அள்ள அள்ள ஹவாலா பணம்.. பைக் பெட்ரோல் டேங்கில் ரகசிய அறை.. கோவையில் நடந்த ஷாக் சம்பவம்

கோவை: கோவையில் இருந்து அண்டை மாநிலமான கேரளத்திற்கு ஹவாலா பணம் கடத்தப்படும் சம்பவம் அடிக்கடி அரங்கேறி வருகிறது. கோவையில் இரு சக்கர வாகனத்தின் இருக்கை மற்றும் பெட்ரோல் டேங்கில் ரகசிய அறை அமைத்து ரூ. 56 லட்சம் ஹவாலா பணத்தை கேரளாவிற்கு கடத்தப்பட்டுள்ள சம்பவம் அதிர்ச்சியை ஏற்படுத்தியுள்ளது. ஹவாலா பணம் கடத்திய நபரை போலீஸார் கைது செய்து பணத்தை பறிமுதல் செய்தனர்.

தமிழக - கேரள எல்லையான வேலந்தாவளம் சோதனைச் சாவடியில் கந்தேகவுண்டன்சாவடி போலீசார் இன்று காலை வழக்கம்போல வாகன சோதனையில் ஈடுபட்டு இருந்தனர். அப்போது, அந்த வழியாக கோவையில் இருந்து கேரளத்தை நோக்கி இருசக்கர வாகனத்தில் வந்தவர், போலீசாரை பார்த்ததும் வேகமாக இருசக்கர வாகனத்தை திருப்பிச் சென்றுள்ளார்.

விரட்டிப் பிடித்த போலீஸ்

இதைப் பார்த்த காவல் துறையினர் உடனடியகா இரு சக்கர வாகனத்தில் திரும்பிச் சென்ற நபரை விரட்டிப் பிடித்து அவரது வாகனத்தை சோதனையிட்டனர். அப்போது, வாகனத்தின் இருக்கை மற்றும் பெட்ரோல் டேங்கில் ரகசிய அறை அமைக்கப்பட்டு, அதில் கட்டுக்கட்டாக 500 ரூபாய் நோட்டுகள் இருப்பது தெரியவந்தது.

வாகனம் பறிமுதல்

இதனைப் பார்த்த போலீஸார் உடனடியாக இருசக்கர வாகனத்தைப் பறிமுதல் செய்தனர். பைக்கை ஓட்டி வந்த கேரள மாநிலம், பெருந்தல்மன்னா, மலப்புரத்தைச் சேர்ந்த ஷபீக் என்பவரையும் சோதனைச் சாவடிக்கு அழைத்து வந்து விசாரணை மேற்கொண்டனர். வாகனத்தை சோதனை செய்ததில், இருக்கையின் கீழ் பகுதி மற்றும் பெட்ரோல் டேங்கில் ரகசிய அறை அமைத்து அதில் ரூ. 56 லட்சத்து 50 ஆயிரம் ஹவாலா பணம் பதுக்கி வைக்கப்பட்டுள்ளது தெரியவந்தது.

கட்டுக் கட்டாகப் பணம்

அந்த நபர் கொண்டு வந்த பணத்திற்கு உரிய ஆவணங்கள் எதுவும் இல்லாத தெரியவந்தது. இதையடுத்து போலீஸார் அவரிடம் மேற்கொண்ட விசாரணையில் அது ஹாவாலா பணம் என்பது தெரியவந்தது. இதையடுத்து, பறிமுதல் செய்யப்பட்ட ரூ. 56 லட்சத்து 50 ஆயிரம் பணத்தையும், பணத்தை கடத்தி சென்ற கேரளாவை சேர்ந்த ஷபீக் என்பவரையும் வருமான வரித் துறை அதிகாரிகளிடம் போலீசார் ஒப்படைத்தனர்.

English summary

Police in Coimbatore have arrested a man who smuggled 56 lakhs of hawala money to Kerala by setting up a secret chamber in the seat and petrol tank of a two-wheeler and seized the money.