இந்த தீபாவளிக்கு தங்கம் வாங்கினால்.. அடுத்த தீபாவளி என்ன விலை இருக்கும் தெரியுமா? இதை பாருங்க

சென்னை: தீபாவளி மற்றும் வடஇந்தியாவில் கொண்டாடப்படும் தனத்திரசு பண்டிகையை ஒட்டி, தங்கம் மீதான முதலீட்டாளர்களின் ஆர்வம் அதிகரித்துள்ளது. பாரம்பரிய மதிப்புடன் நிதிப் பாதுகாப்பையும் கருத்தில் கொண்டு, தங்கம் வாங்குவோர் மத்தியில் அதிக வரவேற்பைப் பெற்றுள்ளது.

தங்கம் இந்த ஆண்டு குறிப்பிடத்தக்க வளர்ச்சியைப் பதிவு செய்துள்ளது. இதன் விலை 50% மேல் அதிகரித்து, 10 கிராமுக்கு 1,30,000 ரூபாயைக் கடந்துள்ளது. உலகளாவிய நிச்சயமற்ற தன்மைகள், மத்திய வங்கிகளின் தங்கம் கொள்முதல், ரூபாயின் மதிப்பு சரிவு மற்றும் அமெரிக்காவில் வட்டி விகிதக் குறைப்பு குறித்த எதிர்பார்ப்புகள் ஆகியவை தங்கம் விலை உயர்வுக்கு முக்கிய காரணங்களாக உள்ளன.

தங்கம் விலை உயர்வு

மும்பையில் 24 கேரட் தங்கத்தின் விலை சுமார் 1,32,700 ரூபாயாகவும், 22 கேரட் தங்கத்தின் விலை சுமார் 1,21,700 ரூபாயாகவும் உள்ளது. தனத்திரசு 2025-ஐ முன்னிட்டு, முதலீட்டாளர்கள் கவனமாக வாங்க வேண்டும் என Axis Direct அமைப்பு அறிவுறுத்தியுள்ளது. தீபாவளிக்குள் இதன் விலை 1,45,000 ரூபாய் முதல் 1,50,000 ரூபாய் வரை உயர வாய்ப்புள்ளது.

இந்தியர்களுக்கு தங்கம் என்பது ஒரு முதலீட்டைத் தாண்டி, செல்வம், நிலைத்தன்மை மற்றும் நல்ல அதிர்ஷ்டத்தின் அடையாளமாகப் பார்க்கப்படுகிறது. தீபாவளி மற்றும் தனத்திரசு, தங்கம் வாங்குவதற்கு மிகவும் உகந்த நாளாகக் கருதப்படுகிறது. இந்நாளில் நாடு முழுவதும் உள்ள கடைகளில் அதிக தேவை காணப்படும். இந்த கலாச்சார நடைமுறை இந்தியாவின் மிகப்பெரிய தனிநபர் தங்க இருப்புகளுக்குக் காரணமாகும், இது சுமார் 3 டிரில்லியன் டாலராக மதிப்பிடப்பட்டுள்ளது.

கடந்த தீபாவளி முதல், இந்த தீபாவளி வரை கணக்கிட்டால் தங்கம் சுமார் 60% குறிப்பிடத்தக்க வருவாயை அளித்துள்ளது. இது நிஃப்டி 50-ஐ விட கணிசமாக அதிகமாகும், என்று Axis Direct குறிப்பிட்டுள்ளது. குறைந்த வட்டி விகிதங்கள் காரணமாக, முதலீட்டாளர்கள் பணவீக்கம் மற்றும் நாணய ஏற்ற இறக்கங்களுக்கு எதிரான பாதுகாப்பாக தங்கத்தை நாடுகின்றனர்.

தங்கம் விலை உயர்வுக்குப் பல காரணிகள் உள்ளன. உலகளாவிய மத்திய வங்கிகளின் அதிகப்படியான பண அச்சடிப்பு காரணமாக ஏற்படும் பணவீக்கம் ஒரு முக்கிய காரணியாகும். இது டாலரின் மதிப்பை பலவீனப்படுத்தி, முதலீட்டாளர்களை தங்கம் போன்ற உறுதியான சொத்துக்களை நோக்கித் தள்ளுகிறது. பல மத்திய வங்கிகள் அமெரிக்க டாலரில் இருந்து விலகி தங்கள் இருப்புகளை பல்வகைப்படுத்துவதும் மற்றொரு காரணம்.

"இந்த போக்கு 2026-ல் மேலும் துரிதமானால், தங்கம் தொடர்ந்து புதிய உச்சங்களை எட்டும்," என்று Axis Direct கணித்துள்ளது. உலகளாவிய மத்திய வங்கிகள் 2025-ல் சுமார் 1,000 டன் தங்கத்தை தங்கள் இருப்புடன் சேர்க்கும் என்று எதிர்பார்க்கப்படுகிறது, இது சந்தைக்கு ஒரு உறுதியான அடித்தளத்தை உருவாக்கும். இதே நிலை தொடர்ந்தால் அடுத்த தீபாவளிக்குள் 1,45,000 முதல் 1,50,000 ரூபாய் வரை உயர வாய்ப்புள்ளது. அதாவது இப்போது இருப்பதை விட கிட்டத்தட்ட 30 ஆயிரத்திற்கும் மேல் ஒரு சவரனுக்கு தங்கத்தின் விலை உயரும் என்று Axis Direct கணித்துள்ளது.

தங்கம் தற்போது உச்சத்தில் இருப்பதால், தீபாவளி 2025-ல் அதிக வாங்கும் ஆர்வம் காணப்படும். அடுத்த தீபாவளிக்குள் அதிகபட்ச வருவாயைப் பெற, விலை சரிவுகளின் போது படிப்படியாக முதலீடு செய்யுமாறு முதலீட்டாளர்களுக்கு அறிவுறுத்தப்பட்டுள்ளது.

English summary

What will be the price of Gold Rate in next Diwali if buy in this Diwali?