சமையல் எரிவாயு விலை உயர்வு.. LPG உயர்விற்கு பின் உள்ள உண்மையான காரணம் என்ன? - முழு பின்னணி

சென்னை: கடந்த சில வாரங்களாக இந்திய அரசியலில் 'சிலிண்டர் விலை உயர்வு' பெரும் புயலைக் கிளப்பியுள்ளது. மார்ச் 7, 2026 அன்று மத்திய அரசு வீட்டு உபயோக சமையல் எரிவாயு விலையை 60 ரூபாய் உயர்த்தியதை அடுத்து, எதிர்க்கட்சிகள் இதனை ஒரு அரசியல் ஆயுதமாக கையில் எடுத்துள்ளன. ஆனால், இந்த விலை உயர்வுக்குப் பின்னால் இருக்கும் உலகளாவிய பொருளாதாரக் காரணிகளையும், புவிசார் அரசியல் சிக்கல்களையும் உற்று நோக்கினால் உண்மை நிலை புரியும்.

மேற்கு ஆசிய நெருக்கடியும் 'ஹார்முஸ்' சிக்கலும்!

சமையல் எரிவாயு விலை உயர்வு என்பது ஏதோ ஒரு தனிப்பட்ட உள்நாட்டுக் கொள்கை முடிவு அல்ல. சர்வதேச சந்தையில் நிலவும் கச்சா எண்ணெய் மற்றும் எரிவாயு விலை மாற்றங்களே இதற்கு முக்கியக் காரணம்.

உலகளாவிய தாக்கம்: மத்திய கிழக்கு நாடுகளில் நிலவும் போர் பதற்றங்கள் காரணமாக, 'ஹார்முஸ் ஜலசந்தி' (Strait of Hormuz) வழியாக வரும் கப்பல் போக்குவரத்து பாதிக்கப்பட்டுள்ளது. இந்தியாவின் 60 சதவீத எல்.பி.ஜி (LPG) இறக்குமதி இந்த வழியாகத்தான் நடக்கிறது.

விலை உயர்வு: சர்வதேச சந்தையில் சவுதி ஒப்பந்த விலை (Saudi CP) கடந்த சில மாதங்களில் 16 சதவீதம் வரை அதிகரித்துள்ளது. வழக்கமான கணக்கீட்டின்படி பார்த்தால், சிலிண்டர் விலை 130 ரூபாய்க்கு மேல் உயர்ந்திருக்க வேண்டும். ஆனால், அரசு வெறும் 60 ரூபாயை மட்டுமே மக்கள் மீது சுமத்தியுள்ளது.

உண்மையில் ஒரு குடும்பத்திற்கு எவ்வளவு பாதிப்பு?

அரசியல் மேடைகளில் 'விலை உயர்வு' என்று முழங்கினாலும், ஒரு சராசரி குடும்பத்தின் பட்ஜெட்டில் இது ஏற்படுத்தும் தாக்கம் மிகக் குறைவு என்கிறார்கள் பொருளாதார நிபுணர்கள்.

"ஒரு சராசரி குடும்பம் ஆண்டுக்கு 5 சிலிண்டர்களைப் பயன்படுத்துகிறது என்று வைத்துக்கொண்டால், இந்த 60 ரூபாய் உயர்வு என்பது ஒரு நாளைக்கு வெறும் 80 பைசா மட்டுமே. அதாவது ஒரு நபருக்கு ஒரு நாளைக்கு 20 பைசா மட்டுமே கூடுதல் செலவு."

அண்டை நாடுகளை விட இந்தியாவில் குறைவு!

தெற்காசிய நாடுகளுடன் ஒப்பிடுகையில், இந்தியாவில்தான் சமையல் எரிவாயு விலை இன்றும் கட்டுப்படியாகும் அளவில் உள்ளது. மார்ச் 2026 நிலவரப்படி, டெல்லியில் ஒரு சிலிண்டரின் விலை 913 ரூபாய். ஆனால் அண்டை நாடுகளான பாகிஸ்தானில் 1,046 ரூபாய், நேபாளத்தில் 1,207 ரூபாய் மற்றும் இலங்கையில் 1,241 ரூபாய் என விலை மிக அதிகமாக உள்ளது.

உஜ்வாலா திட்டமும் மானியப் பாதுகாப்பும்

மக்களில் விளிம்பு நிலையில் உள்ள 10.5 கோடி குடும்பங்களுக்கு 'பிரதான் மந்திரி உஜ்வாலா யோஜனா' திட்டம் ஒரு பெரும் கவசமாக உள்ளது. இவர்களுக்கு ஒரு சிலிண்டருக்கு 300 ரூபாய் மானியம் நேரடியாகக் கிடைப்பதன் மூலம், அவர்கள் வெறும் 613 ரூபாய்க்கு சிலிண்டரைப் பெற முடிகிறது. சர்வதேச விலை உயர்வு ஏழை எளிய மக்களைப் பாதிக்காத வண்ணம் அரசு இதனை உறுதி செய்துள்ளது.

1991 அல்ல... இது 2026 வலிமை!

சிலர் தற்போதைய நிலையை 1991-ம் ஆண்டு பொருளாதார நெருக்கடியுடன் ஒப்பிடுகிறார்கள். ஆனால் அது முற்றிலும் தவறு. 1991-ல் நம்மிடம் வெறும் 1.2 பில்லியன் டாலர் மட்டுமே அந்நியச் செலாவணி கையிருப்பு இருந்தது. ஆனால் இன்று நம்மிடம் 700 பில்லியன் டாலர் கையிருப்பு உள்ளது.

மேலும், அமெரிக்கா போன்ற நாடுகளுடன் புதிய ஒப்பந்தங்கள் மூலமாக எரிவாயு இறக்குமதியை இந்தியா பன்முகப்படுத்தியுள்ளது. மங்களூரு, விசாகப்பட்டினம் போன்ற இடங்களில் உள்ள ராட்சத சேமிப்பு கிடங்குகளில் பல வாரங்களுக்குத் தேவையான எரிபொருள் இருப்பு வைக்கப்பட்டுள்ளது.

திடீர் விலை உயர்வு என்பது கசப்பான மாத்திரைதான். ஆனால், உலகளாவிய எரிசக்தி போரில் இந்தியக் குடும்பங்களைப் பாதுகாக்கவும், தட்டுப்பாடின்றி எரிவாயு கிடைப்பதை உறுதி செய்யவும் இத்தகைய சிறு மாற்றங்கள் தவிர்க்க முடியாதவை என்பதே எதார்த்தம்.

English summary

What is the real reason behind LPG cylinder price rice in India?