நீட் வினாத்தாள் “லீக்” ஆனது உறுதி.. 17 மாணவர்களை தகுதி நீக்கம் செய்தது தேசிய தேர்வு முகமை!

டெல்லி: நீட் தேர்வு முறைகேட்டில் ஈடுபட்ட 17 மாணவர்கள் தகுதிநீக்கம் செய்யப்பட்டுள்ளனர். மே 5ஆம் தேதி நடந்த இளநிலை நீட் தேர்வில் முறைகேட்டில் ஈடுபட்டதாக 17 பேரை தகுதி நீக்கம் செய்துள்ளது தேசிய தேர்வு முகமை.

நீட் தேர்வு முடிவுகள் கடந்த ஜூன் 4 ஆம் தேதி வெளியானது. அதன் பிறகு முடிவுகளில் ஏற்பட்ட குழப்பம் காரணமாக இந்த பிரச்சனை பூதாகரமானது. இதனைத் தொடர்ந்து 1563 மாணவர்களுக்கு கருணை மதிப்பெண்கள் வழங்கப்பட்டது தொடர்பாக உச்ச நீதிமன்றம் கேள்வி எழுப்பியதை தொடர்ந்து கருணை மதிப்பெண்கள் ரத்து செய்யப்பட்டன. மறுத்தேர்வு நடத்தப்படும் என்றும் அறிவிக்கப்பட்டது. அதன்படி இன்று மறுதேர்வு நடந்தது.

இதற்கிடையே நீட் தேர்வு வினாத்தாள் கசிவு விவகாரம் விஸ்வரூபம் எடுத்தது. ஏற்கனவே பீகாரில் 13 பேர் கைது செய்யப்பட்ட நிலையில் ஜார்கண்டில் 5 பேர் கைது செய்யப்பட்டனர். அவர்களை பாட்னா அழைத்து சென்று போலீசார் விசாரித்து வருகின்றனர். அவர்களிடம் நடத்தப்பட்ட விசாரணையில் நீட் தேர்வு வினாத்தாள்களை கசிய விட்டு விற்பனை செய்ததில் சஞ்சய் முக்யா என்பவர் முக்கிய நபராகச் செயல்பட்டது தெரியவந்தது.

மேலும் உத்தர பிரதேசம் வழியாக பீகாருக்கு நீட் வினாத்தாள் விற்பனை செய்யப்பட்டதும் தெரியவந்துள்ளது. உ.பி காவலர் தேர்வில் வினாத்தாளை கசியவிட்ட ரவி அட்ரி கும்பலுக்கு நீட் வினாத்தாள் கசிவிலும் தொடர்பு இருப்பதாகவும் விசாரணையில் தெரியவந்ததை அடுத்து உபி சிறப்பு அதிரடிப்படை போலீசாரால் ரவி அட்ரி கைது செய்யப்பட்டார்.

நீட் வினாத்தாள் கசிவு தொடர்பாக மகாராஷ்டிராவில் 2 ஆசிரியர்கள் கைது செய்யப்பட்டனர். ஆசிரியர்கள் சஞ்சீவ் துக்காராம் ஜாதவ், ஜலீல் உமர்கான் பதான் ஆகியோரை போலீசார் கைது செய்தனர். நீட் தேர்வில் வினாத்தாள் கசிவு உள்ளிட்ட முறைகேடுகள் நடந்தது தொடர்பாக சிபிஐ வழக்குப்பதிவு செய்துள்ளது.

இன்று 750 மாணவர்கள் நீட் மறு தேர்வு எழுதவில்லை.. 48% ஆப்செண்ட்.. ஷாக் தகவலை வெளியிட்ட என்.டி.ஏ!


நீட், நெட் உள்ளிட்ட தேசியத் தேர்வு முகமை நடத்தும் தேர்வுகளில் முறைகேடுகளைத் தடுக்க மத்திய அரசு ஒரு உயர்நிலைக் குழுவை அமைத்துள்ளது. இஸ்ரோ முன்னாள் தலைவர் ராதாகிருஷ்ணன் தலைமையில் இந்த குழுவை மத்திய அரசு அமைத்துள்ளது.

இந்நிலையில், நீட் தேர்வு வினாத்தாள் கசிவு உறுதியானதை அடுத்து, பீகாரில் தேர்வு எழுதிய 17 மாணவர்கள் தகுதிநீக்கம் செய்யப்பட்டுள்ளனர். மே 5ஆம் தேதி நடந்த இளநிலை நீட் தேர்வில் முறைகேட்டில் ஈடுபட்டதாக 17 பேரை தகுதி நீக்கம் செய்துள்ளது தேசிய தேர்வு முகமை.

English summary

National Investigation Agency said that 17 NEET-UG candidates who had appeared in May 5 exam from centres in Bihar were debarred following detection of malpractice.