தவெக நிர்வாகிகளுக்கு அவசர அழைப்பு.. நாளை மாலை விஜய் முக்கிய ஆலோசனை

சென்னை: தமிழ்நாடு சட்டமன்ற தேர்தல் அறிவிப்பு விரைவில் வெளியாகும் என்று எதிர்பார்க்கப்படுகிறது. கூட்டணி, தொகுதி பங்கீடு, வாக்குறுதிகள், பிரச்சாரம் ஆகியவற்றால் அரசியல் களம் சூடுபிடிக்க தொடங்கியுள்ளது. திமுக, அதிமுகவை தீவிரமாக எதிர்த்து தவெக அரசியல் செய்ய தொடங்கியுள்ளது. விஜய் பிப்ரவரி 13 ஆம் தேதி சேலம் செல்லவுள்ளார். பரபரப்பான சூழ்நிலையில் தவெக நிர்வாகிகளுடன் நாளை மாலை விஜய் ஆலோசனை மேற்கொள்ளவுள்ளார். இந்தக் கூட்டம் காணொலி வாயிலாக நடைபெறுகிறது.

தமிழ்நாடு, புதுச்சேரி, கேரளா, மேற்கு வங்கம், அசாம் உள்ளிட்ட மாநிலங்களில் இந்த வருடம் சட்டமன்ற தேர்தல் நடைபெறவுள்ளது. இதற்கான அதிகாரபூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது. திமுக கூட்டணி, அதிமுக பாஜக தேசிய ஜனநாயக கூட்டணி, நாம் தமிழர், தவெக என்று 4 முனை போட்டி நிலவி வருகிறது.

சேலத்தில் விஜய்

இதுவரை இல்லாதளவுக்கு 4 முனை போட்டி நிலவி வருவதால் உச்சகட்ட பரபரப்பு நிலவுகிறது. கூட்டணி, தொகுதி பங்கீடு, வாக்குறுதிகள், பிரச்சாரம் ஆகியவற்றால் அரசியல் களம் இப்போதே சூடுபிடிக்க தொடங்கியுள்ளது. இதுநாள் வரை திமுகவை மட்டும் விமர்சித்து வந்த தவெக மற்றும் விஜய் அதிமுகவை கடுமையாக விமர்சிக்க தொடங்கியுள்ளது.

மறுபக்கம் அதிமுகவும் விஜய்யை கடுமையாக விமர்சித்து வருகிறது. தேர்தல் பணிகளில் தவெக சுணக்கமாக உள்ளது. இந்த பரபரப்பான சூழ்நிலையில் விஜய் வருகிற 13 ஆம் தேதி சேலம் செல்லவுள்ளார். அதிமுக பொதுச்செயலாளர் எடப்பாடி பழனிசாமியின் சொந்த ஊருக்கு விஜய் செல்வது மிகுந்த எதிர்பார்ப்பை ஏற்படுத்தியுள்ளது.

தவெக ஆலோசனை

இந்நிலையில் நாளை மாலை (10.02.26) 4 மணியளவில் காணொளி மூலம் தவெக நிர்வாகிகளுடன் விஜய் பேசவுள்ளார். தேர்தல் நெருங்கும் நிலையில் நிர்வாகிகளுடன் முக்கிய ஆலோசனை மேற்கொள்ளப்படவுள்ளதாக கூறப்படுகிறது. வருகிற 13 ஆம் தேதி விஜய் சேலம் செல்லவுள்ள நிலையில், அதுதொடர்பாகவும் ஆலோசனை செய்யப்படும் என்று தகவல் வெளியாகியுள்ளது.

முக்கிய நிர்வாகிகள்

இதில் புஸ்ஸி ஆனந்த், செங்கோட்டையன், அருண்ராஜ், ஆதவ், நிர்மல் குமார் மற்றும் தவெக மாவட்டச் செயலாளர்கள் உள்ளிட்ட மூத்த, முக்கிய நிர்வாகிகள் பங்கேற்க உள்ளனர். தேர்தல் நெருங்கும் நிலையில் இந்த ஆலோசனை கூட்டம் முக்கியத்துவம் வாய்ந்ததாக கருதப்படுகிறது. தேர்தலுக்காக பூத் கமிட்டி பணி, பிரச்சாரம், கூட்டணி உள்ளிட்டவை தொடர்பாக பல்வேறு முக்கிய முடிவுகள் எடுக்கப்படும் என்று கூறப்படுகிறது. தேர்தல் நெருங்கும் நிலையில் விஜய் இந்தக் கூட்டத்திலும் விஜய் நேரடியாக இல்லாமல், காணொளி வாயிலாக ஆலோசனை நடத்துவது சர்ச்சையை கிளப்பியுள்ளது.

English summary

2026 assembly election nearing, Vijay to have important meeting with TVK cadres tomorrow. important decisions to take ahead of election.