தமிழகத்தின் சிறந்த மாநகராட்சியாக திருச்சி தேர்வு.. 2-வது இடத்தை பிடித்தது தாம்பரம்!

சென்னை: தமிழகத்தின் சிறந்த மாநகராட்சியாக திருச்சி முதல் இடத்தையும், 2-வது இடத்தை தாம்பரம் மாநகராட்சியும் பிடித்துள்ளது. இதேபோல் தமிழகத்தின் சிறந்த நகராட்சி மற்றும் பேருராட்சிகளின் பட்டியல் வெளியிடப்பட்டுள்ளது.

இந்தியாவின் 76-வது சுதந்திர தினம் நாளை செவ்வாய்க்கிழமை நாடு முழுவதும் கொண்டாடப்படுகிறது. சுதந்திர தினத்தின் போது டெல்லி செங்கோட்டையில் பிரதமர் நரேந்திர மோடி தேசியக் கொடியை ஏற்றி நாட்டு மக்களுக்கு உரை நிகழ்த்துவார். அதேபோல், மாநிலங்களில் மாநில முதல்வர்கள் கொடியேற்றி உரையாற்றுவது வழக்கம். அந்த வகையில் தமிழ்நாட்டில் கோட்டை கொத்தளத்தில் மூவர்ண கொடியை ஏற்றும் முதல்வர் ஸ்டாலின் பிறகு உரை நிகழ்த்துவார்.

முன்னதாக காவல் துறையினரின் அணிவகுப்பும் நடைபெறும். இதற்கான ஏற்பாடுகள் முழு வீச்சில் தயாராகி வருகிறது. ஒவ்வொரு ஆண்டும் சுதந்திர தினத்தின் போது தமிழகத்தில் சிறப்பாக செயல்படும் மாநகராட்சி, நகராட்சி மற்றும் பேரூராட்சிகளுக்கு முதல்வர் விருது வழங்கப்படும். அந்த வகையில் தற்போது தமிழகத்தில் சிறப்பான மாநகராட்சி, நகராட்சி, பேருராட்சி தேர்வு செய்யப்பட்டுள்ளது.

அதன்படி, தமிழகத்தின் சிறந்த மாநகராட்சியாக திருச்சி முதல் இடத்தையும், 2-வது இடத்தை தாம்பரம் மாநகராட்சியும் பிடித்துள்ளது. இதேபோல் தமிழகத்தின் சிறந்த நகராட்சி பட்டியலில் ராமேஸ்வரம் நகராட்சி முதல் இடத்தையும், திருப்புறைப்பூண்டி இரண்டாம் இடத்தையும் மன்னார்குடி மூன்றாம் இடத்தையும் பிடித்துள்ளது. தமிழகத்தின் சிறந்த பேருராட்சி பட்டியலில், முதல் இடத்தை விக்கிரவாண்டியும், இரண்டாம் இடத்தை ஆலங்குடியும், மூன்றாம் இடத்தை வீரக்கால்புதூரும் பிடித்துள்ளது.

இதேபோல் சென்னை மாநகராட்சியில் இருக்கும் மண்டலங்களில் முதல் இடத்தை 9-வது மண்டலமும், இரண்டாவது இடத்தை 5-ஆம் மண்டலமும் பிடித்துள்ளது. நாளை சென்னை கோட்டை கொத்தளத்தில் நடைபெறும் சுதந்திர தின விழாவின் போது முதல்வர் ஸ்டாலின் முதல் 3 இடங்களை பிடித்த மாநகராட்சி மேயர்கள், நகராட்சி, பேருராட்சி தலைவர்களிடம் விருதுகள் வழங்குகிறார்.

13 கருப்பொருளை மையமாக கொண்டு தமிழகத்தின் சிறந்த மாநகராட்சி, நகராட்சி, பேரூராட்சிகள் தேர்வு செய்யப்பட்டுள்ளன. இதற்காக ரூ.2 கோடியே 26 லட்சம் ரூபாய் ஒதுக்கப்பட்டுள்ளது. தமிழகத்தின் சிறந்த மாநகராட்சிகளாக தேர்வு செய்யப்பட்டுள்ள இரண்டு மாநகராட்சிகளுக்கு தலா ரூ.50 லட்சம் மற்றும் ரூ.30 லட்சம் வழங்கப்படும். இதேபோல் முதல் 3 இடங்களை பிடிக்கும் நகராட்சிகளுக்கு முறையே ரூ.30 லட்சம், ரூ.20 லட்சம், ரூ.10 லட்சம் வழங்கப்படும்.

பேருராட்சிகளை பொறுத்தவரை முதல் இடம் பிடிக்கும் பேரூராட்சிக்கு ரூ.20 லட்சமும், இரண்டாம் இடம் பிடிக்கும் பேரூராட்சிக்கு ரூ.10 லட்சமும், மூன்றாம் இடம் பிடிக்கும் பேரூராட்சிக்கு ரூ.6 லட்சமும் வழங்கப்படும். இதேபோல சென்னை மாநகராட்சியில் முதல் இரண்டு இடங்களை பிடிக்கும் மண்டலங்களுக்கு முறையே ரூ.30 லட்சம், ரூ.20 லட்சம் வீதம் வழங்கப்படும்.

English summary

As the best municipal corporation in Tamil Nadu, Trichy has taken the first place and Tambaram Corporation has taken the 2nd place. Similarly, the list of best municipalities and municipalities in Tamil Nadu has been published.