருந்து திருமா நிச்சயம் மீண்டு வர வேண்டும் என்பதே அவர் கட்சியினரின் ஆசை!