22 ஆண்டுகளுக்குப் பின் வாக்கெடுப்பு- காங். தலைவர் தேர்தல்-நாளை மறுநாள் வேட்புமனுத் தாக்கல் தொடக்கம்!

Updated: Thursday, September 22, 2022, 18:44 [IST]

Subscribe to Oneindia Tamil

டெல்லி: காங்கிரஸ் கட்சியின் அகில இந்திய தலைவர் பதவிக்கான தேர்தல் குறித்த அறிவிக்கை இன்று வெளியிடப்பட்டது. காங்கிரஸ் தலைவர் பதவிக்கான தேர்தல் அக்டோபர் 17-ந் தேதி நடைபெற உள்ளது. இத்தலைவர் பதவி தேர்தலுக்கான வேட்புமனுத் தாக்கல் நாளை மறுநாள் தொடங்க உள்ளது. காங்கிரஸ் கட்சியில் 22 ஆண்டுகளுக்குப் பின்னர் தலைவர் பதவிக்கான வாக்கெடுப்பு நடைபெற உள்ளது.

காங்கிரஸ் கமிட்டியின் அகில இந்திய தலைவராக சோனியா காந்தி, 1998-ல் பொறுப்பேற்றார். மத்தியில் 2004-ம் ஆண்டு முதல் 2014-ம் ஆண்டு வரை 10 ஆண்டுகாலம் காங்கிரஸ் தலைமையில்தான் கூட்டணி ஆட்சியும் நடைபெற்றது. 2000-ம் ஆண்டு காங்கிரஸ் கட்சியின் தலைவர் பதவிக்கு தேர்தல் நடைபெற்றது. அத்தேர்தலில் சோனியா காந்தியும் ஜிதேந்திர பிரசாதாவும் போட்டியிட்டனர். அத்தேர்தலில் வாக்குகள் எண்ணப்பட்டது. அதில் சோனியா காந்தி வெற்றி பெற்றார். இதன்பின்னர் காங்கிரஸ் கட்சிக்கு 2017-ல் ராகுல் காந்தி தலைவராக நியமிக்கப்பட்டார்.

கலகக் குரல்

ஆனால் 2019-ம் ஆண்டு லோக்சபா தேர்தலில் காங்கிரஸ் படுதோல்வி அடைந்த நிலையில் தலைவர் பதவியில் இருந்து ராகுல் காந்தி ராஜினாமா செய்தார். அப்போது காங்கிரஸ் இடைக்கால தலைவராக சோனியா காந்தி மீண்டும் பதவியேற்றார். கடந்த 3 ஆண்டுகளாக காங்கிரஸ் கட்சியின் தலைவர் பதவி குறித்த விவாதம் நடைபெற்று வருகிறது. காங்கிரஸ் தலைவர் பதவியை நேரு குடும்பம் அல்லாத ஒருவர் ஏற்க வேண்டும் என்ற குரலும் வலுத்தது. இது தொடர்பாக காங்கிரஸ் மூத்த தலைவர்கள் போர்க்கொடி தூக்கினர். கபில் சிபல், குலாம்நபி ஆசாத் உள்ளிட்ட பலரும் காங்கிரஸை விட்டு வெளியேறினர்.

ராகுல் காந்திக்காக தீர்மானங்கள்

இந்நிலையில் காங்கிரஸ் கட்சித் தலைவர் பதவிக்கான தேர்தல் அக்டோபர் 17-ந் தேதி நடைபெறும் என காரியக் கமிட்டிக் கூட்டத்தில் முடிவெடுக்கப்பட்டது. இதனைத் தொடர்ந்து மீண்டும் ராகுல் காந்தியே தலைவராக வேண்டும் என்ற குரல்கள் வலுத்தன. ஆனால் ராகுல் காந்தி இதனை திட்டவட்டமாக நிராகரித்தார். அதேநேரத்தில் நாடு முழுவதும் மாநில காங்கிரஸ் கமிட்டிகள், ராகுல் காந்தியே தலைவராக தேர்ந்தெடுக்கப்பட வேண்டும் என தீர்மானங்கள் நிறைவேற்றப்பட்டன.

தேர்தல் அறிவிக்கை வெளியீடு

இதனிடையே காங்கிரஸ் தலைவர் பதவிக்கான தேர்தலில் ராஜஸ்தான் முதல்வர் அசோக் கெலாட், சசிதரூர் எம்பி. ஆகியோர் போட்டியிடுவது உறுதியாகி உள்ளது. இத்தலைவர் பதவிக்கான தேர்தல் தொடர்பான அறிவிக்கை இன்று வெளியிடப்பட்டது. இத்தேர்தலுக்கான வேட்புமனுத் தாக்கல் நாளை மறுநாள் தொடங்க உள்ளது. வேட்புமனுத் தாக்கல் செய்ய கடைசி நாள் செப்டம்பர் 30.

அக்.17-ல் தேர்தல்

இத்தேர்தலில் போட்டியிட அதாவது வேட்புமனுத் தாக்கல் செய்ய 10 மாநில காங்கிரஸ் ஆதரவுகள் இருந்தால் போதும். அக்டோபர் 17-ந் தேதி வாக்குப் பதிவு நடத்தப்படும். சுமார் 9,000 பேர் இத்தேர்தலில் வாக்களிப்பர். வாக்குகள் எண்ணப்பட்டு முடிவுகள் அக்டோபர் 19-ந் தேதி அறிவிக்கப்பட உள்ளது.