லாஸ்ட் சான்ஸ்.. ரூ.2000 நோட்டுக்களை மாற்ற இன்றே கடைசி நாள் - மிஸ் பண்ணிடாதீங்க

சென்னை: ரூ.2000 நோட்டுக்கள் மதிப்பிழப்பு செய்யப்பட்டு இருக்கும் நிலையில் அதனை மாற்றுவதற்கான கடைசி நாள் இன்றுடன் நிறைவடைகிறது.

பிரதமர் நரேந்திர மோடி கடந்த 2016 ஆம் அண்டு நவம்பர் 8 ஆம் தேதி தொலைக்காட்சிகளில் தோன்றி புழக்கத்தில் இருந்த 500 ரூபாய் மற்றும் 1000 ரூபாய் நோட்டுக்களை செல்லாது என்று அறிவித்தார். நாடு முழுவதும் இந்த அறிவிப்பால் அடுத்த சில மாதங்கள் மக்கள் கடுமையாக நெருக்கடிக்கு ஆளாகினர். அப்போது ரிசர்வ் வங்கி பிங்க் நிற 2000 ரூபாய் நோட்டுக்களை வெளியிட்டது. அதனை மாற்ற வங்கிகளில் மக்கள் கூட்டம் கூட்டமாக வரிசைகளில் நின்றனர்.

இந்த நிலையில் 2000 ரூபாய் நோட்டுகளின் புழக்கம் கடந்த ஓராண்டாகவே வங்கிகள், வணிக நிறுவனங்கள் என எல்லா இடங்களிலும் குறைந்தது. ஏடிஎம்களிலும் புதிய 500 ரூபாய் நோட்டுக்கள் மட்டுமே கிடைத்தன. இதனை வைத்து 2000 ரூபாய் நோட்டுகளை ரிசர்வ் வங்கி தடை செய்துவிட்டதாக அடிக்கடி வதந்திகள் பரவி வந்தன. இந்த கடந்த மே மாதம் ரிசர்வ் வங்கி அறிவிப்பு ஒன்றை வெளியிட்டது. 2000 ரூபாய் நோட்டுகள் செப்டம்பர் 30 ஆம் தேதிக்கு பிறகு செல்லாது என்ற அறிவிப்புதான் அது. அப்போதே அதன் சுழற்சியையும் ரிசர்வ் வங்கி நிறுத்தியது.

இந்த நிலையில் கடந்த செப்டம்பர் 30 ஆம் தேதி ரூ.2000 நோட்டுக்கள் செல்லாமல் போயின. அதற்கு சில நாட்கள் முன்பாகவே வங்கிகளில் ஏராளமான பொதுமக்கள் 2 ஆயிரம் ரூபாய் நோட்டுக்களை கொடுத்து மாற்றினர். ஆனால், பலரால் அந்த பணத்தை மாற்ற முடியவில்லை என்ற குற்றச்சாட்டு வந்த நிலையில், ரிசர்வ் வங்கி அக்டோபர் 7 ஆம் தேதியான இன்று வரை அதை வங்கிகளில் மாற்றுவதற்கு அவகாசம் வழங்கியது. இந்த அவகாசம் இன்று முடியும் நிலையில், நேற்று ரிசர்வ் வங்கி தலைவர் சக்திகாந்த தாஸ் செய்தியாளர்களை சந்தித்தார்.

அப்போது பேசிய அவர், "ரூ.3.43 லட்சம் கோடி மதிப்பிலான 96 சதவீதம் 2 ஆயிரம் ரூபாய் நோட்டுகள் வங்கிகள் மூலம் திரும்பப் பெறப்பட்டு உள்ளன. ரூ.12,000 கோடி மதிப்பிலான 2 ஆயிரம் ரூபாய் நோட்டுகள் இன்னும் வரவில்லை. ரிசா்வ் வங்கி புழக்கத்தில் இருந்த ரூ.2,000 நோட்டுகளை திரும்பப் பெறுவதாக கடந்த மே மாதம் அறிவித்தது. ரூ.2,000 நோட்டுகளை மக்கள் வங்கிக் கணக்கில் செலுத்தவோ அல்லது வங்கியில் கொடுத்து சில்லறை மாற்றவும் செப்டம்பர் 30 ஆம் தேதி வரை அவகாசம் அளிக்கப்பட்டு, அக்டோபர் 7 ஆம் தேதி வரை அது நீட்டிக்கப்பட்டது." என்றார்.

English summary

As Rs 2000 notes have been demonetised Reserve bank of Inida the last day to replace the notes ends today.