இந்திய திரையுலகிலேயே அதிக ஊதியம் பெறும் பாடிகார்டு! ராம் சரணை நிழல் போல் தொடரும் கெவின் குண்டா!

சென்னை: இந்தியத் திரையுலகிலேயே மிக அதிக சம்பளம் பெறும் வி.ஐ.பி மெய்க்காப்பாளர்களில் ஒருவராக நடிகர் ராம்சரணின் பாடிகார்டு விளங்குகிறார், யார் இந்த கெவின் குண்டா? என்பதை பார்க்கலாம்.

உலகளாவிய அளவில் கவனம் ஈர்த்த 'ஆர்ஆர்ஆர்' படத்திற்குப் பிறகு, மெகா பவர் ஸ்டார் ராம் சரண் நடிப்பில் பெரிதும் எதிர்பார்க்கப்படும் அதிரடித் திரைப்படம் 'பெத்தி' (Peddhi).

ஜூன் 4-ஆம் தேதி திரையரங்குகளில் வெளியாகவுள்ள இத்திரைப்படத்தின் விளம்பரப் பணிகளில் படக்குழுவினர் தற்போது தீவிரமாக ஈடுபட்டு வருகின்றனர்.

இந்நிலையில், இந்த ப்ரோமோஷன் நிகழ்ச்சிகளின் போது ராம் சரணுடன் நிழல் போலத் தொடரும் அவரது மெய்க்காப்பாளர் (Bodyguard) குறித்த சுவாரசியமான தகவல் வெளியாகி, இணையத்தைக் கலக்கி வருகிறது.

யார் இந்த கெவின் குண்டா? வைரலாகும் பின்னணி!

விளம்பர நிகழ்வுகளின் போது ராம் சரணுடன் கம்பீரமான தோற்றத்துடனும், ஸ்டைலான நடையுடனும் வலம் வரும் அவரது பாடி கார்டின் புகைப்படங்களும் வீடியோக்களும் சமூக வலைத்தளங்களில் ட்ரெண்டாகி வருகின்றன. அவரது பெயர் கெவின் குண்டா (Kevin Kunda). 6.5 அடி, 198 செ.மீ. உயரம் கொண்டவர் ஆவார்.

சர்வதேச எம்.எம்.ஏ வீரர்: காம்பியா நாட்டைச் சேர்ந்த கெவின் குண்டா, தற்போது இத்தாலியின் ஃபுளோரன்ஸ் நகரில் வசித்து வருகிறார். இவர் சாதாரணப் பாதுகாவலர் அல்ல, ஒரு தொழில்முறை எம்.எம்.ஏ (Mixed Martial Arts) சண்டை வீரர் ஆவார்.

தேசியப் பிரதிநிதி: விளையாட்டில் சாதனை படைத்தவரான இவர், கடந்த 2021-ஆம் ஆண்டு இத்தாலியின் தேசிய எம்.எம்.ஏ அணியைப் பிரதிநிதித்துவப்படுத்தி களம் கண்டுள்ளார் என்பது குறிப்பிடத்தக்கது.

ஒரு நாள் சம்பளம் இத்தனை லட்சமா?!

ரிபப்ளிக் மீடியா வெளியிட்டுள்ள தகவல்களின்படி, நடிகர் ராம் சரணுக்குப் பாதுகாப்பு வழங்குவதற்காக கெவின் குண்டாவுக்கு ஒரு நாளுக்கு ₹2 லட்சம் முதல் ₹4 லட்சம் வரை ஊதியம் வழங்கப்படுவதாகக் கூறப்படுகிறது. இதன் மூலம், இந்தியத் திரையுலகிலேயே மிக அதிக சம்பளம் பெறும் வி.ஐ.பி மெய்க்காப்பாளர்களில் ஒருவராக இவர் உருவெடுத்துள்ளார்.

"உண்மையான மல்யுத்த வீரர்களுடன் மோதினேன்" - ராம் சரண் ஒப்பந்தம்!

'பெத்தி' திரைப்படத்திற்காக ராம் சரண் ஒரு தொழில்முறை மல்யுத்த வீரரைப் போன்ற உடலமைப்பைப் பெற்று, நிஜ சண்டை வீரர்களுடன் தீவிரப் பயிற்சி மேற்கொண்டுள்ளார். படத்தின் டிரெய்லர் வெளியீட்டு விழாவில் இதுகுறித்து ராம் சரண் பேசியதாவது:

"படப்பிடிப்பின் இறுதி 25-30 நாட்களில் நாங்கள் குஸ்தி மல்யுத்தக் காட்சிகளைப் படமாக்கினோம். சண்டைக் காட்சிகளுக்காகப் பயிற்சி பெற்ற கலைஞர்களை (Fighters) அழைத்து வரச் சொன்னேன். ஆனால், படக்குழுவினரோ நிஜ மல்யுத்த வீரர்களையே கூட்டி வந்துவிட்டனர். இயக்குனர் 'ஆக்‌ஷன்' என்று சொன்னதும், அவர்கள் தங்களது முழு பலத்தையும் பயன்படுத்தி என்னைக் கெட்டியாகப் பிடித்துக் கொள்வார்கள். அந்த சண்டைக் காட்சிகள் மிகவும் சவாலாகவும் உண்மையாகவும் அமைந்தன."

'பெத்தி' திரைப்படம் - ஒரு பார்வை

இயக்குனர் புச்சி பாபு சனா இயக்கத்தில் உருவாகியுள்ள 'பெத்தி' ஒரு எமோஷனல் அதிரடித் திரைப்படமாகும். இதில் ராம் சரண் கிரிக்கெட் வீரர், மல்யுத்த வீரர், ஓட்டப்பந்தய வீரர் எனப் பல பரிமாணங்களில் தோன்றி, விளையாட்டு மற்றும் தனது மன உறுதி மூலம் மக்களுக்காகப் போராடும் கதாபாத்திரத்தில் நடித்துள்ளார்.

இப்படத்தில் ராம் சரணுக்கு ஜோடியாக ஜான்வி கபூர் நடித்துள்ளார். மேலும், கன்னட சூப்பர் ஸ்டார் ஷிவ ராஜ்குமார், திவ்யேந்து, ஜகபதி பாபு ஆகியோர் முக்கிய வேடங்களிலும், போமன் இரானி மற்றும் ரவி கிஷன் ஆகியோர் சிறப்புத் தோற்றங்களிலும் நடித்துள்ளனர். ஏ.ஆர். ரஹ்மான் இசையமைத்துள்ள இப்படம் வரும் ஜூன் 4 அன்று உலகெங்கும் வெளியாகிறது.

English summary

Kevin Gunda, the trusted bodyguard of actor Ram Charan, is regarded as one of the highest-paid celebrity security personnel in the Indian film industry. Here’s a closer look at his background, career, and the key role he plays in ensuring the star’s safety.