காலம் கடக்குது.. சிக்காத மீன்.. தமிழ்நாட்டின் அடுத்த டிஜிபி யார்? செக் வைத்த டெல்லி.. என்ன நடக்குது?

Updated: Friday, November 21, 2025, 9:00 [IST]

Subscribe to Oneindia Tamil

சென்னை: தமிழக டிஜிபி அதாவது காவல் படைத் தலைவரை நியமிக்கும் விவகாரத்தில், மத்திய அரசுப் பணியாளர் தேர்வாணையம் (UPSC) தனது முந்தைய முடிவில் உறுதியாக இருப்பதாக அறிவித்து உள்ளது. யுபிஎஸ்சி இந்த அறிவிப்பை வெளியிட்டு 10 நாட்களுக்கு மேலாகியும் தமிழ்நாடு அரசு இதில் உறுதியான நடவடிக்கைகள் எதையும் எடுக்காதது விவாதங்களை ஏற்படுத்தி உள்ளது.

தமிழக அரசு பரிந்துரைத்த மூன்று டிஜிபிக்களின் பெயர்கள் ஏன் ஏற்கப்படவில்லை என்பதை விளக்கி, தலைமைச் செயலாளர் என். முருகானந்தம் அளித்த மனு நீக்கப்பட்டது என்று யுபிஎஸ்சி தெரிவித்துள்ளது.

யுபிஎஸ்சி தனது நிலைப்பாட்டில் உறுதி

யுபிஎஸ்சி தனது நிலைப்பாட்டை மீண்டும் வலியுறுத்தி தமிழக அரசுக்குக் கடிதம் அனுப்பியுள்ளதாக அதிகாரப்பூர்வ வட்டாரங்கள் தெரிவிக்கின்றன. தமிழகத்தின் மனுவை நாங்கள் நிராகரித்து விட்டோம்... எங்கள் நிலைப்பாட்டில் பழைய நிலையே தொடரும்.. என்று மத்திய ஏஜென்சியின் மூத்த அதிகாரி ஒருவர் தெரிவித்து உள்ளார்.

சங்கர் ஜிவால் ஆகஸ்ட் 30, 2025 அன்று ஓய்வு பெற்றதால் புதிய டிஜிபி/காவல் படைத் தலைவரை நியமிக்க வேண்டிய அவசியம் ஏற்பட்டது. காலியிடம் ஏற்படுவதற்கு மூன்று மாதங்களுக்கு முன்பே (ஆகஸ்ட் 30, 2025) தகுதியான டிஜிபி தரவரிசை அதிகாரிகளின் பெயர்களை யுபிஎஸ்சி-க்கு அனுப்பியிருக்க வேண்டும். ஆனால், ஆகஸ்ட் 29, 2025 அன்றுதான் நேரடியாக ஒப்படைக்கப்பட்டது.

மூத்த அதிகாரி பெயர்

ஒரு மூத்த அதிகாரி தனது பெயரைப் பட்டியலில் சேர்க்கக் கோரி மத்திய நிர்வாகத் தீர்ப்பாயத்தையும், பின்னர் உச்ச நீதிமன்றத்தையும் நாடியதே இந்த தாமதத்திற்குக் காரணம் என்று குறிப்பிடப்பட்டது.

ஜி. வெங்கட்ராமன் பொறுப்பு டிஜிபி/காவல் படைத் தலைவராக நியமிக்கப்பட்ட பிறகு, மதுரையைச் சேர்ந்த வழக்கறிஞர் ஹென்றி டிஃபாக்னே, உச்ச நீதிமன்றத்தின் பிரகாஷ் சிங் வழிகாட்டுதல்களை தமிழக அரசு பின்பற்றவில்லை எனக் கூறி நீதிமன்ற அவமதிப்பு மனு தாக்கல் செய்தார்.

இந்த வழக்கில் உத்தரவு பிறப்பித்த உச்ச நீதிமன்றம், யுபிஎஸ்சி-யை விரைவாகப் பட்டியலிடும் செயல்முறையை முடிக்கக் கேட்டுக் கொண்டதுடன், தமிழக அரசை ஒரு நிரந்தர டிஜிபியை நியமிக்க உடனடி நடவடிக்கை எடுக்குமாறும் உத்தரவிட்டது.

யுபிஎஸ்சி தேர்வுக்குழு

யுபிஎஸ்சி செப்டம்பர் 26, 2025 அன்று தேர்வுக்குழு கூட்டத்தை நடத்தியது. சீமா அகர்வால், ராஜீவ் குமார் மற்றும் சந்தீப் ராய் ரத்தோர் ஆகிய மூன்று மூத்த அதிகாரிகளின் பெயர்களை டிஜிபி/காவல் படைத் தலைவராக நியமிக்கப் பொருத்தமானவர்கள் என்று பரிந்துரைத்தது.

ஆனால், தேர்ந்தெடுக்கப்பட்ட அதிகாரிகளின் பட்டியல் தமிழக அரசுக்கு ஏற்றுக்கொள்ள முடியாதது என்று தலைமைச் செயலாளர் யுபிஎஸ்சி-க்கு கடிதம் எழுதினார். தனது நிலைப்பாட்டை நியாயப்படுத்தி விரிவான விளக்கத்தையும் அளித்தார் என்று வட்டாரங்கள் தெரிவித்தன.

நிரந்தர டிஜிபி/காவல் படைத் தலைவர் நியமனத்தில் ஏற்பட்ட தாமதத்திற்கு எதிர்க்கட்சித் தலைவர் மற்றும் அதிமுக பொதுச் செயலாளர் எடப்பாடி கே. பழனிசாமி கண்டனம் தெரிவித்தார். அக்டோபர் 22 அன்று மாநில சட்ட அமைச்சர் எஸ். ரகுபதி ஒரு அறிக்கையை வெளியிட்டார்.

அதில், தமிழகத்தின் கருத்துக்களை மத்திய அரசு புறக்கணித்து, தனக்கு விருப்பமான அதிகாரியை டிஜிபியாக நியமிக்க முயற்சிக்கிறது என்று குற்றம் சாட்டினார். தேர்வுக்குழு கூட்டத்தில் தமிழகம் கடும் ஆட்சேபனைகளை தெரிவித்த போதிலும், யுபிஎஸ்சி சில அதிகாரிகளின் பெயர்களை இறுதி செய்ததாக அவர் கூறினார். இந்த விவகாரத்தில் தனது உரிமைகளைப் பாதுகாக்க தமிழக அரசு அனைத்து நடவடிக்கைகளையும் எடுக்கும் என்றும் அவர் மேலும் தெரிவித்தார்.