கோவையில் 5 தொகுதிகளில் சாதகமாக வந்த உளவுத்துறை ரிப்போர்ட்.. செந்தில் பாலாஜியால் உற்சாகமான ஸ்டாலின்!

Updated: Thursday, January 1, 2026, 12:13 [IST]

Subscribe to Oneindia Tamil

கோவை: கோவை மாவட்டத்தில் இம்முறை அதிக தொகுதிகளில் வெல்ல வேண்டும் என்பதில் திமுக தீவிரம் காட்டி வரும் நிலையில், தற்போது வந்துள்ள உளவுத்துறை ரிப்போர்ட் திமுகவினருக்கு உற்சாகத்தை கொடுத்துள்ளது. கோவையின் இரு முக்கியமான தொகுதிகளில் திமுகவின் வெற்றி உறுதி என்றும், 3 தொகுதிகளில் திமுக கடும் போட்டி அளிக்கும் என்றும் தெரிய வந்துள்ளது.

2021 சட்டசபைத் தேர்தலில் கொங்கு மண்டலம் திமுகவுக்கு மிகப்பெரிய சோதனையாக அமைந்தது. ஏனென்றால் கொங்கு மண்டலத்தில் உள்ள 68 தொகுதிகளில் வெறும் 24 தொகுதிகளில் மட்டுமே திமுக வென்றது. குறிப்பாக கோவையில் 10 தொகுதிகளையும் அதிமுக கூட்டணி கைப்பற்றியது. இதனால் ஆட்சிக்கு வந்த நாள் தொடங்கியே திமுக கொங்கு மண்டலத்தில் பிரத்யேக கவனம் செலுத்தி வருகிறது.

ஏற்கனவே கோவையில் ஜிடி நாயுடு மேம்பாலம், உக்கடம் மேம்பாலத்திற்கு சி.சுப்பிரமணியம் பெயர், செம்மொழி பூங்கா, சர்வதேச ஹாக்கி மைதானம் ஆகியவை திறந்து வைக்கப்பட்டுள்ளது. அடுத்தடுத்து பெரியார் நூலகம், சர்வதேச கிரிக்கெட் மைதானத்திற்கான அடிக்கல் நாட்டு விழா நடக்க உள்ளது. அதேபோல் சமூக ரீதியிலான கணக்குகளையும் திமுக இம்முறை சரி செய்திருக்கிறது.

அதேபோல் முன்னாள் அமைச்சர் செந்தில் பாலாஜி பொறுப்பில் கோவை மாவட்டத்தை கொடுத்திருப்பதால், திமுகவினர் இன்னும் உற்சாகமாகி இருக்கின்றனர். இதனிடையே கோவையில் முதல் ஆளாக சிங்காநல்லூர் தொகுதியில் தேர்தல் அலுவலகம் அமைத்து திமுக பணிகளை தொடங்கி இருக்கிறது. இதற்கு பின்னணியில் திமுக கைகளுக்கு வந்த உளவுத்துறை ரிப்போர்ட் என்று சொல்லப்படுகிறது.

அதாவது உளவுத்துறை மூலமாக கிடைத்த ரிப்போர்ட் அடிப்படையில் கோவையில் உள்ள 10 தொகுதிகளில் சிங்காநல்லூர் மற்றும் கோவை தெற்கு ஆகிய இரு தொகுதிகளும் திமுக வசம் வரும் என்று தெரிவிக்கப்பட்டுள்ளது. அதேபோல் மேட்டுப்பாளையம், கோவை வடக்கு, கிணத்துக்கிடவு ஆகிய தொகுதிகளிலும் போட்டி கடுமையாக இருக்கும் என்று தெரிவிக்கப்பட்டுள்ளது.

இதன் காரணமாகவே திமுகவின் உற்சாகம் அடைந்துள்ளனர். இதனால் தேர்தல் தேதி அறிவிப்பு வெளியாவதற்குள் இன்னும் சில தொகுதிகளும் திமுகவுக்கு சாதகமாக மாறும் என்று கணக்கிட்டு பணியாற்ற தொடங்கி இருக்கின்றனர். அதேபோல் விஜய் பிரிக்கும் வாக்குகளும் திமுகவுக்கு கொங்கு மண்டலத்தில் சாதகமாக அமையும் என்று விவரம் அறிந்தவர்கள் கூறுகின்றனர்.