நடிகர் ரஜினியின் வளர்ப்பு தந்தைக்கு பத்மஸ்ரீ விருது.. யார் இந்த பாலம் கல்யாண சுந்தரம்? நெகிழ்ச்சி

சம்பாதித்த பணம், சொத்து உள்ளிட்டவற்றை ஏழைகளுக்கு வழங்கி சமூக சேவை செய்த பாலம் கல்யாண சுந்தரம் திருநெல்வேலியில் பிறந்தவர்

டெல்லி: நடிகர் ரஜினிகாந்த் தனது வளர்ப்பு தந்தை என பெருமையாக கூறிய போயஸ் கார்டன் இல்லத்துக்கு அழைத்து சென்ற பாலம் கல்யாண சுந்தரத்தின் சமூக சேவையை பாராட்டி இன்று ஜனாதிபதி திரெளபதி முர்மு பத்மஸ்ரீ வழங்கி கவுரவித்தார். இந்நிலையில் தான் பாலம் கல்யாண சுந்தரம் யார்? அவருக்கும் நடிகர் ரஜினிகாந்துக்கும் இடையேயான உறவு பற்றிய நெகிழ்ச்சியான தகவல் வெளியாகி உள்ளது.

இந்தியாவில் ஒவ்வொரு ஆண்டும் கலை, இலக்கியம், விளையாட்டு, மருத்துவம், சமூகப்பணி உள்ளிட்ட பல்வேறு துறைகளில் சிறந்து விளங்கும் ஆளுமைகளுக்கு பத்ம விருதுகள் வழங்கப்பட்டு வருகிறது. பத்ம விபூஷண், பத்ம பூஷண், பத்மஸ்ரீ என 3 பிரிவாக பத்ம விருதுகள் உள்ளன.

இந்நிலையில் தான் 2023ம் ஆண்டிற்கான பத்ம விருதுகள் குடியரசு தினத்தையொட்டி 106 பேருக்கு அறிவிக்கப்பட்டது. 6 பேருக்கு பத்ம விபூஷன் விருதும், 9 பேருக்கு பத்ம பூஷண் விருதும், 91 பேருக்கு பத்மஸ்ரீ விருதும் அறிவிக்கப்பட்டது.

தமிழகத்தை சேர்ந்த 6 பேர் தேர்வு

அதன்படி தமிழ்நாட்டை சேர்ந்த மறைந்த பாடகி வாணி ஜெயராம் பத்ம பூஷண் விருதுக்கு தேர்வு செய்யப்பட்டார். இதுதவிர செங்கல்பட்டு அருகே உள்ள சென்னேரி கிராமத்தை சேர்ந்த இருளர் பழங்குடியினத்தைச் சேர்ந்த பாம்புபிடி வீரர்களான வடிவேல் கோபால், மாசி சடையன், தஞ்சாவூரில் பிறந்த பரதநாட்டியக் கலைஞர் கே கல்யாணசுந்தரம் பிள்ளை, திருநெல்வேலி மாவட்டத்தை சேர்ந்த சமூக சேவகர் பாலம் கல்யாண சுந்தரம், தமிழகத்தைச் சேர்ந்த மருத்துவர் கோபால்சாமி வேலுச்சாமி ஆகியோருக்கு பத்மஸ்ரீ விருது அறிவிக்கப்பட்டது.

106 பேருக்கு விருது வழங்கல்

இதையடுத்து தமிழ்நாட்டை சேர்ந்தவர்கள் உள்பட 106 பேருக்கும் இன்று டெல்லியில் நடந்த விழாவில் அனைவருக்கும் பத்ம விருதுகள் வழங்கப்பட்டது. அனைவருக்கும் பத்ம விருதுகளை ஜனாதிபதி திரவுபதி முர்மு வழங்கி கவுரவித்தார். விருதுக்கு தேர்வாகி மரணமடைந்தவர்கள் சார்பில் அவர்களின் குடும்பத்தினரிடம் விருது ஒப்படைக்கப்பட்டது. விழாவில் பிரதமர் நரேந்திர மோடி, மத்திய அமைச்சர்கள் பங்கேற்றனர்.

யார் இந்த பாலம் கல்யாண சுந்தரம்

இந்நிலையில் தான் நடிகர் ரஜினிகாந்த் தனது வளர்ப்பு தந்தை என பெருமையாக பேசிய பாலம் கல்யாண சுந்தரத்துக்கும் விருது வழங்கப்பட்டுள்ளது. பாலம் கல்யாண சுந்தரம் திருநெல்வேலியில் பிறந்தார். இவர் கல்லூரியில் 30 ஆண்டுகள் நூலகராக பணியாற்றி பணம் சம்பாதித்தார். இந்த சம்பளப்பணம், ஓய்வூதியம், குடும்பச் சொத்து, விருதுகள் மூலம் கிடைத்த பரிசுத் தொகைகள் உள்ளிட்ட அனைத்தையுமே ஏழைகளுக்கான தொண்டுப் பணிக்கு கொடுத்தார்.

ரஜினிகாந்த் சொன்ன வார்த்தை

கல்யாண சுந்தரம் என்ற பெயர் கொண்ட அவர் பாலம் பாலம் என்ற தொண்டு நிறுவனத்தை நடத்தி அதன்மூலம் கிட்டத்தட்ட 30 ஆண்டுகளாக சமூக சேவை ஆற்றி வருகிறார் இதனால் அவரது பெயர் பாலம் கல்யாண சுந்தரம் என மாறிப்போனது. நடிகர் ரஜினிகாந்த் ஒருமுறை இவரை வளர்ப்பு தந்தை என்று குறிப்பிட்டு பேசியிருந்தார். அதாவது கடந்த 1999 காலக்கட்டத்தில் பாலம் கல்யாண சுந்தரம் பாராட்டு விழாவில் ரஜினிகாந்த் பங்கேற்றார். அப்போது அவரது சமூக சேவையை புகழ்ந்து ரஜினிகாந்த் பேசினார். மேலும் தன் சொத்துகளை ஏழைகளுக்கு எழுதித் தரும் மகானுக்கு நான் மகனாக வேண்டும் என மேடையிலேயே அறிவித்ததோடு தனக்கு தந்தையாக இருக்க வேண்டும் என பெருமையாக கூறினார். மேலும் வளர்ப்பு தந்தை போல் அவரை நடிகர் ரஜினிகாந்த் பாவித்தார்.

ரஜினியுடன் போயஸ் கார்டனில்..

மேலும் பாலம் கல்யாண சுந்தரத்தை நடிகர் ரஜினிகாந்த் சென்னை போயஸ் கார்டன் இல்லத்துக்கு அழைத்த சென்றார். அங்கு சிறிது காலம் பாலம் கல்யாண சுந்தரம் இருந்த நிலையில் அவர் தனது சுயவிருப்பத்தின் பெயரில் அங்கிருந்து வேறு இடத்துக்கு சென்றார். அப்போதும் ரஜினிகாந்த் வெளியேற விடாமல் தடுத்த நிலையில் பாலம் கல்யாண சுந்தரம் தான் விருப்பத்தோடு வெளியேறினார். இந்த வேளையில் எப்பொழுது வேண்டுமானாலும் தன்னை வந்து பார்க்கலாம் என்றும் 24 மணி நேரமும் உங்களுக்காக என் வீட்டின் கதவு திறந்திருக்கும் என்று ரஜினிகாந்த் அவரை வழியனுப்பி வைத்துள்ளார். இந்நிலையில் தான் கல்யாண சுந்தரம் இன்று பத்மஸ்ரீ விருதை ஜனாதிபதி திரெளபதி முர்முவிடம் இருந்து பெற்றுள்ளார் என்பது குறிப்பிடத்தக்கது.

English summary

Palam Kalyana Sundaram, whom actor Rajinikanth proudly referred to as his adoptive father, was honored with the Padma Shri by President Thirelapathi Murmu today in appreciation of his social service. So who is Palam Kalyana Sundaram? The relationship between her and actor Rajinikanth has been revealed.