புதிய மீன் பிடி துறைமுகங்கள்.. ரூ.1 லட்சம் கோடியாக அதிகரிக்கும் மீன் ஏற்றுமதி.. நிர்மலா அறிவிப்பு

டெல்லி: மீன் ஏற்றுமதி மதிப்பை ரூ.1 லட்சம் கோடியாக அதிகரிக்க திட்டம் போடப்பட்டுள்ளது, நாடு முழுக்க புதிய மீன்பிடி துறை முகங்கள் அமைக்கப்படும் என்று நிதி அமைச்சர் நிர்மலா சீதாராமன் தெரிவித்துள்ளார்.

கொரோனா காரணமாக இந்திய பொருளாதாரம் முடங்கி உள்ளது. இந்த பொருளாதாரத்தை மீட்டெடுப்பதற்காக, பிரதமர் நரேந்திர மோடி 20 லட்சம் கோடி மதிப்பிலான நிதி பேக்கேஜ் அறிவிப்பை வெளியிட்டார். இந்த நிலையில் தற்போது நிதி அமைச்சர் நிர்மலா சீதாராமன் முக்கிய பொருளாதார திட்டங்களை அறிவித்து வருகிறார்.

இந்த தன்னிறைவு இந்தியா திட்டத்தின் 3ம் கட்ட சிறப்பு திட்டங்களை இன்று நிர்மலா சீதாராமன் அறிவித்து இருந்தார். இதில் மீன்வளத்துறை தொடர்பான முக்கியமான அறிவிப்புகளை நிதியமைச்சர் நிர்மலா சீதாராமன் அறிவித்து இருந்தார்.

அதில், மீன் ஏற்றுமதி மதிப்பை ரூ.1 லட்சம் கோடியாக அதிகரிக்க திட்டம் போடப்பட்டுள்ளது. இதன் மூலம் நாடு முழுக்க கடலோர பகுதிகளில் வசிக்கும் மக்கள் அதிக பயன் அடைவார்கள். மீன்வள மேம்பாட்டிற்காக ரூ.11,000 கோடி நிதி ஒதுக்கீடு செய்யப்படும்.

மீன்பிடி துறைமுகம், மீன்சந்தைகளுக்கு உள்கட்டமைப்புகளுக்கு ரூ.9,000 கோடி ஒதுக்கீடு செய்யப்படும். நாடு முழுக்க புதிய மீன்பிடி துறைமுகங்கள் கட்டப்படும். இதற்கான தேர்வு செய்யப்பட்டு வருகிறது.

கூடுதலாக 70 லட்சம் மீன் உற்பத்தியை எட்ட அரசு இலக்கு நிர்ணயம் செய்யப்பட்டுள்ளது. இன்று மாலைக்குள் அந்த இலக்கு எட்டப்படும். இதன் காரணமாக ஏராளமானோருக்கு புதிய வேலைவாய்ப்புகள் உருவாகும் என்று நிர்மலா சீதாராமன் அறிவித்துள்ளார்.

English summary

FM Nirmala Sitharaman made some effective announcement on Fisheries department.